RDC: Abantu 22 bashimuswe n’abarwanyi ba FDLR

Yanditswe na Akayezu Jean de Dieu
Kuya 18 Nzeri 2019 saa 11:59
Yasuwe :
0 0

Abantu 22 bo muri Repubulika Iharanira Demukarasi ya Congo bashimutiwe i Kisharo mu bilometero 100 uvuye mu Mujyi wa Goma n’abarwanyi b’umutwe w’iterabwoba wa FDLR ukorera muri iki gihugu.

Bivugwa ko aba bantu bashimuswe ku wa 17 Nzeri 2019, ubwo bari mu muhanda wa Kiwanja-Ishasha mu gace ka Rutshuru.

Umuyobozi wungirije w’Intara ya Kivu y’Amajyaruguru, Elie Nzaghani yabwiye Actualité dukesha iyi nkuru ko abashimuswe abenshi ari abahinzi bafashwe bari mu mirima yabo.

Yagize ati “Nibura abantu 22 bashimuswe muri iki gitondo i Kisharo. Abashimuswe bari bagiye mu mirimo yabo. Twavuga ko tugiye koherezayo ingabo za leta kugira ngo abo baturage batagirirwa nabi.”

Mu ntangiro za Nzeri 2019, Ingabo za leta binyuze mu mukwabu wiswe Sokola2 zafashe abantu barindwi bakekwaho gushimuta abaturage muri aka gace ka Rutshuru, Kiseguro na Nyakakoma ku muhanda wa Kiwanja-Ishasha.

Mu minsi ishize ingabo za leta, FARDC, zatangije gahunda y’umukwabu wo guhiga imitwe y’abarwanyi ikorera muri iki gihugu irimo FDLR, ikorera mu duce twa Rutshuru na Nyiragongo.

FDLR yiganjemo abahoze mu ngabo z’u Rwanda, Ex-FAR, bagize uruhare muri Jenoside yakorewe Abatutsi muri Mata 1994.

Hashize imyaka igisirikare cya RDC gitangiye umugambi ko kurandura imitwe y’iterabwoba izahaza umutekano wacyo cyane mu burasirazuba, ariko ntabwo iyi ntego iragerwaho.

Abantu 22 bashimuswe n’abarwanyi ba FDLR mu gace ka Rutshuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza