Pierre Buyoya wayoboye u Burundi yakatiwe igifungo cya burundu

Yanditswe na IGIHE
Kuya 20 Ukwakira 2020 saa 02:24
Yasuwe :
0 0

Pierre Buyoya wigeze kuyobora u Burundi yakatiwe igifungo cya burundu nyuma yo guhamywa uruhare mu iyicwa rya Perezida Melchior Ndadaye.

Iki kirego Buyoya agihuriyeho n’abantu 18, muri bo umwe gusa, Antoine Nduwayo wahoze ari Minisitiri w’Intebe, ni we wagizwe umwere muri iyi dosiye.

Urukiko rw’Ikirenga mu Burundi rushinja Buyoya na bagenzi be ibyaha birimo gutera umukuru w’igihugu no kugaba igitero kigambiriye ubwicanyi.

Major Pierre Buyoya yayoboye u Burundi inshuro ebyiri (1987-1993, 1996-2003). Uyu mugabo w’imyaka 70, aza ku mwanya wa kabiri mu bakuru b’igihugu bayoboye u Burundi imyaka myinshi (13).

Yasimbuwe ku butegetsi na Ndadaye watorewe kuyobora u Burundi muri Kamena 1993; yegukanye intsinzi y’amajwi 65% mu gihe Buyoya yagize amajwi 32%. Yaje kwicwa mu Ukwakira 1993 nyuma y’iminsi 102 atangiye kuyobora igihugu.

Buyoya ari mu bahamijwe uruhare mu rupfu rwa nyakwigendera wishwe mu myaka 27 ishize.

Mu ijoro ryo ku wa 21 Ukwakira 1993 nibwo Umutwe w’Abasirikare b’u Burundi wafashe umukuru w’igihugu, Melchior Ndadaye, wa mbere wari ugiyeho biciye mu matora ya demokarasi, uramwica.

Iyicwa rye ryakurikiwe n’ubwicanyi bwo kwihorera hagati y’Abahutu n’Abatutsi, Abarundi benshi bagera mu bihumbi 300 barishwe, abandi barahunga.

Mu 1998, hari abasirikare baciriwe imanza, ariko abatari bake babitera utwatsi. Ubwo yaganiraga n’abanyamakuru mu 2003 hitegurwa kwibuka imyaka 10 Ndadaye yishwe, Jean Minani wari uyoboye ishyaka yavuze ko abasirikare bato ari bo bafashwe n’ubucamanza bagafungwa.

Yavuze ko bitumvikana uko bashobora kuba barateguye bakanashyira mu bikorwa umugambi wo kwica Melchior Ndadaye.

Nyuma yaho, Ubushinjacyaha bw’u Burundi bwasohoye impapuro zo guta muri yombi Buyoya n’abandi bayobozi 16 bubashinja kugira uruhare mu rupfu rwa Ndadaye.

Buyoya we mu kwiregura yavugaga ko ibyo ashinjwa ari ibihimbano, akavuga ko byateguwe mu rwego rwo kwibagiza abantu ibibazo u Burundi bufite.

Buyoya azwi nk’umugabo wubashywe muri dipolomasi ya Afurika ndetse ari mu bagize uruhare mu biganiro byatumye habaho amatora yagejeje Pierre Nkurunziza ku butegetsi mu 2005, nyuma y’imyaka 12 igihugu kiri mu mvururu.

Pierre Buyoya wayoboye u Burundi yakatiwe igifungo cya burundu
Nyuma y'imyaka 27 Ndadaye amaze yishwe, ababigizemo uruhare bayobowe na Pierre Buyoya nibwo bahamijwe icyaha
Ndadaye yishwe mu buryo bwabanje kuba amayobera ariko umuryango we urarokoka
Melchior Ndadaye yishwe ku wa 21 Ukwakira 1993 nyuma y'igihe gito agiye ku butegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .