00:00:00 IGIHE NETWORK KN KINYARWANDA EN ENGLISH FR FRANCAIS

Perezida wa Tanzania yakuyeho ibirori by’isabukuru y’ubwigenge

Yanditswe na IGIHE
Kuya 5 Ukuboza 2022 saa 07:14
Yasuwe :

Perezida wa Tanzaniza Samia Suluhu Hassan yakuyeho ibirori byo kwizihiza isabukuru y’ubwigenge byagombaga kuba muri uyu mwaka, ategeka ko miliyoni 960 z’ama-shilling zagombaga gukoreshwa, zijyanwa mu kubaka amacumbi y’abayeshuri.

Ni mu gihe ku wa 9 Ukuboza 2022, Tanzania izaba yizihiza isabukuru y’imyaka 61 y’ubwigenge iki gihugu cyabonye cyigobotoye ubukoloni bw’u Bwongereza.

Umunyamabaga wa Leta mu biro bya Minisitiri w’Intebe ushinzwe politiki no guhuza ibikorwa, George Simbachawene, kuri uyu wa Mbere tariki 5 Ukuboza yabwiye abanyamakuru ko miliyoni 960 z’ama-shilling ya Tanzania (asaga miliyoni 445 Frw) zagombaga gukoreshwa, zizubakishwa amacumbi y’amashuri umunani abanza.

Yatangaje ko ayo mashuri ari aya Buhangija (Shinyanga), Goeko (Tabora), Darajani (Singida), Mtanga (Lindi), Songambele (Manyara), Msanzi (Rukwa), Idofi (Njombe), na Longido (Arusha).

Yavuze ko isabukuru y’imyaka 61 y’ubwigege izizihizwa mu buryo bw’ibiganiro mpaka n’inama zigamije kuganira ku bibazo bibbangamiye iterambere ry’abaturage, zikabera mu turere twose mu gihugu.

Yakomeje ati "Ibyo biganiro n’inama bizabanzirizwa n’ibikorwa byo ku rwego rw’intara n’uturere bihuza abaturage birimo gusukura ibitaro, amashuri, inzu z’abageze mu za bukuru n’andi matsinda y’abanyantege nke."

"Bityo, ibirori by’uyu mwaka ntabwo bizagira imitambagiro n’ibindi bikorwa byo ku rwego rw’igihugu."

Si ubwa mbere muri Tanzania ibi birori bikuweho, kuko uwabanjirije Samia, John Pombe Magufuli, mu 2015 yategetse ko ibyo birori bisubikwa, amafaranga yagombaga gukoreshwamo yifashishwa mu kubaka umwe mu mihanda ya Dar Es Salaam.

Yongeye kubikora mu 2020, amafaranga yari kwifashishwa akoreshwa mu kugura imiti n’ibikoresho byo kwa muganga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .