Perezida wa Malawi yashyizeho igihembo ku baganga b’indashyikirwa mu kurwanya Coronavirus

Yanditswe na Twarabanye Venuste
Kuya 2 Kanama 2020 saa 08:00
Yasuwe :
0 0

Perezida wa Malawi, Lazarus Chakwera, yashyizeho igihembo kidasanzwe ku bakozi bo mu rwego rw’ubuzima bari mu bikorwa byo kurwanya Coronavirus.

Perezida Chakwera yabigarutseho mu ijoro ryo ku wa Gatandatu, mu ijambo ageza ku baturage buri Cyumweru. Yavuze ko abakozi batanu b’Indashyikirwa bazajya batoranwa buri mezi atatu bagahabwa ibihembo.

Yafashe icyo cyemezo mu gihe imibare y’abandura ikomeje kwiyongera muri icyo gihugu. Kugeza kuri iki cyumweru hamaze kwandura abagera ku 4186 abagera kuri 120 barapfuye naho 1914 barakize.

Perezida Chakwera yavuze ko nubwo ubwandu bukomeje kwiyongera ku rundi ruhande kuba abagera hafi kuri kimwe cya kabiri barakize icyo cyorezo ari ibyo kwishimira.

Ati “Ibi ni ukubera abakozi bacu mu rwego rw’ubuzima, bitanze bagashyira ubuzima bwabo mu kaga basuzuma abantu benshi buri munsi, baha amabwiriza yo kujya mu kato abasanzwemo icyorezo no kuvura abakeneye kujya mu bitaro.”

Yavuze ko iyo batahaba nta byiringiro byo guhashya icyo cyorezo igihugu cyari kuba gifite. Abakora mu rwego rw’ubuzima bishimiye ibyo bihembo, gusa bavuga ko gushimira abantu batanu gusa bidahagije.

Bavuze ko bidahagije kuko buri wese ari gukora cyane ariyo mpamvu abakozi mu rwego rw’ubuzima bagera kuri 350 bamaze kwandura muri Malawi n’umwe agapfa azize Covid-19.

Hari abavuze ko igihembo cyari gutangwa mu buryo rusange, ku buryo gishobora no kuba kubakuriraho umusoro ku mushahara. Gusa ngo hakwiye no kurebwa ku buke bw’abaganga mu bitaro ari nacyo kiri gutuma guhangana n’icyorezo birushaho kugorana muri icyo gihugu.

Perezida wa Malawi yasabye abanyagihugu kubahiriza amabwiriza yo kwirinda harimo guhana intera hagati y’umuntu n’undi, kwambara agapfukamunwa no gukaraba intoki kenshi.

Abakozi batanu bo mu rwego rw'ubuzima b'indashyikirwa bazajya bashimirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .