00:00:00 IGIHE NETWORK KN KINYARWANDA EN ENGLISH FR FRANCAIS

Perezida Suluhu yaciye amarenga ko ashobora kuzahatanira kuyobora Tanzania mu 2025

Yanditswe na Bukuru JC
Kuya 16 Nzeri 2021 saa 10:55
Yasuwe :
0 0

Perezida wa Tanzania, Samia Suluhu, yaciye amarenga ko ashobora kuzaba umwe mu bakandida bazahatanira kuyobora Tanzania mu matora y’Umukuru w’Igihugu ateganyijwe mu 2025.

Ibi Perezida Samia Suluhu yabigaragarije mu ijambo yavuze ubwo hizihizwaga Umunsi Mpuzamahanga wa Demokarasi. Ni ibirori byabereye muri ‘Nyerere International Convention Centre’ mu Mujyi wa Dar es Salaam.

Suluhu yahawe inshingano zo kuyobora Tanzania nyuma y’urupfu rwa Dr John Pombe Magufuli kuko ariko byateganywaga n’Itegeko Nshinga. Yavuze ko mu matora ya 2025 haziyamamaza abagore kandi muri bo hakagira utorwa.

Ati “Abagore ntibaratora Perezida w’umugore, icyo twagerageje ni ukugira Visi Perezida w’umugore kandi uyu Perezida (yivuga) ayoboye kubera ko byifujwe n’Imana kandi bikaba byaragenwaga n’Itegeko Nshinga.”

Samia Suluhu yayoboye Tanzania kuko Itegeko Nshinga ry’iki gihugu rigena ko igihe Perezida apfuye cyangwa akaba atagishoboye kuzuza inshingano ze asimburwa na Visi Perezida, umwanya wari urimo uyu mugore.

Perezida Samia Suluhu yakomeje avuga ko abagore bo muri Tanzania bakwiye gutahiriza umugozi umwe kugira ngo bazabonekemo umwe ubayobora.

Ati “Abagore, nituramuka dufatanyije tugakora neza inshingano dufite, mu 2025 tuzagaruka aha twishimire umwe muri twe uzaba wabaye Umukuru w’Igihugu.”

“Batangiye kwandika mu binyamakuru ko Samia atazahatana ku mwanya wa Perezida, ni nde wababwiye ko ntaziyamamaza ? Ineza y’Imana ni ukugera mu biganza ntuzayirengagize.”

Magufuli yitabye Imana muri Werurwe 2021 nyuma y’igihe gito atorewe kuyobora Tanzania muri manda ya kabiri yagombaga kurangira mu 2025.

Ibi bivuze ko Samia Suluhu wamusimbuye ariwe ugomba kuyobora kugeza iki gihe, ubundi hakazaba amatora y’Umukuru w’Igihugu ashobora kwiyamamazamo mu gihe yaba abishaka cyangwa ntabikore.

Perezida Samia Suluhu yaciye amarenga ko ashobora kuzahatanira kuyobora Tanzania mu 2025

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .