Perezida Ramaphosa yakomoje ku rugomo ruherutse kwibasira abanyamahanga muri Afurika y’Epfo

Yanditswe na Habimana James
Kuya 12 Ugushyingo 2019 saa 07:48
Yasuwe :
0 0

Muri Nzeri uyu mwaka, ibitangazamakuru bitandukanye ku isi byari byerekeje amaso muri Afurika y’Epfo, kubera ibikorwa by’urugomo byari birimo kwibasira abanyamahanga, bamwe barishwe abandi bamburwa imitungo babashinja kubambura akazi bigatuma bagira ubushomeri buri kuri 29%.

Amaguriro, imodoka zicuruzwa n’abanyamahanga, amaduka n’ibindi byaribasiwe cyane ndetse amahanga yamagana ubu bugizi bwa nabi.

Nibura mu Cyumweru kimwe abagera kuri 12 bafite amaduka muri Johannesburg na Pretoria bari bamaze kuhasiga ubuzima ndetse amagana y’abandi bakomeretse.

Bimwe mu bihugu bifite abaturage bibasiwe cyane birimo Nigeria, ibintu byatumye abaturage b’iki gihugu nabo batangira kwihimura ku banyafurika y’Epfo bacururiza mu Mijyi nka Lagos.

Kuri uyu wa Mbere tariki 11 Ugushyingo 2019, Perezida wa Afurika y’Epfo Cyril Ramaphosa yavuze byimbitse ku bibazo byabaye mu gihugu cye, yongera kubwira Isi ko iki gihugu kitazihanganira buri wese uzongera kwadukana uru rwango.

Ramaphosa yabigaragarije mu nama y’ishoramari ryo kuri uyu mugabane irimo kubera muri Afurika y’Epfo izwi nka ‘African Investment Forum’, ikaba yanitabiriwe n’abakuru b’ibihugu barimo na Perezida Paul Kagame.

Ni inama yateguwe na Banki Nyafurika Itsura Amajyambere, irimo guhuza ibigo by’ubwiteganyirize, ibigo bya leta bikora ishoramari, abashoramari bikorera ku giti cyabo, abafata ibyemezo n’abakuru ba za Guverinoma.

Umwe mu baturage ukomoka muri Nigeria, yabajije Perezida Ramaphosa icyizere yaha abanyamahanga bashaka kuza mu gihugu cye, mu gihe n’abari bahari bakorewe ibikorwa byo kubahotera.

Perezida Ramaphosa yagaragaje ko ikibazo cy’abimukira ari ikibazo cyugarije isi muri rusange, Afurika y’Epfo nayo ikaba ari igihugu cyakira abantu bose ndetse ikibyerekana kikaba ari abaturage benshi harimo n’abahunga ibibazo bya politike mu bihugu byabo bakazayo.

Yagize ati “Aba banyamahanga benshi baba hano kandi ntabwo twigeze tubashyira mu nkambi nk’uko bamwe bakunze kujya babitubwira, twahisemo ko baza bakabana n’abaturage bacu, ariko murabizi ko iyo havutse ikibazo cy’ubukungu usanga abaturage batangiye kwirwanaho kandi biba hirya hino ku isi.”

Yakomeje agira ati “Ubu guverinoma ya Afurika y’Epfo yiteguye kurwanya ibi bintu mu buryo bukomeye, twashyizeho gahunda yo guhangana n’iki kibazo kandi ababikoze twabifashe nk’icyaha.”

Hari abakwije amakuru y’ibihuha bakayitirira Afurika y’Epfo

Perezida Ramaphosa yabwiye abayobozi batandukanye barimo Perezida Kagame, uwa Ghana Nana Akufo-Addo n’abandi ko hari amwe mu makuru y’ibihuha abantu bagendaga bakwirakwiza, agatangira kwitirirwa iki gihugu.

Yagize ati “Mu by’ukuri ibyabaye hano byagiye byamamazwa mu buryo bw’ibihuha, hagiye havugwa amwe mu makuru atari ukuri, hari amafoto amwe bagiye babona abantu basimbuka mu nzu zirimo gushya bakavuga ngo dore ibirimo kuba muri Afurika y’Epfo kandi sibyo, ibi byatumye imvururu zikomeza kwiyongera mu bihugu birimo na Nigeria.”

Ramaphosa yavuze ko yaje kugirana ibiganiro na Perezida wa Nigeria Muhammadu Buhari kandi bigenda neza, avuga ko ingabo za Nigeria nazo zarengeye abaturage b’iki gihugu bari barimo kwibasirwa.

Yavuze ko ubutegetsi bwe bwataye muri yombi abantu 200 kandi ngo ubu ibintu bimeze neza.

Ati “Nyuma y’iki kibazo nohereje intumwa gusobanura uko ibintu bimeze, nazohereje kubonana na Perezida Kagame mu Rwanda no muri Ghana ubu kandi bagiye no gukomeza kujya mu bindi bihugu, ikindi ni uko tugiye gushyiraho itsinda ririmo Joachim Chissano wayoboye Mozambique na Benjamin Mkapa wayoboye Tanzania ngo barebe ahari ikibazo, turashaka kurwanya ko hari ikindi kibazo cyazaba, turashaka ko Abanyafurika y’Epfo bishimira abavuye ahandi, ntabwo turi ikirwa kuko nabo badufashije kurwanya ivanguramoko.”

Perezida Ramaphosa yatanze ubutumwa ko Afurika y’Epfo ari igihugu gikinguye kuri buri wese, ko uhaje wese agomba kumva atuje akamera nk’uri mu rugo.

Ubwicanyi bwatangiye muri Afurika y’Epfo ubwo abashoferi b’amakamyo batambikaga ibiti mu muhanda mu Ntara ya KwaZulu-Natal, bagatangira imodoka barwanya guhabwa akazi ko gutwara ibinyabiziga ku banyamahanga.

Abaturage bashinja abanyamahanga kubatwara imirimo kubera umubare w’abashomeri bari muri Afurika y’Epfo.

Perezida Ramaphosa yabwiye abayobozi batandukanye barimo Perezida Kagame, uwa Ghana Nana Akufo-Addo n’abandi ko hari amwe mu makuru y’ibihuha abantu bagendaga bakwirakwiza, agatangira kwitirirwa iki gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza