Perezida Ramaphosa yagaragaje u Rwanda nk’urugero rwiza mu koroshya ubucuruzi

Yanditswe na Rabbi Malo Umucunguzi
Kuya 7 Werurwe 2019 saa 12:28
Yasuwe :
0 0

Perezida wa Afurika y’Epfo Cyril Ramaphosa, yagaragaje ko u Rwanda ari urugero rwiza mu korohereza abakora ubucuruzi, avuga ko igihugu cye cyihaye intego ko nibura mu myaka itandatu kizaba cyarushyikiriye ku rutonde ngarukamwaka rukorwa na Banki y’Isi.

Yabigarutseho kuri uyu wa Gatatu ubwo igihugu cye cyakiraga cyakiraga inama ngarukamwaka y’Umuryango w’Abayobozi bakiri bato izwi nka ‘YPO EDGE’ baturutse mu bihugu 95. Ni inama yitabiriwe na Perezida Paul Kagame.

Perezida Ramaphosa yavuze ko ari ikintu gikomeye kuba Afurika y’Epfo by’umwihariko umujyi wa Cape Town wakiriye iyi nama ikomeye.

Yavuze ko byagaragaye ko ubukungu bw’ibihugu bikomeye buzazamuka gake mu 2020, mu gihe hakomeje intambara y’ubucuruzi hagati ya Amerika n’u Bushinwa, amadeni azamuka ku bihugu bimwe ndetse Banki Nkuru z’ibihugu zikomeje gushyiraho ingamba zihariye.

Muri Afurika naho, Banki zigaragaza ko mu gihe giciriritse, ubukungu buzazamuka kuri 4 ku ijana mu 2019 na 4.1 ku ijana mu 2020, gusa Banki y’Isi igaragaza ko Ethiopia izagera hafi ku izamuka ry’umusaruro mbumbe rinini ku Isi, hakaba n’ibihugu bifite izamuka ryo hejuru nka Tanzania, Kenya, u Rwanda na Ghana, bizagira izamuka rya 6 ku ijana .

Yagize ati “Ibi bihugu nibyo birangaje imbere Afurika mu izamuka ry’ubukungu kandi biri imbere mu gukurura ishoramari ry’amahanga binyuze muri gahunda zifatika zigamije gushingira ubukungu ku nzego zinyuranye no kuzamura ibyiciro biciriritse.”

Ramaphosa yavuze ko igihugu cye nacyo cyiyemeje gukomeza inzego zikurikirana iyubahirizwa ry’amategeko, kurwanya ruswa no kureshya abaishoramari, aho cyiyemeje kwandika ishoramari rishya rya miliyari $100 mu myaka itanu iri imbere.

Yakomeje ati “Dufite intego yo kurushaho kuzamura urwego rwo korohereza abakora ubucuruzi muri Afurika y’Epfo kandi twihaye intego yo kuza mu bihugu 50 bya mbere muri Raporo ya Banki y’Isi ku korohereza abakora ubucuruzi, mu myaka itatu iri imbere. Ubu Afurika y’Epfo iri ku mwanya wa 82 mu bihugu 190.”

“Mu myaka itandatu, Perezida Kagame, turashaka kuzaba twashyikiriye u Rwanda. Birashimishije kugira igihugu gihagaze neza cyane nk’u Rwanda ku mugabane wacu, kuko kiduha amahirwe yo kukireberaho ariko kikanatuma natwe duharanira kuzamuka.”

Yavuze ko ari ibintu bizasaba imbaraga nyinshi haba kuri guverinoma n’abandi bafatanyabikorwa binyuze no mu miryango y’ubucuruzi.

Muri raporo iheruka ya Banki y’Isi ku koroshya ubucuruzi, 2019 World Bank Doing Business Report’, yasohotse mu Ukwakira 2018, u Rwanda rwasimbutse imyanya 11 rugera ku mwanya wa 29 ku Isi, ruvuye ku wa 41. Ni urwa kabri muri Afurika.

Rwakoze amavugurura arindwi mu bijyanye n’ubucuruzi, ruza imbere ku Isi mu gukora amavugurura menshi, umwanya ruheruka mu 2013 ubwo rwakoraga amavugurura umunani.

Inkuru wasoma: U Rwanda rwigiye imbere imyanya 11 ku Isi mu koroshya ubucuruzi

Perezida Ramaphosa ageza ijambo ku bitabiriye inama y'abayobozi bakiri bato i Cape Town
Iyi nama yitabiriwe n'abayobozi baturutse mu bihugu bisaga 95
Perezida Ramaphosa mu ifoto y'urwibutso na Perezida Paul Kagame n'abandi bayobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza