Iki cyemezo Musherure yatangaje kuri iki Cyumweru tariki 22 Kamena 2025, cyatunguranye kuko hari hashize iminsi mike bitangajwe ko yiteguye guhatana mu matora yo guhagararira agace ka ‘Mawogola North’ mu matora y’Abadepite. Yagombaga kwiyamamaza ku itike y’ishyaka NRM riri ku butegetsi.

Muri iri tangazo Musherure yavuze ko yafashe iki cyemezo “Mu kubaha Perezida akaba na Chairman w’ishyaka NRM, hagamijwe kubungabunga ubumwe mu ishyaka rya NRM.”

Kwikura mu matora kwa Musherure kubayeho nyuma y’iminsi mike yongeye gushyamirana na murumuna wa Perezida Museveni witwa Sodo Aine Kaguta. Bombi bapfa uyu mwanya wo mu Nteko Ishinga Amategeko.

Shartsi Musherure asanzwe ahagarariye agace ka ‘Mawogola North’ mu Nteko Ishinga Amategeko ya Uganda. Ni umwanya yagiyeho mu 2021, aho yari awuhanganiye na Sodo Aine Kaguta.

Sodo Aine Kaguta wari wegukanye amatora mu 2021 yavuze ko yahisemo guharira Shartsi Musherure, nyuma yo kubisabwa na Museveni kubera amakimbirane yari yavutse.

Uyu murumuna wa Museveni avuga ko mu 2021 yumvikanye na Shartsi Musherure ko nawe azamuharira akiyamamariza guhagararira aka gace mu matora y’umwaka utaha.

Mu mpera z’iki cyumweru, byari byatangajwe ko Shartsi Musherure yanze guharira Sodo Aine Kaguta, kuko nawe ashaka kongera kwiyamamaza.

Sodo Aine Kaguta yahise atangaza ko yababajwe cyane n’uyu mwanzuro wa Musherure.

Ati “Twarumvikanye, kandi buri umwe wari muri iyo nama arabizi. Ndatengushywe, na mbere nari natsinze amatora [...] Mwese muzi ibyabaye muri icyo gihe, ariko nyuma navuganye na Perezida Museveni turumvikana. Kuri ubu arabizi ko nziyamamaza muri ‘Mawogola North’. Nizeye ko ibyabaye mu 2021 bitazaba ubu. Ndibuka kiriya gihe ubwo neguraga, yarambwiye ati emerera Musherure gukomeza, ubutaha nawe ushobora kwiyamamaza."

Shartsi Kutesa Nayebare Musherure ni umukobwa wa Sam Kutesa wabaye Minisitiri w’Ububanyi n’Amahanga wa Uganda, akaba na muramu w’umuhungu wa Perezida Museveni, Gen Muhoozi Kairenugaba kuko ava inda imwe n’umugore we, Charlotte Kainerugaba Kutesa. By’umwihariko Musherure ni impanga ya Charlotte Kainerugaba.

Indi nkuru bifitanye isano: https://igihe.com/amakuru/muri-afurika/article/uganda-intambara-yongeye-kurota-hagati-y-umuvandimwe-wa-museveni-na-muramukazi?reload=now

Shartsi Musherure ntazongera kwiyamamaza

Shartsi Musherure yavuze ko yaretse kwiyamamaza mu kubaha Perezida Museveni