Perezida Magufuli yavuze ko Afurika ikwiye guhanagurwaho imyenda aho guhabwa indi

Yanditswe na Bukuru JC
Kuya 24 Mata 2020 saa 10:26
Yasuwe :
0 0

Perezida wa Tanzania, John Pombe Magufuli, yasabye Banki y’Isi, ibigo n’ibigega bitanga inguzanyo, guhanaguraho imyenda ibihugu bya Afurika aho gukomeza kubiha inguzanyo zo kurwanya Coronavirus.

Mu ijambo yagejeje ku baturage ku wa Gatatu ku bijyanye na Coronavirus, Magufuli yavuze ko igihugu cye kishyura abarirwa muri miliyari 700 z’amashilingi ni ukuvuga miliyoni $300.9 buri mwaka cyishyura imyenda, aya akaba ashobora kongera imbaraga mu kurwanya Coronavirus.

Ati “Banki y’Isi yonyine ifata hagati ya miliyari 200-300 z’amashilingi (miliyoni $128.9). Aya mafaranga ashobora gukoreshwa mu kurwanya Coronavirus. Afurika igomba gushyira hamwe igasaba ko imyenda ihanagurwa aho gufata inguzanyo”.

Magufuli atangaje ibi mu gihe ibigega mpuzamahanga n’ibihugu bikomeje kwiga ku buryo bwo gusubika kwishyuza imyenda ibihugu bya Afurika ndetse bimwe bikomeje no gusaba indi myenda yo guhangana n’ingaruka za Coronavirus.

Muri Tanzania abagera kuri 284 bamaze kwandura Coronavirus, abagera ku 10 imaze kubica naho 11 bamaze kuyikira. Magufuli avuga ko abamaze gukira ari benshi kurusha abo Minisiteri y’Ubuzima itangaza.

Ati “Icyo nzi ni uko hari abarenga 100 bamaze gukira. Ndifuza ko n’ibi bishimangirwa”.

Magufuli kandi yateye utwatsi ibyo gufunga ibikorwa mu mujyi wa Dar es Salaam, ahari abantu benshi banduye, akavuga ko bishobora gushegesha ubukungu. Yasabye kandi ko abaturage bakwiye kwizera imiti gakondo.

Magufuli avuga ko Afurika idakwiye gukomeza kwaka imyenda ahubwo ikwiye gusaba ko iyo ifite ihanagurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .