Namibia: Itangira ry’amashuri ryigijwe inyuma kubera Coronavirus

Yanditswe na Dufitumukiza Salathiel
Kuya 5 Mutarama 2021 saa 01:16
Yasuwe :
0 0

Goverinoma ya Namibia yatangaje ko itariki ya 14 Mutarama 2021 amashuri yari ateganyijwe gufunguriraho yimuriwe ku wa 26 uko kwezi, mu rwego rwo kwitegura neza uburyo bwo kuzirinda ikwirakwira rya Coronavirus igihe azaba yongeye gufungurwa.

Ibigo by’amashuri muri iki gihugu byari byatangiye kwitegura gusubukura amasomo, dore ko byari biteganyijwe ko abarimu baba bageze ku bigo ku wa Gatatu, tariki 6 Mutarama 2021. Impinduka nshya zagennye ko bazahagera ku wa 14 Mutarama 2021.

Minisitiri w’Uburezi muri Namibia, Anna Nghipondoka, yavuze itariki nshya yashyizweho ku bwumvikane bw’Ibiro bya Perezida, ibya Minisitiri w’Intebe, Minisiteri y’Ubuzima, Ihuriro ry’Abarimu muri icyo gihugu, Inama y’Igihugu Ngishwanama mu by’uburezi n’abandi bafatanyabikorwa.

Minisiteri y’Uburezi isobanura ko amatariki yacumwe kugira ngo abarimu bakomeze gutegura uburyo bwo guhangana n’ikwirakwira rya Coronavirus mu gihe abanyeshuri bazaba bagarutse ku mashuri.

Ababyeyi nabo bongeye gushishikarizwa kugurira abanyeshuri udupfukamunwa hakiri kare no kubigisha uko batwambara neza, bakazajya ku ishuri biteguye.

Icyorezo cya COVID-19 cyakwirakwiye mu bice bitandukanye by’ Isi mu mpera za 2019 gihereye i Wuhan mu Bushinwa, cyatumye ibuhugu byinshi bifunga amashuri n’ahandi hahurira abantu benshi, nk’uburyo bwo kwirinda kwanduzanya.

Abarenga 25 000 bamaze kwandura Coronavirus muri Namibia, barimo 208 yahitanye. Ku rwego rw’Isi imibare imaze kugera ku barenga miliyoni 85.7 banduye iki cyorezo mu gihe abagera kuri miliyoni 1.85 bamaze gupfa bazize iki cyorezo.

Itangira ry'amashuri muri Namibia ryigijwe inyuma hirindwa ko abanyeshuri bazanduzanya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .