00:00:00 IGIHE NETWORK KN KINYARWANDA EN ENGLISH FR FRANCAIS

Museveni yashinje abatavuga rumwe na we kongera umubare w’abishwe na Covid-19: Avugwa muri Afurika

Yanditswe na IGIHE
Kuya 24 May 2022 saa 10:59
Yasuwe :

Perezida wa Uganda, Yoweri Kaguta Museveni, yavuze ko abatizera Imana batanifitiye icyizere ari bo bavuga ko ubuyobozi bwe buzahura n’amakuba, ashinja abatavuga rumwe na we ’bafite imico mibi’ kongera umubare w’abanduye icyorezo cya Covid-19 n’abo cyishe mu gihugu.

Agendeye ku bwiyongere bw’ibiciro by’ibiribwa kubera intambara ya Ukraine, Museveni yagiriye inama abanya-Uganda yo kurya amafunguro gakondo kuko ari yo yatumye ageza imyaka 78 afite ubuzima bwiza.

Mu ijambo yagejeje ku baturage ku cyumweru, Museveni yavuze ko abatavuga rumwe n’ubutegetsi batumye Covid-19 yiyongera mu gihugu kubera ibikorwa byabo byo kwiyamamaza bakoze muri Mutarama 2021.

Muri Uganda umubare w’abishwe na Covid-19 ugeze ku 3600 ku bantu 164 153 banduye. Museveni yagize ati "Abapfuye bazize Covid-19 muri Werurwe 2021 bari 335 gusa. Ni imico mibi y’abatavuga rumwe n’ubutegetsi mu matora yatumye imibare izamuka igera ku 3600".

Mu bikorwa byo kwiyamamaza hari hemewe abantu 70 ariko abashyigikiye Robert Kyagulanyi, uzwi nka Bobi Wine, bagiye bitabira ari benshi.

Perezida Hassan Sheikh Mohamud yatangiye kuyobora Somalia ahabwa umukoro

Perezida ucyuye igihe wa Somalia, Mohamed Abdullahi Farmajo, kuri uyu wa Mbere yahererekanyije ububasha na Perezida mushya Hassan Sheikh Mohamud.

Perezida mushya afite inshingano zikomeye zo kugarura umutekano muri iki gihugu cyo mu ihembe rya Afurika kimaze imyaka cyugarijwe n’ibibazo by’umutekano muke biterwa n’umutwe w’iterabwoba wa Al Shabaab.

Farmajo yagize ati "Ndashimira Imana kuba mpererekanyije ububasha na Perezida mushya watowe".

Hassan Sheikh Mohamud kandi afite inshingano zo gushakira umuti ikibazo cy’amapfa atera inzara muri Somalia. Yavuze ko guhererekanya ububasha mu mahoro ari umunsi w’amateka uzahora wibukwa. Yasabye abanya-Somalia kumushyigikira no kumugirira icyizere.

Mohamud yatsinze Farmaajo mu matora yabaye kuwa 15 Gicurasi 2022, aho yabonye amajwi 214 ku 110.

Zimbabwe irashaka kwemererwa gucuruza amahembe y’inzovu

Zimbabwe yafunguye inama mpuzamahanga yo gushaka abayishyigikira mu mugambi ifite wo kwemererwa kugurisha amahembe y’inzovu yafatiriye.

Iki gihugu kiramutse kitemerewe kugurisha toni 130 z’amahembe y’inzovu, abarirwa agaciro ka miliyoni 600 z’amadolari, bivugwa ko cyahita cyikura mu masezerano ku bucuruzi mpuzamahanga bwerekeye inyamaswa zo mu gasozi ziri mu kaga.

Iyi nama y’iminsi itatu yitabiriwe n’ibihugu 16 byo muri Afurika ndetse n’u Buyapani n’u Bushinwa. Mu cyumweru gishize intumwa z’ibihugu by’Umuryango w’Ubumwe bw’u Burayi, u Bwongereza, Leta zunze Ubumwe za Amerika zerekeje muri Zimbabwe ngo ziyifashe gutsinda urugamba rwo kwemererwa kugurisha amahembe y’inzovu.

Zimbabwe yakunze kurwanywa n’amatsinda menshi arengera urusobe rw’ibinyabuzima, avuga ko kugurisha amahembe y’inzovu bizatiza umurindi ba rushimusi.

Iki gihugu kivuga ko inzovu zacyo ziyongera ku kigero cya 5% na 8% ku mwaka bityo bikaba bikenewe ko yemererwa kugurisha amahembe y’inzovu kugira ngo imicungire yazo ishoboke kuko ubwiyongere bwazo ngo buteye inkeke.

Muri Zimbabwe habarurwa inzovu 100 000, zikaba ari nyinshi ugereranyije n’ubushobozi bwa pariki zayo zishobora kwakira izigera ku bihumbi 500. Botswana niyo ifite inzovu nyinshi zirenga ibihumbi 130. Ibi bihugu byombi bifite inzovu zingana na 50% y’iziba ku Isi zose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .