Mu mezi atatu ibihugu bigize EAC bimaze kuguza miliyari 2.3 z’amadolari

Yanditswe na Habimana James
Kuya 18 Gicurasi 2020 saa 02:53
Yasuwe :
0 0

Mu mezi atatu ashize gusa ibihugu bigize Umuryango wa Afurika y’Iburasurazuba, EAC, bimaze kugurizwa amadolari ya Amerika miliyari 2.3, ibi bikaba ngo bikomeza gushyira aka karere mu kaga ko kugira umwenda mwinshi no kuzawishyura.

Amakuru avuga ko umwenda mwinshi ibi bihugu byakiriye ari uwo kubifasha kurwanya icyorezo cya Coronavirus no guhangana n’ingaruka zatewe nacyo. Amenshi muri aya mafaranga yatanzwe n’Ikigega mpuzamahanga cy’imari, IMF.

Kugeza ubu muri Afurika y’Iburasirazuba, igihugu kiza imbere mu bwandu bwinshi bwa Coronavirus ni Kenya kuko hamaze kwandura 887 hapfuye 50, Tanzania iza ku mwanya wa kabiri, kuko handuye 509 hapfuye 21, u Rwanda rufite abanduye 292 abamaze gukira ni 197, muri Uganda ho hamaze kwandura 227.

Mu Burundi handuye abantu 42 hapfa umwe naho muri Sudani y’Epfo hamaze kwandura abantu 290 hamaze gupfa bane.

The East African yanditse ko igihugu cya Kenya ari cyo cyagujije amafaranga menshi mu bihugu bitandatu bigize EAC kuko cyagurijwe miliyari 1.5 z’amadolari, kuva iki cyorezo cyahagera tariki 13 Werurwe uyu mwaka.

Uganda iza ku mwanya wa kabiri n’amadolari 540.2, naho u Rwanda rwagujije miliyoni 223.65 z’amadolari.

Perezida wa Tanzania, John Magufuli we aherutse kuvuga ko imyenda yose iva mu mahanga ihagarikwa.

Iki gihugu kimwe n’u Burundi ndetse na Sudani y’Epfo, ntibiratangaza amafaranga byagurijwe muri ibi bihe.

Ibi bihugu ngo byagurijwe uyu mwenda mu gihe hari undi mwenda ungana na miliyari 110 z’amadorali, ibi bihugu byari bisanzwe bifite mbere y’iki cyorezo.

Umusesenguzi mu by’ubukungu muri Kenya, Nikhil Hira, avuga ko “Ingaruka z’izi nguzanyo nshya ku bukungu zigiye kuba nyinshi, ibyo ibihugu bivana mu byo byohereza mu mahanga bigiye kugirwaho ingaruka, amafaranga y’imbere mu bihugu azagirwaho ingaruka kandi mu mu gihe yaba ataye agaciro, wa mwenda w’amafaranga y’amahanga usanzwe ari na mwinshi ukaba uhenze mu mafaranga yacu, icyo ni ikibazo gikomeye.”

Ubusanzwe amasezerano y’ibi bihugu ngo avuga ko umwenda bifata, ugomba kutarenza 50% by’umusaruro mbumbe wabyo.

Kugeza ubu Uganda yasabye inguzanyo ya miliyoni 491.5 avuye muri IMF, miliyoni 32 mu Muryango w’Ubumwe bw’Ibihugu by’u Burayi, miliyoni 14.2 yavuye muri USAID na miliyoni 2.1 yavuye muri Denmark.

Banki Nkuru ya Uganda ivuga ko iki gihugu gishobora kuzahura n’ibibazo mu kwishyura uyu mwenda, kubera ko amafaranga menshi kirimo kuyakoresha mu guhangana n’icyorezo cya Coronavirus.

Ibi bihugu ngo nibitangira kwishyura imyenda, bizisanga biyivana mu mafaranga byakagombye kuba bikoresha indi mishinga, kuko ayo birimo kuguza arimo gukoreshwa gusa mu buryo bwo guhangana n’icyorezo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .