00:00:00 IGIHE NETWORK KN KINYARWANDA EN ENGLISH FR FRANCAIS

Mozambique yahakanye ko hari abaturage bishwe baciwe imitwe n’abarwanyi ba Kiyisilamu

Yanditswe na IGIHE
Kuya 12 Ugushyingo 2020 saa 07:39
Yasuwe :
0 0

Leta ya Mozambique yahakanye amakuru yatangajwe ko hari abaturage benshi bishwe baciwe imitwe n’abarwanyi begamiye ku Mutwe w’Iterabwoba w’Aba-Jihadist mu Majyaruguru y’Intara ya Cabo Delgado.

Guverineri wa Cabo Delgado, Valige Tauabo, yavuze ko nta bwicanyi buheruka kubera mu turere tw’intara abereye umuyobozi.

Yasobanuye ko ubwicanyi buheruka gutangazwa bwakozwe n’abarwanyi bagendera ku matwara y’idini ya Islam bwabaye ku wa 6 Mata 2020.

Itangazamakuru rya Leta ku wa Kabiri ryatangaje ko muri aka karere ngo umutwe w’iterabwoba wafashe ikibuga cy’umupira w’amaguru kiri mu gace ka Muatide ugihindura indiri y’ubwicanyi.

Abaturage bageragezaga guhunga bahitaga bajyanwa muri iki kibuga akaba ariho bicirwa baciwe imitwe n’ibindi bice by’umubiri bigizwemo uruhare n’aba barwanyi bivugwa ko bakorana bya hafi n’Umutwe w’Iterabwoba wa Islamic State (IS).

Abaturage baganiriye n’Ibiro Ntaramakuru bya Mozambique bavuze ko abo barwanyi ngo bicaga abantu, bavuga amagambo ari mu ijwi rirenga bati “Allah Akbar” bishatse kuvuga ko ‘Imana ni nkuru’, babarasamo amasasu ndetse banatwika inzu bagabyeho igitero mu gace ka Nanjaba mu ijoro ryo ku wa Gatanu.

Guverineri Tauabo we yavuze ko icyabaye ari abagizi ba nabi bateye abaturage ariko bahise bakurikiranwa n’igisirikare.

Yashimangiye ko Guverinoma ya Mozambique ihangayikishijwe n’ubugizi bwa nabi bubera mu Ntara ya Cabo Delgado.

Imiryango iharanira uburenganzira bwa muntu itunga agatoki ingabo za leta kugira uruhare mu bikorwa bihonyora uburenganzira bw’ikiremwamuntu birimo itabwa muri yombi rya hato na hato, iyicarubozo n’ubwicanyi bukorwa mu gihe cyo guhosha imvururu.

Abantu babarirwa mu 2000 barishwe mu gihe abandi 430.000 bavuye mu byabo kuva uyu mutwe w’iterabwoba watangira ibikorwa byawo mu myaka irenga itatu ishize.

Abaturage benshi bo mu Ntara ya Cabo Delgado muri Mozambique bavuye mu byabo kubera ubwicanyi bakorerwa n'abarwanyi bagendera ku matwara y’idini ya Islam/ Ifoto: BBC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .