00:00:00 IGIHE NETWORK KN KINYARWANDA EN ENGLISH FR FRANCAIS

Mozambique: Minisitiri w’Umutekano yasuye ingabo z’u Rwanda i Cabo Delgado

Yanditswe na IGIHE
Kuya 12 June 2022 saa 04:18
Yasuwe :

Minisitiri w’Umutekano muri Mozambique, Arsénia Felicidade Félix Massingue ari kumwe n’Umuyobozi Mukuru wa Polisi y’iki gihugu, Bernardino Rafael basuye ingabo n’abapolisi b’u Rwanda bari mu butumwa bwo kurwanya iterabwoba mu Ntara ya Cabo Delgado.

Uru ruzinduko aba bashyitsi bagiriye muri Cabo Delgado rwibanze ku gusura ibice bitandukanye birimo Mocimboa da Praia na Palma, ahakambitse ingabo z’u Rwanda zagiye kurwanya umutwe w’iterabwoba wari umaze igihe uteza umutekano muke muri iyi Ntara iri mu majyaruguru ya Mozambique.

Iyi gahunda yo gusura ingabo z’u Rwanda ziri muri Cabo Delgado ya Minisitiri w’umutekano ije n’ubundi nyuma y’iminsi mike umuyobozi wa Polisi y’iki gihugu, Bernardino Rafael azisuye.

Zagiye zisurwa kandi n’abandi bayobozi batandukanye barimo Guverineri wa Cabo Delgado, Valige Tauabo ndetse na Perezida wa Mozambique, Filipe Jacinto Nyusi wazisuye muri Mutarama 2022.

Icyo gihe yazishimiye imirimo myiza zimaze gukora kuva zagera muri iki gihugu kurwanya imitwe y’iterabwoba, anazishishikariza gukomeza ibikorwa bya gisirikare hirya no hino.

Yashimye ubufatanye bw’ingabo muri uru rugamba, asaba ko uwo mutima wo gukorera hamwe bawukomeza kugira ngo babashe guhashya ibyo byihebe.

U Rwanda rwohereje abasirikare n’abapolisi muri Mozambique muri Nyakanga umwaka ushize, mu bikorwa byo kurwanya umutwe wa Al Sunnah wa Jama’ah ugendera ku mahame akaze yitirirwa idini ya Islam.

Ni umutwe wakoze ubwicanyi no gutwika ingo z’abaturage, ku buryo benshi bavuye mu byabo.

Kuva Ingabo z’u Rwanda zajya muri icyo gihugu ubuzima bugenda bugaruka, ku buryo abaturage basubiye mu byabo ndetse abana basubira mu mashuri.

Minisitiri w’Umutekano muri Mozambique, Arsénia Felicidade Félix Massingue ubwo yakirwaga n'Ingabo z'u Rwanda ziri i Cabo Delgado
Minisitiri Arsénia Felicidade Félix Massingue yanabonanye n'Abapolisi b'u Rwanda
Minisitiri w’Umutekano muri Mozambique, Arsénia Felicidade Félix Massingue yeretswe ibikorwa by'Ingabo z'u Rwanda muri Cabo Delgado

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .