Minembwe: Umutwe w’ingabo wa Col Makanika wabereye ibamba abakorera ubwicanyi Abanyamulenge

Yanditswe na Bukuru JC
Kuya 27 Ukwakira 2020 saa 05:56
Yasuwe :
0 0

Umutwe wa Twirwaneho ugamije kurinda Abanyamulenge ibitero by’imitwe yitwaje intwaro n’abatabashaka mu gace ka Minembwe mu Burasirazuba bwa Repubulika Iharanira Demokarasi ya Congo, ukomeje kubera ibamba abagaba ibitero bigamije gusahura no kwica Abanyamulenge batuye muri ako gace.

Tariki 20 Ukwakira bivugwa ko habaye imirwano ikomeye hagati y’uwo mutwe uyobowe na Colonel Rukunda Michel uzwi nka Makanika watorotse igisirikare cya Congo, ndetse n’umutwe wa Maï Maï Biloze Bishamboke washakaga kwica no gusahura.

RFI yatangaje ko iyo mirwano yaguyemo abantu bari hagati ya 10 na 20. Inzu z’abaturage zaratwitswe ndetse imitungo irasahurwa.

Makanika yatangaje ko binjiye muri icyo gitero birwanaho, kugira ngo bahagarike igitero Abanyamulenge bari bagabweho n’uwo mutwe wa Maï Maï Biloze Bishamboke.

Yagize ati “Igisirikare cya Congo cyananiwe kuzuza inshingano zacyo zo kurinda abaturage. Gifatanya n’abo bagizi ba nabi ba Maï Maï bagamije kwirukana Abanyamulenge, kubica no kubasahura imitungo yabo. Nta na rimwe nigeze nshyigikira ibibera iwacu, niyo mpamvu navuye mu gisirikare cya Leta.”

Umuvugizi w’igisirikare cya Leta muri Kivu y’Amajyepfo, Capitaine Dieudonné Kasereka, yavuze ko Makanika yatorotse igisirikare akajya kwifatanya n’imitwe yitwaje intwaro bityo ko bamufata nk’inyeshyamba.

Makanika avuga ko yavuye mu gisirikare cya Congo nyuma yo kubona ntacyo gikora ngo kirengere abaturage bo mu bwoko bwe bw’Abanyamulenge, bumaze imyaka myinshi bugirirwa nabi n’imitwe yitwaje intwaro ndetse bikavugwa ko na bamwe mu gisirikare cya Congo babigiramo uruhare.

Imyaka ikomeje kuba myinshi Abanyamulenge bo muri RDC bakorerwa ubwicanyi ndengakamere. Ababikurikiranira hafi babona ubwo bwicanyi nka Jenoside, ariko ntiyitwa yo byeruye kuko hatagaragara uruhare rutaziguye rwa Leta mu mahano arimo kuba.

Kuva mu myaka y’umwaduko w’abakoloni, Abanyamulenge bakomeje kuvutswa uburenganzira ku gihugu cyabo, harimo n’uburenganzira bwo kubaho. Ubwicanyi butaziguye bwatangiye kubakorerwa muri za 1964 mu gihe cy’intambara izwi nk’iya Mulele. Nyuma y’agahenge k’imyaka itari mike, ubu bwicanyi bwaje gukomeza mu myaka ya 1996, 1997na 1998.

Guhera muri Mata 2017, ubu bwicanyi bwafashe indi ntera. Kuva icyo gihe, imitwe yitwaje intwaro ya Mai-Mai ifatanyije cyane cyane na Red Tabara na FNL PALIPEHUTU yo mu Burundi, yavuye mu bice bitandukanye byiganjemo ibyo mu ntara ya Kivu y’Amajyepfo nka Lemera, Rurambo, Itombwe, Swima, Uvira, Sange, Lulenge n’ahandi, mu buryo bigaragara ko bwateguwe neza, batangira kwica abantu, gutwika inzu, kunyaga amatungo no kumenesha abo batabashije kwica.

Imibare y’agateganyo igaragaza ko kuva muri Mata 2017 kugeza muri Kamena 2020 abasivile barenga 400 b’Abanyamulenge bari bamaze kwicwa, imidugudu irenga 300 imaze gutwikwa no gusenyuka burundu, inka zirenga 240,000 zimaze gusahurwa, ibigo by’amashuri 147 ndetse n’ibigo nderabuzima 57 byaratwitswe, birasenywa cyangwa birasahurwa.

Inzu z'abaturage b'Abanyamulenge zaratwitswe ndetse imitungo yabo irasahurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .