00:00:00 IGIHE NETWORK KN KINYARWANDA EN ENGLISH FR FRANCAIS

Maroc yabaye igihugu cya mbere muri Afurika gihaye intwaro Ukraine, Uganda igiye gutangira gucukura peteroli: Amakuru y’ingenzi ku mugabane

Yanditswe na IGIHE
Kuya 24 Mutarama 2023 saa 12:18
Yasuwe :

Igisirikare cya Maroc cyohereje imodoka 20 z’intambara muri Ukraine zivuye muri Tchèque aho zari zimaze iminsi zitunganyirizwa.

Izo modoka zatunganyijwe na Sosiyete Excalibur y’Igisirikare cya Ukraine ikorera mu Mujyi wa Sternbeck.

Izo modoka zari zarashaje hanyuma Maroc izohereza muri Tchèque kugira ngo zitunganywe neza bundi bushya mbere yo koherezwa muri Ukraine. Ku wa 9 Mutarama, Minisitiri w’Intebe wa Tchèque yagaragaye ari gusura ibi bifaru byari bishaje aho byari biri gusanirwa.

Byose byari biri mu mabara ajya gusa n’umucanga n’ubundi aranga ibikoresho bya gisirikare bya Maroc.

Igisirikare cya Maroc cyari cyarigeze kugura intwaro nshya z’intambara zo mu bwoko bwa 148 T-72s, 136 T-72Bs na 12 T-72BK. Icyo gihe cyaziguze muri Belarus mu byiciro bibiri hagati ya 1999 na 2000.

Umwanzuro wo kohereza ibikoresho bya gisirikare muri Ukraine, Maroc yawufashe muri Mata 2022.

Maroc yabaye igihugu cya mbere cyo muri Afurika cyohereje intwaro muri Ukraine

RDC: Abantu 23 baguye mu gitero cy’iterabwoba

Inyeshyamba za ADF zifite inkomoko muri Uganda, zishe abantu bagera kuri 23 mu gitero zagabye mu Burasirazuba bwa Repubulika Iharanira Demokarasi ya Congo nk’uko byatangajwe n’ubuyobozi muri uyu wa Mbere.

Iki gitero cyabaye mu ijoro ryo ku Cyumweru ahitwa Makugwe, Beni mu Ntara ya KIvu y’Amajyaruguru nk’uko byatangajwe n’umuyobozi muri sosiyete sivile, Roger Wangeve wanavuze ko abapfuye ari 24.

Yagize ati “ADF yatunguye abantu 17 mu kabari barimo banyweramo irabica.”

Wangeve yongeyeho ko aba barwanyi basahuye ingo n’amaduka muri ako gace bagatwara abantu benshi mu ishyamba.

Umuyobozi wungirije w’intara, Saidi Balikwisha, yavuze ko abantu 23 ari bo bishwe abandi batatu bakaburirwa irengero.

Ibiro Ntaramakuru by’Abafaransa, AFP, ntibyashoboye kugenzura neza umubare w’abishwe.

Colonel Charles Omeonga wo mu buyobozi bw’ingabo muri teritwari ya Beni, yabwiye AFP ko inyeshyamba za ADF zari zihishe mu baturage kandi ko zari zikiri gushakishwa.

ADF ni umwe mu mitwe yitwaje intwaro ikorera mu Burasirazuba bwa Congo ihitana abantu benshi mu myaka myinshi ishize ukorera muri iki gihugu.

Islamic State ifata uyu mutwe nk’ishami ryawo muri Afurika yo Hagati. Ushinjwa kwica abantu babarirwa mu bihumbi by’Abanye-Congo b’abasivile no kugaba ibitero muri Uganda.

Afurika y’Epfo yakiriye Minisitiri w’Ububanyi n’Amahanga w’u Burusiya ititaye ku kunengwa

Afurika y’Epfo yashimangiye ko ifitanye umubano mwiza ndetse n’ubufatanye mu by’imyitozo ya gisirikare n’u Burusiya muri iki gihe yakiriye Minisitiri w’Ububanyi n’Amahanga w’iki gihugu, Sergey Lavrov, mu ruzinduko rwe rwa mbere kuva aho intambara yo muri Ukraine yatangiriye.

Lavrov yatangaje ko yashimye ko Afurika y’Epfo yifashe uhereye igihe intambara muri Ukraine yatangiriye.

Yagize ati “Birazwi neza twemeye igitekerezo cya Ukraine cyo guhurira mu biganiro mu ntangiriro z’ibikorwa bidasanzwe bya gisirikare…birazwi neza ko Amerika n’u Bwongereza hamwe n’ibindi bihugu by’i Burayi byabwiye Ukraine ko hakiri kare kwinjira mu mishyikirano.”

U Burusiya bwakunze kwamagana ubusabe bwa Ukraine n’ibindi bihugu byo mu burengerazuba bwo gukura ingabo mu buryo bwa burundu ku butaka bwa Ukraine kugira ngo imishyikirano ishoboke.

Lavrov kandi yahakanye ko u Burusiya butibasira abasivile nubwo hari ibitero byafashe inzu zituwemo muri Ukraine, ibyo inzobere zivuga ko ari ibyaha by’intambara.

Minisitiri w’Ububanyi n’Amahanga n’Ubutwererane wa Afurika y’Epfo, Naledi Pandor, yavuze ko Pretoria yifuza ko haboneka ibisubizo binyuze mu biganiro.

Afurika y’Epfo iri kwakira ingabo z’Abarusiya n’Abashinwa mu myitozo izabera muri iki gihugu muri Gashyantare uyu mwaka.

Pandor yavuze ko ibihugu byose bikorana imyitozo ya gisirikare n’inshuti zabyo. Nubwo yashyizweho igitutu na Leta Zunze Ubumwe za Amerika, Afurika y’Epfo yanze kwiyunga na Washington mu kwamagana u Burusiya ku bw’intambara bwagabye muri Ukraine.

Papa Francis azaba agenzwa n’iki muri RDC?

Ubutumwa bwa Papa Francis buzaba bureba abayobozi mu nzego zitandukanye zaba iza leta, sosiyete sivile na opozisiyo kubera ko bose hamwe bagomba gufatanya kubaka Congo nziza, itarangwamo akarengane kandi iteye imbere.

Ibi ni ibyatangajwe na musenyeri Ettore Balestrero mu kiganiro yagiranye na Radio Okapi kuri uyu wa Mbere tariki 23 Mutarama 2023.

Musenyeri Ettore Balestrero, yavuze ko uruzinduko rwa Papa Francis muri Repubulika Iharanira Demokarasi ya Congo, ruzaba rugamije gukangurira abenegihugu guhindura icyerekezo bakiyunga hagati yabo.

Yavuze ko icyo asaba Abanye-Congo ari ukudaheranwa n’amateka ahubwo bakemera ko bishoboka gushyira mu bikorwa ubutumwa azabagezaho.

Ati “ Nizeye ko ubutumwa buzaba burimo ibyo kwamagana imvururu zose zikorwa no gusaba imbabazi ku zikomeje kuba muri iki gihe.”

“Nizeye ko kandi ari umusanzu ku bikorwa byatangiye mu Burasirazuba kugira ngo imyanzuro yafashwe ibashe gushyirwa mu bikorwa, tubashe kugera ku mahoro, guhagarika amagambo abiba urwango acamo ibice abaturage.”

Papa Francis ategerejwe muri Repubulika Iharanira Demokarasi ya Congo ku wa 31 Nyakanga i Kinshasa.

Uganda igiye gutangiza porogaramu y’ubucukuzi bwa peteroli

Kuri uyu wa Kabiri, Uganda iratangiza ku mugaragaro ibikorwa by’ubucukuzi bwa peteroli nk’uko byatangajwe n’urwego rubishinzwe rwavuze ko ari intambwe ikomeye iganisha ku ntego y’uko igihugu kizaba gifite peteroli yacyo mu 2025.

Iki gihugu cyatahuye ko gifite peteroli mu myaka 20 ishize ariko ibikorwa byo kuyicukura bikomeza kudindira kubera ko nta bikorwaremezo byabugenewe cyari gifite.

Mu butumwa urwego rushinzwe ibya peteroli rwashyize ahagaragara binyuze kuri Twitter, rwavuze ko kuri uyu wa Kabiri ari bwo haterwa intambwe izatuma igihugu kibona peteroli ya mbere.

Biteganyijwe ko Perezida Museveni ari we uza kuyobora ibikorwa byo gutangiza porogaramu y’ubucukuzi bwa peteroli mu gace ka Kingfisher gaherereye mu majyepfo y’ikiyaga cya Albert mu Burengerazuba bw’igihugu ahari umushinga wa sosiyete y’Abashinwa yitwa CNOOC.

Umushinga wa kabiri uherereye mu majyaruguru y’ikiyaga cya Albert ukaba uri mu biganza bya sosiyete y’Abafaransa, TotalEnergies.

Uganda iteganya ko izajya icukura utugunguru ibihumbi 230 twa peteroli ku munsi.

Tanzania: Kaminuza yitiriwe Nyerere imaze imyaka 13 itagira abanyeshuri

Kaminuza y’Ubuhinzi n’Ikoranabuhanga yitiriwe Mwalimu Nyerere, iherereye mu Karere ka Butiama imaze imyaka 13 yarabuze abanyeshuri bayigamo.

Iyi kaminuza ifite abarimu n’umuyobozi wayo ariko nta munyeshuri n’umwe wigeze ayiyandikishamo kuva mu 2010 nk’uko byagaragajwe na komisiyo ishinzwe imibereho myiza n’iterambere ry’abaturage ubwo yayisuraga.

Inkuru ya The Citizen ivuga ko abagize iyi komisiyo batunguwe abandi bababazwa n’uburyo iri shuri rikuru ryangiritse.

Husna Sekiboko umwe mu bagize komisiyo yagize ati “Muyobozi wa kaminuza n’abakozi bawe, tubagiriye impuhwe. Mwashyizwe muri iri shuri nta banyeshuri! Iri ni iyicarubozo mwakorewe.”

Salome Makamba we yavuze ko ibyo byateye leta kugwa mu gihombo gikomeye kuko uwoherejwe kuba umuyobozi w’ishuri yagiye mu kiruhuko cy’izabukuru nta kintu na kimwe arakora.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .