Mali: Abaturage bakoraniye mu murwa mukuru Bamako babyina intsinzi

Yanditswe na Mutangana Gaspard
Kuya 22 Kanama 2020 saa 11:08
Yasuwe :
0 0

Ibihumbi by’abantu baraye bahuriye mu mihanda yo mu murwa mukuru Bamako muri Mali bishimira ihirikwa ku butegetsi rya Ibrahim Boubacar Keïta.

Bateraniye mu gace k’i Bamako kitiriwe ubwigenge, bavuza za vuvuzela, benshi bavuga ko ari intsinzi yabo, bibaka ugutsindwa kwa Keita, wafashwe kuwa Kabiri agafungwa ndetse agahita yegura.

Ubwo abaturage babyinaga intsinzi, umwe mu bashyigikiye bakanatera inkunga ihirikwa rya Keïta witwa Marriam Cissé, yatangarije ibiro ntaramakuru by’Abafaransa ko baje kwishimira ihirikwa rya Keïta.

Yagize ati “Ubu ibyishimo byandenze. Twageze ku ntsinzi. Twaje hano gushimira Abanyamali bose no kwishimira intsinzi yacu”.

Umwe mu bahoze mu ngabo za Mali, Ousmane Diallo, yavuze ko ari intsinzi ku baturage, ariko anabwira abasirikare ko badakwiye kugundira ubutegetsi.

Muri 2018 ni bwo Keïta yatsinze icyiciro cya kabiri cy’amatora yongera kuba Perezida wa Mali muri manda ya kabiri. Yatangiye kuyobora Mali mu 2013.

Keïta abenshi bavugaga ko yari yarabaye ikibazo. Bamushinja kurangwa n’imyitwarire mibi kuva yagera ku butegetsi, mu mwaka wa 2018, ari n’abyo byatumye abaturage batangira kwigabiza imihanda muri Kamena 2018 bamagana ubutegetsi bwa Keïta, aho bamushinja imyitwarire mibi irimo ruswa, gukoresha umutungo w’igihugu nabi no gukora ibinyuranye n’amategeko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .