Madagascar yavugaga ko ifite umuti wa Covid-19 yatangiye gutabaza

Yanditswe na Iradukunda Serge
Kuya 23 Nyakanga 2020 saa 03:30
Yasuwe :
0 0

Madagascar yakunze kumvikana ivuga ko ifite umuti gakondo uvura icyorezo cya Covid-19, yatangiye gutabaza isaba ibikoresho byo kwirinda no gupima iki cyorezo, ndetse abaganga batangira kuvuga ko ibitaro byatangiye kuzura abarwayi.

Uyu muti uzwi nka Covid-Organics wakozwe na Malagasy Institute of Applied Research (IMRA) ndetse perezida w’iki gihugu Andry Rajoelina agaragaza kuwushyigikira bidasanzwe avuga ko uvura koko, ndetse akawutanga nk’impano ku bindi bihugu byibasiwe na Covid-19.

Ishami ry’umuryango w’Abibumbye ryita ku buzima,OMS ryagiye rigaragaza ko ridashyigikiye iby’uyu muti, nyamara Andry Rajoelina akavuga ko impamvu umuti uyu muti wabo ukomejwe kwamaganwa ko ari uko uturuka muri Afurika.

Uko iminsi ishira bigenda bigaragara ko ubushobozi bw’uyu muti mu kuvura Covid-19 muti busa nk’aho ari ntabwo, kuko muri iki gihugu hamaze kwandura abarenga ibihumbi umunani barimwo 614 banduye umunsi umwe mu gihe abamaze kwitaba Imana bazize iki cyorezo bagera kuri 69.

Kuba ubushobozi bwa Madagascar butangiwe kurengwa n’iki cyorezo bigaragazwa n’ibaruwa ifunguye yo ku wa 20 Nyakanga, Minisitiri w’ubuzima muri iki gihugu yandikiye imiryango nterankunga ayisaba ibikoresho byifashishwa mu kwirinda Covid-19 birimo udukoresho dupima, imashini zifasha abarwayi guhumeka ndetse n’ibikoresho bipfuka abaganga kugira ngo batandura.

Uretse iki kibazo cy’ibikoresho bike cyatangajwe na Minisitiri w’ubuzima muri iki gihugu, umuyobozi w’ibitaro bya Andohotapenaka biri mu murwa mukuru Antananarivo, Nasolotsiry Raveloson yavuze ko ibitanda byatangiye gushira mu bitaro byo hirya no hino muri iki gihugu, ibintu biri gutuma “kuri ubu hakirwa abarwayi barembye gusa”

Uretse Raveloson hari n’abandi bayobozi b’ibitaro babiri babwiye BBC ko ibitaro bayoboye nabyo bifite iki kibazo nk’icya Andohotapenaka Hospital.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .