00:00:00 IGIHE NETWORK KN KINYARWANDA EN ENGLISH FR FRANCAIS

M23 yemeye guhagarika imirwano, isaba guhura na Perezida Lourenço na Kenyatta

Yanditswe na Musangwa Arthur
Kuya 25 Ugushyingo 2022 saa 07:36
Yasuwe :

Umutwe wa M23 wemeye guhagarika imirwano, ariko usaba guhura n’abahuza mu bibazo byo gushakira amahoro uburasirazuba bwa Repubulika Iharanira Demokarasi ya Congo barimo Perezida wa Angola, João Lourenço na Uhuru Kenyatta wabaye perezida wa Kenya.

Ni itangazo uyu mutwe wasohoye mbere y’isaha ya 18h00 zo kuri uyu wa Gatanu, wahawe kugira ngo uhagarike imirwano.

Uwo mwanzuro wafashwe n’Inama yabaye ku wa Gatatu, yahuje Perezida João Lourenço wa Angola, Evariste Ndayishimiye w’u Burundi na Felix Antoine Tshisekedi wa RDC, Minisitiri w’Ububanyi n’Amahanga w’u Rwanda, Dr Vincent Biruta na Uhuru Kenyatta wahoze ari perezida Kenya, bahuriye i Luanda mu biganiro byamaze amasaha atandatu.

Umwanzuro wa mbere wafashwe ni "uguhagarika imirwano muri rusange, by’umwihariko ibitero bya M23 kuri FARDC na MONUSCO, guhera ku wa 25 Ugushyingo 2022, saa 18:00."

Nyuma yo guhagarika imirwano, uyu mutwe wasabwe "kuva mu duce umaze gufata, ugasubira mu bice wahoranye mbere hashingiwe ku myanzuro y’inama y’abagaba bakuru b’ingabo za EAC, yabereye i Bujumbura mu Burundi ku wa 8 Ugushyingo 2022."

Ibirindiro bivugwa ni muri Sabyinyo ku ruhande rwa RDC, aho M23 itagomba kurenga umurongo unyura ku duce twa Bigega, Bugusa, Nyabikona, Mbuzi, Rutsiro na Nkokwe.

Mbere y’uko isaha yahawe igera, Perezida wa M23, Bertrand Bisimwa, yasohoye itangazo, avuga ko bemeye guhagarika imirwano.

Yavuze ko bafite ubushake bwo guhagarika imirwano, kuko icyo cyemezo bigeze no kugifata batabivuganyeho na Leta ya Congo, ku wa 1 Mata 2022.

Nyuma, ku wa 10 Mata 2022 i Entebbe muri Uganda, impande zombi ngo zaje kumvikana guhagarika imirwano, ariko ngo ntibyubahirizwa na Guverinoma ya RDC n’ihuriro barimo gukorana rya FARDC, FDLR, Nyatura, ACPLS, CODECO na Mai Mai.

Bisimwa yakomeje ati "Nanone, M23 yemeye guhagarika imirwano nk’uko byasabwe n’abakuru b’ibihugu, ariko irasaba Guverinoma ya RDC kubahiriza ako gahenge, bitabaye ibyo, M23 ifite uburenganzira bwuzuye bwo kwirwanaho no kurinda abasivili ibikorwa byose byarenga kuri uko guhagarika imirwano kwemeranyijweho."

Uretse kwemera ibiganiro, M23 yatangaje ko “isaba” inama n’umuhuza mu biganiro (médiateur) byo gushakira amahoro uburasirazuba bwa RDC, Perezida João Manuel Gonçalves Lourenço, n’umufasha mu biganiro bihuza abanye-Congo (facilitateur), Uhuru Kenyatta.

Yavuze ko ari ukugira ngo "haganirwe ku mpungenge zayo mu buryo bugamije kubaka amahoro arambye mu gihugu cyacu."

Mu biganiro bimaze iminsi nk’uko byakomeje kugenda, M23 ntiyigeze ihagararirwa mu biganiro by’i Luanda, ku buryo ibyemezo byafashwe bishyigikiwe na Leta ya Congo gusa.

Ibyo byakomeje kongera urujijo ku gaciro M23 ishobora guha iyi myanzuro ikayishyira mu bikorwa mu gihe cyihawe, kuko yafashwe n’uruhande rumwe mu bashyamiranye.

Ni mu gihe M23 yubuye intwaro ifite ibyo irwanira ko byubahirizwa, none ikaba isabwa kuva mu duce yafashe ku mbaraga z’amasasu.

Mu kwisobanura, Umuvugizi wa Guverinoma ya RDC, Patrick Muyaya, aheruka kubwira France 24 ati "Muzi ko M23 kuva mu ntagiriro z’ibitero byayo ihagarariwe n’u Rwanda, tuvuge ibintu uko bimeze, turizera ko kuri iyi nshuro ibyemezo byafashwe bikanashyirwa ku ngengabihe, bizubahirizwa kugira ngo amahoro abashe kugaruka kuri teritwari yose y’igihugu."

Umuvugizi wungirije wa Guverinoma y’u Rwanda, Alain Mukuralinda, yaje gusubiza ko u Rwanda atari umuvugizi wa M23, ko ahubwo izi nama zigaragaza ugutsindwa kwa Leta ya Congo mu gukemura ibibazo byayo.

Leta ya Congo yakomeje kwirinda kwegera M23, ndetse yavuze kenshi ko idashobora kuganira n’umutwe w’iterabwoba, nyuma ivuga ko baganira ari uko ubanje kurekura uduce twose wafashe.

Ibyo byakomeje kubangamira igisubizo cya politiki gifatwa na benshi nk’icyahosha iyi ntambara burundu, kurusha inzira y’intambara.

Uyu mutwe kandi watangaje ko wamagana Jenoside irimo gutegurwa muri RDC bigizwemo uruhare na Guverinoma n’abambari bayo, ishimangira ko "itazarebera ubwicanyi bukorerwa abanye-Congo."

Uyu mutwe washimangiye ko ushyize imbere ibiganiro na Guverinoma ya Congo, nk’uburyo bwafasha mu guhagarika ibibazo by’umutekano muke biri muri Congo.

Nubwo uyu mutwe wemeye guhagarika imirwano, uheruka kuvuga ko ibyo gusubira inyuma ukava mu duce wari wafashe, byo utabikozwa.

Ubuyobozi bwa M23 bwemeye guhagarika imirwano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .