00:00:00 IGIHE NETWORK KN KINYARWANDA EN ENGLISH FR FRANCAIS

M23 yatabaje amahanga kuri ’Jenoside ikomeje gukorwa muri RDC’

Yanditswe na IGIHE
Kuya 8 Ukuboza 2022 saa 08:50
Yasuwe :

Umutwe w’abarwanyi wa M23 wasabye imiryango mpuzamahanga itandukanye guhaguruka vuba na bwangu ikagira icyo ikora mu guhagarika Jenoside irimo gukorwa na Guverinoma ya Repubulika Iharanira Demokarasi ya Congo n’imitwe bafatanyije ya FDLR, Nyatura, APCLS na Mai-Mai.

Itangazo ryasohowe n’umutwe wa M23, kuri uyu wa Gatatu, wamaganye wivuye inyuma Jenoside irimo gukorwa n’ingabo za Leta ya Congo ifatanyije n’imitwe irimo FDLR igizwe n’abasize bakoze Jenoside yakorewe Abatutsi mu Rwanda mu 1994.

Iri tangazo rije mu gihe ubugizi bwa nabi bukomeje gufata indi ntera cyane cyane mu Burasirazuba bwa RDC, by’umwihariko guhera ubwo umutwe wa M23 wuburaga imirwano n’igisirikare cy’icyo gihug, FARDC.

Guhera mu ntangiriro z’uyu mwaka, muri RDC hari imvugo n’ibikorwa byibasiye abasivile bavuga Ikinyarwanda, aho bamwe bicwa urubozo, bakabwirwa amagambo abakomeretse n’ibindi bashinjwa kuba ibyitso bya M23.

Kuwa Gatatu tariki 6 Ukuboza 2022, igisirikare cya Congo n’abo bafatanyije bagabye igitero ku birindiro bya M23 ahitwa Bwiza no mu bice bihakikije, ibi bikaba binyuranye cyane n’icyemezo cyo guhagarika imirwano.

Muri ibyo bitero, M23 yagaragaje ko FARDC n’abo bafatanyije bakomeje kwica abasivili b’inzirakarengane, gusenya inzu zabo, kwiba no kwica inka zabo. Ni ibitero kandi byakomerekeyemo abasivili benshi abandi bava mu byabo.

Ubu bwicanyi bwibasiye Abatutsi n’abandi bakomeje kwamagana ingengabitekerezo ya Jenoside y’ihuriro rya FARDC, FDLR n’abandi bafatanya, mu gihe umuryango mpuzamahanga n’igihugu bakomeje kuryumaho.

Itangazo rya M23 rigira riti “Bitugarura mu bihe byabanjirije Jenoside yakorewe Abatutsi mu Rwanda mu 1994, yakozwe n’umwe mu bafatanyabikorwa b’imena ba Guverinoma ya Kinshasa, Perezida Tshisekedi aherutse kwerura ko amushyigikiye”.

M23 kandi yasabye Akanama ka Loni gashinzwe umutekano, Umuryango wa Afurika yunze Ubumwe, Umuryango wa Afurika y’Iburasirazuba, ICGRL, SADC n’umuryango w’Ubumwe bw’u Burayi, kugira icyo bakora ako kanya mu guhagarika Jenoside irimo gukorwa na Guverinoma ya Congo n’abo bafatanyije”.

M23 yanasabye imiryango mpuzamahanga itabara abantu kugira icyo ikora igafasha imiryango ikomeje kuva mu byayo aho kugeza ubu habarurwa irenga 5000 yahungiye mu bice bigenzurwa n’uyu mutwe.

Abarwanyi ba M23 bemeje ko batazigera bahagarara ngo barebere abaturage b’abasivili bicwa ahubwo yiteguye kugira icyo ikora mu guhagarika ubwo bwicanyi ndengakamere.

Umuryango w’Abibumbye uherutse gutanga impuruza ku bimenyetso biganisha kuri Jenoside biri gututumba muri Repubulika Iharanira Demokarasi ya Congo (RDC), ku buryo hatagize igikorwa amateka ashobore kwisubiramo.

Ni ubutumwa bwanyuze mu itangazo ryashyizwe hanze n’Intumwa idasanzwe y’Umunyamabanga Mukuru w’Umuryango w’Abibumbye, ishinzwe ibyo gukumira Jenoside, Alice Wairimu Nderitu, nyuma yo kugirira uruzinduko muri iki gihugu kuva ku bwa 10 kugeza ku wa 13 Ugushyingo 2022.

Wairimu yavuze ko yatewe impungenge n’uburyo imvururu mu Karere k’Ibiyaga Bigari zirushaho gufata indi ntera, mu gihe aka karere ari ko kabereyemo Jenoside yakorewe Abatutsi mu 1994, mu Rwanda.

Mu itangazo yashyize ahagaragara kuri uyu wa 30 Ugushyingo, yagize ati "Imvururu zihari ubu ni ikimenyetso cy’uko sosiyete ifite intege nke; ni icyerekana ko hakiri uburyo butuma urwango rwavuyemo Jenoside mu bihe byashize rukomeza guhererekanwa."


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .