00:00:00 IGIHE NETWORK KN KINYARWANDA EN ENGLISH FR FRANCAIS

M23 yashinje ubutegetsi bwa Tshisekedi kutifuza amahoro mu burasirazuba bwa RDC

Yanditswe na IGIHE
Kuya 24 Mutarama 2023 saa 09:58
Yasuwe :

Umutwe wa M23 watangaje ko Guverinoma ya Congo irimo gushyiraho amananiza mu ishyirwa mu bikorwa ry’imyanzuro y’inama ya Luanda na Nairobi, werekana ko bigamije kubangamira umugambi w’amahoro mu burasirazuba bwa RDC.

Kuva umwaka ushize umutwe wa M23 uri mu mirwano n’ingabo za FARDC, aho usaba guverinoma ya Congo kubahiriza amasezerano bagiranye. Ku rundi ruhande, ubutegetsi bwa Congo bukomeje gushinja u Rwanda gufasha uyu mutwe nubwo rudahwema kubitera utwatsi.

Kuwa 23 Ugushyingo 2022 nibwo i Luanda muri Angola habereye inama y’Abakuru b’Ibihugu yigaga ku bibazo by’umutekano muke mu Burasirazuba bwa RDC, yafashe imyanzuro ko inyeshyamba za M23 zigomba gushyira intwaro hasi mu maguru mashya.

Inyeshyamba za M23 zikava mu duce zafashe zigasubira mu birindiro byazo bya mbere mu gace ka Sabyinyo ku ruhande rwa RDC maze hagashyirwaho agace zitagomba kurenga bigizwemo uruhare n’ingabo za EAC, iza Monusco n’iza leta.

Inkunga mu bya politiki n’ibya gisirikare yahabwaga M23 ngo igomba guhagarara ndetse indi mitwe yitwaje intwaro yaba iy’imbere mu gihugu no hanze yacyo yakoreraga mu Burasirazuba bwa Repubulika Iharanira Demokarasi ya Congo na yo igahagarika ibikorwa.

Imitwe y’iterabwoba nka FDLR-FOCA, inyeshyamba za Red-Tabara, ADF n’indi yose ikorera ku butaka bwa RDC yasabwe gushyira intwaro hasi igatangira gusubira iwabo nk’uko byafashweho umwanzuro mu biganiro bya Nairobi.

Mu itangazo M23 yasohoye kuri uyu wa 23 Mutarama 2023, yagaragaje ko mu gihe irimo kwitegura gusubiza uduce twinshi yari yarigaruriye harimo n’utwo yamaze gutanga twa Kibumba na Rumangabo, Guverinoma ya Congo ikomeje ubufatanye n’imitwe itandukanye mu mirwano.

Ibi birakorwa nyuma yo gutegekwa n’umugaba mukuru w’ingabo za FARDC, mu ruzinduko yagiriye muri Kivu y’Amajyaruguru, aho yatanze intwaro n’ibikoresho ku barwanyi barimo FDLR akabategeka gutangira kugaba ibitero kuri M23.

M23 yatanze impuruza ku bufatanye bw’ingabo za leta n’imitwe yitwaje intwaro ikomeje kugaba ibitero ku birindiro byayo, ubwicanyi bukomeje kwibasira abaturage, ndetse na jenoside ikorerwa Abatutsi muri Masisi na Rutshuru.

Mu minsi mike nibwo byatangajwe ko RDC yitabaje abacanshuro bo mu Burayi, ndetse hakavugwa cyane ko ari abo mu Burusiya.

M23 yibukije ko Guverinoma ya Congo yabeshye ko abacancuro yazanye ari abo gutoza abasirikare ba FARDC, none ubu bakaba baroherejwe ku rugamba aho bafatanya n’ingabo za leta mu kurwanya M23.

M23 iti “Ibi birimo gukorwa birerekana ko Guverinoma ya RDC yatesheje agaciro imbaraga mpuzamahanga n’iz’akarere ziri gukoreshwa mu kugarura amahoro, bituma ibintu birushaho kuba bibi”.

M23 kandi yamaganye ubufasha Monusco iri guha FARDC burimo Drones z’ubugenzuzi kandi izi neza ko FARDC ifatanyije na FDLR n’indi mitwe yica abasivili buri munsi. ‘Ibi bikaba byerekana ko Monusco yishe ihame ryo kutabogama’.

M23 iti “Ubutegetsi bwa Perezida Tshisekedi ntabwo bwifuza gukemura mu mahoro ikibazo cy’intambara iri mu Burasirazuba bwa Congo , ahubwo burajwe ishinga no gutsinsura M23”.

M23 yashimangiye ko ishyigikiye gahunda zitandukanye zo gushakira amahoro akarere binyuze mu biganiro, yibutsa ko izirwanaho kuri buri kimwe cyashaka kuyihungabanya kandi itazateshuka ku mugambi wo kurengera abasivili mu duce igenzura.

M23 yamaganye imyitwarire ya RDC mu kibazo cy'umutekano muke mu Burasirazuba bwayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .