00:00:00 IGIHE NETWORK KN KINYARWANDA EN ENGLISH FR FRANCAIS

M23 yarasanye n’abarwanyi ba FDLR

Yanditswe na IGIHE
Kuya 10 Mutarama 2023 saa 03:58
Yasuwe :

Umutwe wa M23 ukomeje imirwano mu burasirazuba bwa Repubulika Iharanira Demokarasi ya Congo, ndetse mu gitondo cyo kuri uyu wa Kabiri warasanye n’abarwanyi barimo aba FDLR na Nyatura.

Ni abarwanyi uyu mutwe uvuga ko bamaze iminsi bafatanya n’Ingabo za Leta ya Congo, FARDC, mu kuwugabaho ibitero.

Nk’uko Radio Okapi yabitangaje, mu gitondo cyo kuri uyu wa 10 Mutarama 2023 imirwano yakomeje, guhera ahagana saa kumi n’imwe z’urukerera, M23 ihangana n’imitwe ya Nyatura, Collectif de Mouvements pour le Changement (CMC), muri segiteri ya Katwiguru, iherereye muri kilometero 20 mu burengerazuba bwa Kiwanja, muri teritwari ya Rutshuru.

Amakuru avuga ko ari abarwanyi b’iryo huriro bagabye ibitero ku birindiro bya M23, imirwano ihita irota kugeza mu gitondo.

Iyo mitwe ngo imaze iminsi igaba ibitero ku duce tugenzurwa na M23 yaje kuneshwa.

Iki kinyamakuru cyatangaje ko ku ruhande rw’Amajyepfo y’Uburengerazuba bwa Rutshuru, umutuzo ari wose yuma y’imirwano yabaye kuri uyu wa Mbere.

Radio Okapi yakomeje iti "Aho naho, abarwanyi ba M23 barasanye n’abarwanyi b’Abahutu bakomoka mu Rwanda ba FDLR."

Ntabwo imibare y’abaguye mu mirwano muri utu duce tugenzurwa na M23 yatangajwe.

Uyu mutwe wa M23 wakomeje kugaragaza ko imitwe myinshi yitwaje intwaro irimo na FDLR yashinzwe n’abarimo abagize uruhare muri Jenoside yakorewe Abatutsi mu 1994, ikorana na FARDC.

Yavuze ko yifuza amahoro, aho ikeneye kuganira na Leta ku mpamvu zatumye ifata intwaro, ariko Leta ya Congo yo ikabitera utwatsi.

Mu kugaragaza ko ushaka amahoro, umutwe wa M23 uheruka gushyikiriza Ingabo z’Akarere ka Afurika y’Iburasirazuba (EACRF) agace ka Kibumba wari warafashe n’ikigo cya gisirikare cya Rumangabo.

Icyakora, iyi radio y’Umuryango w’Abibumbye ivuga ko hari abarwanyi ba M23 bagaragara muri Kibumba.

Ku rundi ruhande, Perezida w’Ihuriro ry’Imiryango itari iya Leta muri Rutshuru, Jean-Claude Mbabaze, kuri uyu wa Mbere yavuze ko kuba M23 yaratangaje ko itanze ibirindiro bya Rumangabo n’utundi duce turimo Nyiragongo, ari uburyo bwo kuyobya.

Ku bwe, ngo abarwanyi ba M23 ntabwo bigeze bakoresha ikigo cya gisirikare cya Rumangabo nyuma yo kwirukanamo ingabo za Leta, ku buryo kugitanga nta kintu kinini bivuze.

Byongeye, ngo uyu mutwe uracyagenzura uduce tugose Rumangabo turimo Katale, Rugari na Mushoro.

Abarwanyi ba M23 bakomeje guhangana n'imitwe yitwaje intwaro yishyize hamwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .