00:00:00 IGIHE NETWORK KN KINYARWANDA EN ENGLISH FR FRANCAIS

M23 yamaganye ibirego bya LONI biyishinja guhungabanya uburenganzira bwa muntu

Yanditswe na IGIHE
Kuya 2 July 2022 saa 09:47
Yasuwe :

Ubuyobozi bw’inyeshyamba za M23 zikorera muri Repubulika Iharanira Demokarasi ya Congo, bwamaganye ibirego by’Umuryango w’Abibumbye bishinja uyu mutwe ibikorwa birimo ibyo guhonyora uburenganizra bwa muntu.

Ibyo birego biri mu byagarutsweho n’Intumwa yihariye y’Umunyamabanga Mukuru w’Umuryango w’Abibumbye muri Repubulika Iharanira Demokarasi ya Congo, Bintou Keita, ubwo yari imbere y’Akanama Gashinzwe Amahoro, ku wa 29 Kamena 2022.

Umuvugizi wa M23, Major Willy Ngoma, mu itangazo ryasohotse ku wa 30 Kamena yashyizeho umukono, yavuze ko M23 ishima Umuryango w’Abibumbye n’izindi nzego zikora uko zishoboye kugira ngo umutekano wongere kuboneka muri Repubulika Iharanira Demokarasi ya Congo.

Yashimye umuhate wa Bintou Keita mu kwamagana imvugo zihembera urwango n’ihohoterwa rikorerwa abaturage bamwe muri iki gihugu ariko agaragaza ko hari ibyo atigeze akomozaho muri iryo jambo yavugiye mu Kanama Gashinzwe Amahoro.

Muri ibyo ngo harimo ubufatanye bw’ingabo za leta, FARDC, inyeshyamba za FDLR, Mai-Mai n’indi mitwe yitwaje intwaro yitwara nk’abajenosideri.

Iri tangazo rikomeza rivuga ko iyo ngengabitekerezo yinjijwe mu gihugu imaze gufata intera mu nzego za leta, aho inzego za FARDC na Polisi zikangurira abaturage kugirira abandi nabi.

M23 kandi yahakanye ikirego cyo guhanura kajugujugu ya MONUSCO ivuga ko LONI iri guteza urujijo ku wabigizemo uruhare nyuma y’iperereza yakoze.

Ku birego bijyanye no guhonyora uburenganzira bwa muntu, M23 yasobanuye ko ikigamijwe ari ukugaragaza nabi uyu mutwe mu gihe ibikorwa byinshi by’ubwicanyi bikorwa n’ingabo za FARDC n’imitwe yitwaje intwaro ndetse ubutegetsi bwa Congo bukaba bubifitemo uruhare.

Itangazo rigira riti “Ingabo za M23 zitwara neza ku rugamba kandi zikubahiriza uburenganzira bwa muntu. Ku bw’ibyo turamagana ibirego bidafite ishingiro M23 ishinjwa byo guhohotera uburenganzira bwa muntu.”

“Kuva mu 2012, M23 ntiyigeze ishinjwa kubangamira uburenganzira bwa muntu kandi MONUSCO ibizi neza ko itigeze igaba ibitero ku basivile cyangwa ngo igire abantu yirukana ku mpamvu izo ari zo zose.”

Ibyo birego byagaragajwe ngo bigamije gutesha agaciro ishingiro ry’intambara n’ishyirwa mu bikorwa ry’amasezerano yose n’ibyo Guverinoma ya RDC yari yariyemeje.

M23 yamaganye ubwicanyi bwa hato na hato bukorerwa abaturage muri Ituri bikozwe na ADF, muri Ituri bigizwemo uruhare na CODECO ndetse n’ubukorwa muri rusange na FDLR. Uyu mutwe ukomeza uvuga ko yizeye ko intambara izarangira binyuze mu biganiro by’amahoro mu gihe haba hitawe ku mpamvu zayiteye.

M23 imaze iminsi mu ntambara na FARDC aho iki gihugu gishinja u Rwanda ko ruyitera inkunga, ibirego u Rwanda ruvuga ko bidafite ishingiro.

Muri raporo nshya y’Umuryango w’Abibumbye, watangaje ko kugeza ubu akanama gahuriweho gashinzwe gukurikirana ibibazo byo ku mipaka (EJVM) katarabona ikimenyetso na kimwe gihamya ko hari igihugu cy’amahanga cyaba cyaragize uruhare mu kubura imirwano k’umutwe wa M23 ndetse no kuwushyigikira.

Umuvugizi wa M23, Willy Ngoma, ukikijwe n'abasirikare bamurinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .