00:00:00 IGIHE NETWORK KN KINYARWANDA EN ENGLISH FR FRANCAIS

Loni yijeje iperereza ku mpfu z’Abanye-Congo bivugwa ko barashwe na Monusco

Yanditswe na IGIHE
Kuya 29 July 2022 saa 01:27
Yasuwe :

Abahagarariye Umuryango w’Abibumbye muri Repubulika Iharanira Demokarasi ya Congo batangaje ko hagiye gukorwa iperereza rizagaragaza niba koko abasirikare bari mu butumwa bwa Monusco baba baragize uruhare mu iraswa ry’abaturage bari mu myigarambyo yo kubagana mu bice bitandukanye by’iki gihugu.

Mu ntangiriro z’iki cyumweru nibwo Abanye-Congo bazindukiye mu myigaragambyo yabereye mu bice bitandukanye basaba ko Ingabo z’Umuryango w’Abibumbye zishinzwe kugarura Amahoro muri Repubulika Iharanira Demokarasi ya Congo (MONUSCO), ziva ku butaka bw’iki gihugu kuko zitigeze zubahiriza inshingano zari zifite.

Iyi myigaragambyo yatangiriye mu Mujyi wa Goma igenda ikwirakwira mu bindi bice bya RDC birimo Butembo na Beni bivugwa ko imaze kugwamo abasivili 19 barimo n’abishwe n’amasasu.

Ni ibintu byakuruye impaka, Abanye-Congo batangira gushinja izi ngabo z’Umuryango w’Abibumye gukoresha amasasu mu guhosha imyigaragambyo.

Kugeza ubu ni ibintu aba baturage batavugaho rumwe n’Umuryango w’Abibumbye kuko uvuga ko nta musirikare wabo wigeze arasa abaturage, ukemeza ko ukuri kuzava mu iperereza rigiye gukorwa.

Umuyobozi Wungirije wa Loni muri Congo ushinzwe ibikorwa, Khassim Diagne yavuze ko hatangiye iperereza kuri ibi birego byo kurasa abaturage ingabo z’uyu muryango zishinjwa.

Ati “Nashakaga gushimangira ko maze iminsi nkorana bya hafi n’ingabo zacu kuva ibi bibazo byavugwa, navuganye n’abashinzwe ingabo mu bice bitandukanye, ku bw’ibyo nakwemeza ko Monusco itigeze irasa ku kivunge cy’abigaragambya. Kugira ngo dukureho urujijo tugiye gukora iperereza. Iryo perereza rizadufasha gusobanukirwa neza aho ariya masasu yaturutse.”

Inshingano nyamukuru ingabo za MONUSCO zari zifite ni izo kurwanya imitwe yitwaje intwaro yigaruriye uburasirazuba bwa Repubulika Iharanira Demokarasi ya Congo.

Nyamara kuva mu myaka irenga 20 ishize aho kugira ngo iyo mitwe igabanuke ahubwo irushaho kwiyongera ndetse abaturage benshi b’abasivile bakomeje kugwa mu bitero bigizwemo uruhare na yo.

Abanye-Congo bashinja MONUSCO ko ikora mu nyungu z’ibihugu byo mu mahanga aho gushyira mu bikorwa inshingano zayo.

Kuva Loni yatangira ubutumwa bwo kugarura amahoro mu Burasirazuba bwa Congo mu myaka ya 1999, nta musaruro iragaragaza w’ibikorwa byayo.

Buri mwaka MONUSCO itangwaho ingengo y’imari ya miliyari imwe y’amadolari ya Amerika. Ni bwo butumwa bw’amahoro bw’Umuryango w’Abibumbye buhenda kurusha ubundi ku isi.

Mu 2015 byavugwaga ko yari ifite abasirikare 19.815. Mu nama y’Akanama k’Umuryango w’Abibumbye gashinzwe amahoro, yabaye mu Ukuboza umwaka ushize, uyu mubare waragabanyijwe ugezwa ku basirikare ibihumbi 14.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .