Loni yasabye ko Afurika yafashwa byihariye mu guhangana na Coronavirus

Yanditswe na IGIHE
Kuya 20 Gicurasi 2020 saa 03:57
Yasuwe :
0 0

Umunyamabanga Mukuru wa Loni, Antonio Guterres, yasabye amahanga kugira icyo akora mu gufasha umugabane wa Afurika guhangana na Coronavirus.

Mu butumwa yatanze kuri uyu wa Gatatu ubwo hamurikwaga inshamake y’ingaruka Coronavirus yagize kuri Afurika, Guterres, yavuze ko kuri uyu mugabane icyorezo ari bwo kikihagera kandi akaga kizateza kaziyongera vuba vuba.

Yavuze ko ubufatanye bw’Isi yose na Afurika ari ingenzi cyane muri ibi bihe by’icyorezo na nyuma yacyo.

Ati “Kurandura icyorezo muri Afurika ni ingenzi mu rugamba rwo kukirandura ku Isi yose. Turasaba ko mu rwego mpuzamahanga hagira igikorwa mu gushyigikira inzego z’ubuzima, kurwanya inzara, kwirinda akaga mu bukungu, gushyigikira uburezi, kurinda umurimo no kugabanya ko uyu mugabane watakaza ibyo winjiza n’ibyo wohereza mu mahanga”.

Guterres yavuze ko ibihugu bya Afurika bigomba kugezwamo byihutirwa urukingo n’umuti wa Coronavirus, igihe bizaba byabonetse kandi bikagera kuri bose.

Yasabye kandi ibihugu byo kuri uyu mugabane guhagarika intambara no gukemura amakimbirane kandi amatora arimo gutegurwa mu bihugu bitandukanye akazaba mu mahoro n’umutekano.

Guterres kandi yavuze ko urubyiruko n’abagore bagomba kubakirwa ubushobozi, ashimangira ko bizatuma bagira uruhare mu kuzahura uyu mugabane uzashegeshwa cyane na Coronavirus imaze kwica abarenga 2500.

Inyigo nshya y’Ishami ry’Umuryango w’Abibumbye ryita ku buzima (OMS), iherutse kugaragaza ko icyorezo cya Coronavirus, gishobora kuzica abantu bari hagati y’ibihumbi 83 n’ibihumbi 190, muri Afurika mu mwaka wa mbere naho abari hagati ya miliyoni 29 na miliyoni 44 bandure mu gihe nta ngamba zifashwe.

Ibihugu byinshi ku mugabane wa Afurika byashyizeho ingamba zirimo guhagarika ibikorwa bihuza abantu benshi, ingendo mpuzamahanga n’izindi zigamije kwirinda ikwirakwira rya Coronavirus.

Icyorezo cya Coronavirus cyageze muri Afurika nyuma ndetse n’ikigero cy’ubwandu kiracyari hasi ugereranyije n’ahandi. Gusa OMS ivuga ko Covid-19, izabana n’abantu imyaka myinshi nubwo hari ingamba zagiye zishyirwaho.

Icyorezo cya Coronavirus gishobora kuzashegesha cyane umugabane wa Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .