00:00:00 IGIHE NETWORK KN KINYARWANDA EN ENGLISH FR FRANCAIS

Loni irashinja M23 gutera MONUSCO, Tshisekedi mu Burundi...Amakuru avugwa mu karere

Yanditswe na IGIHE
Kuya 23 May 2022 saa 10:22
Yasuwe :

Umuyobozi mu Muryango w’Abibumbye yashinje abarwanyi ba M23 gutera abasirikare b’uyu muryango bari mu Burasirazuba bwa Repubulika Iharanira Demokarasi ya Congo.

Ni ibyatangajwe n’umuyobozi wungirije w’Umunyamabanga Mukuru wa Loni, Bintu Keita nyuma y’uko igisirikare cya RDC kuwa Kane cyatangiye ibitero ku mutwe wa M23.

Keita yavuze ko M23 yagabye ibitero ku basirikare ba Leta n’aba Monusco, bari mu bikorwa byo kubungabunga amahoro muri RDC. Abaturage bo mu Mujyi wa Goma batangaje ko Monusco yakoresheje indege za kajugujugu mu kurwana n’abarwanyi ba M23.

Uyu mutwe watangaje ko abarwanyi bawo birukanye abasirikare ba leta bagahungira mu nkambi za Monusco, bituma abasirikare ba Loni nabo binjira muri urwo rugamba.

Uruzinduko rwa Tshisekedi mu Burundi

Ku mugoroba wo kuwa Gatandatu nibwo Perezida Tshisekedi yageze ku kibuga cy’indege cyitiriwe Melchior Ndadaye, yakirwa na Minisitiri w’Ububanyi n’amahanga w’u Burundi. Ni urugendo rwakomereje aho Perezida Evariste Ndayishimiye yakiriye ku meza mugenzi we.

Tshisekedi yavuze ko uruzinduko rwe rugamije kumenya u Burundi n’abaturage babwo biruseho. Yavuze ko ashaka kwigira ku Burundi ibijyanye n’igisirikare, ubuhinzi, amakoperative y’ubuhinzi.

Imishinga iduhuza irahari myinshi, uwo nshyize ku mutima cyane ni uwa gari ya moshi izava muri Tanzania, igaca mu Burundi ikagera muri RDC. Hari kandi kubaka ikiraro gihuza intara ya Kivu y’Amajyepfo n’imwe mu ntara z’u Burundi.

Abacuruzi bakomeje gutera umugongo icyambu cya Mombasa

Umwuka w’amatora ateganyijwe kuwa 9 Kanama uyu mwaka muri Kenya ukomeje kugira ingaruka ku rujya n’uruza rw’ibicuruzwa mu muhora wa ruguru.

Ku rundi ruhande ariko Tanzania irimo kubyungukiramo kuko imizigo myinshi yerekeza mu biyaga bigari yateye umugongo icyambu cya Mombasa yimukira ku cya Dar es Salaam.

Impungenge z’ibyabaye mu 2007/2008 zongeye kugaruka mu bacuruzi. Icyo gihe imvururu zakurikiye amatora zateje ibihombo abacuruzi bo mu Rwanda na Uganda.

Kugeza ubu hari miliyoni 63 z’amadolari z’indishyi z’ibyangijwe urukiko rwa Nairobi rwategetse ko zihabwa abo bacuruzi. Izi ntabwo ziratangwa.

Kubera ubwoba bw’uko byakwisubiramo, abacuruzi bari guhitamo kunyuza ibicuruzwa mu muhora wo hagati, byatumye ibinyura ku cyambu cya Dar es Salaam, byiyongera cyane ku kigero cya 21% mu 2021 naho ibinyura ku cyambu cya Mombasa bigabanyukaho 6.2%.

Raporo yerekana ko imizigo Uganda yanyuzaga Mombasa yagabanyutseho 5.7% mu 2021, iyajyaga mu Rwanda igabanyukaho 56.7%. Inzobere zerekana ko mu 2022 ibinyuzwa ku cyambu cya Mombasa bizagabanyuka nubwo guverinoma ikomeje kunoza serivisi zihatangirwa no gushyiraho ingamba zikurura abacuruzi.

Samia Suluhu yanenze abakozi ba Leta

Perezida wa Tanzania, Samia Suluhu Hassan, yatangaje ko hari abakozi ba leta benshi cyane bafite imyitwarire mibi, asaba abayobozi kugira icyo babikoraho cyihutirwa.

Yategetse Komisiyo y’abakozi ba Leta gushyiraho ingamba zo gukemura iki kibazo kugira ngo abakozi bose ba leta bakorane ikinyabupfura. Yavuze ko iki kibazo gifitanye isano no kuba abakozi badahugurwa cyangwa ngo bahabwe amasomo abatyaza.

Ati "Abayobozi benshi mu nzego za leta bahabwaga amahugurwa abibutsa inshingano zabo n’uko bakwitwara mu kazi, ariko ntabwo bigikorwa".

Perezida Samia yakomeje avuga ko leta ikeneye abakozi bafite imyitwarire myiza, bashyize umutima ku kazi kandi banyotewe no kubahiriza inshingano zabo.

Uhuru Kenyatta azamamaza Raila Odinga

Perezida wa Kenya, Uhuru Kenyatta mu kwezi gutaha azatangira ibikorwa byo kwamamaza umuyobozi w’ishyaka, ODM, Raila Odinga n’uwo bazaba biyamamazanya Martha Karua.

Umuyobozi ushinzwe amatora mu ishyaka Jubilee, Depite Kanini Kega, yabwiye ikinyamakuru Nation ko Uhuru azitabira ibikorwa byo kwiyamamaza mu gace ka Mt Kenya muri Kamena na Nyakanga.

Ibi bitangajwe nyuma y’uko hari abayobozi bari hafi ya Perezida Uhuru baherutse gutangaza ko atazigera yitabira ibikorwa byo kwiyamamaza.

Nta cyo Leta ya Uganda iteganya gukora ku bibazo by’izamuka ry’ibiciro

Perezida wa Uganda, Yoweri Museveni Kaguta, yatangaje ko Guverinoma nta ruhare izagira mu bibazo bibangamiye ubukungu birimo n’izamuka ry’ikiguzi cy’ubuzima.

Izamuka ry’ibiciro by’ibikomoka kuri peteroli, ibikoresho by’ibanze byatunganyirijwe mu nganda ndetse n’ibiribwa byazamutse ku gipimo cyo hejuru mu mezi ashize bitewe n’intambara muri Ukraine.

Mu ijambo Museveni yavugiye kuri televiziyo y’igihugu kuri iki Cyumweru, yavuze ko nkunganire ya leta n’ikurwaho ry’umusoro ku byatumijwe mu mahanga bishobora kugusha ubukungu mu manga.

Yavuze ko ibi bishobora gutuma amafaranga y’amanyamahanga agabanuka mu gihugu bikagorana kugura ibikoresho bihenze.

Museveni yavuze ko Uganda igomba kwitondera ibyo itumiza mu mahanga bikaba bihwanye n’ubushobozi bw’igihugu.

Yakomeje agira inama abaturage gusimbuza ingano zihenze ibindi biribwa biboneka mu gihugu birimo ibigori, ibitoki n’imyumbati nk’uko BBC ibivuga.

Ibice byinshi bya Uganda bifite ubutaka bwera ndetse imiryango myinshi itunzwe n’uubuhinzi buciriritse. Nyamara ibiciro by’ibiribwa biboneka mu gihugu na byo byarazamutse cyane cyane mu bice by’imijyi bitewe n’izamuka ry’ikiguzi cy’ubwikorezi.

Mu yandi makuru avugwa muri Uganda, Guverinoma yatangaje ko abashakashatsi bayo biteguye guhangana n’ubwandu bw’icyorezo cya monkeypox, indwara bimaze kugaragara ko yica kandi ikaba imaze kugera mu bihugu 12.

Iyi ndwara yandura binyuze mu kwegerana n’uwayanduye ifite ibimenyetso birimo uburyaryatse mu mubiri, guhinda umuriro no kugira uduheri ku ruhu. Ibindi bimenyetso birimo kuribwa umugongo no gucika integer nke.

Komiseri ushinzwe ibyo kurwanya ibyorezo muri Minisiteri y’Ubuzima, Dr Allan Muruta, yabwiye Daily Monitor ko biteguye gukumira no gukurirana indwara ya monkeypox.

Ati “Uganda ifite ibyago kuko abantu bahora bakorera ingendo hirya no hino. Kuri ubu turi maso, turimo turasuzuma neza dushaka uko twamenya neza uko yandura n’uburyo twakwitwara mu gihe hagira ubwandu bugaragara.”

Ishami ry’Umuryango w’Ababimbye ryita ku buzima yatangaje ko kuva ku wa 13 Gicurasi, abantu 93 ari bo bari bamaze kuboneka ko banduye kugeza kuri iki Cyumweru.

Afurika y’Epfo yongeye kwibasirwa n’imyuzure

Afurika y’Epfo yongeye kwibasirwa n’imyuzure yakomotse ku mvura nyinshi yangije ibikorwaremezo bitandukanye by’umwihariko mu nsisiro zo muri Duban, Umurwa Mukuru w’Intara ya Kwa Zulu-Natal.

Inzego za leta zabwiye itangazamakuru ko ishusho y’ibyangijwe igaragaza impungenge zikomeye nubwo kugeza ubu nta wuratakaza ubuzima ugereranyije na 450 bapfuye ku nshuro ya mbere bitewe ahanini n’inkangu zagwiriye abaturage.

Kuri iyi nshuro imyuzure yongeye kwibasira ibikorwaremezo birimo imihanda, ibiraro n’inzu. Ikigo cy’igihugu cyari cyatanze impuruza ku mvura nyinshi aho abaturage bagiriwe inama yo kuguma mu ngo zabo.

Ibigo 82 byakira abakuwe mu byabo byafunguwe. Abageze mu zabukuru bari mu bigo na bo bakuwemo. Ingabo, Polisi bari mu bahamariwe gutanga ubufasha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .