Libya: Havumbuwe imva rusange mu bice byahoze byigaruriwe na Gen Haftar

Yanditswe na Bukuru JC
Kuya 24 Mutarama 2021 saa 08:19
Yasuwe :
0 0

Ubuyobozi bwa Guverinoma yemewe n’amahanga muri Libya bwavumbuye ibyobo byashyinguwemo abantu mu buryo bwa rusange mu gace kari hanze y’umujyi wa Tripoli kahoze kari mu maboko y’ingabo za Gen Khalifa Haftar.

Imibiri icumi y’abantu bivugwa ko bishwe n’ingabo za Haftar yabonetse ihambye mu cyobo kimwe mu gace ka Turhuna gaherereye mu birometero 80 uvuye mu murwa mukuru Tripoli.

Minisiteri y’umutekano ya Leta yemewe n’amahanga yatangaje ko imibiri yabonywe igaragaza ko yahambwe ihambiriye kandi ipfutse mu maso.

Muri Kamena umwaka ushize nibwo ibyobo bya mbere bashyinguwemo abantu mu buryo bwa rusange byavumbuwe. Loni icyo gihe yatangaje ko ari ibintu bibabaje.

Kuva icyo gihe, imibiri 120 niyo imaze kuboneka mu byobo bitandukanye byagiye bivumburwa. Ibyo byobo byatangiye kuboneka mu duce twahoze twigaruriwe n’ingabo za Haftar, mbere yo gukubitwa inshuro zigasubira inyuma kure y’umurwa mukuru.

Imiryango y’uburenganzira bwa muntu yemeza ko nibura abantu 300 baburiwe irengero mu gace ka Turhuna ubwo kari kigaruriwe n’inyeshyamba za Haftar, bagakeka ko bagiye bicwa.

Mu Ukwakira umwaka ushize impande zitavuga rumwe muri Libya zemeye gushyira intwaro hasi mu biganiro byashyigikiwe na Loni. Hemejwe ko amatora ya Perezida n’ay’abagize Inteko Ishinga Amategeko azaba uyu mwaka.

Mu bice byahoze byigaruriwe na Haftar hashize igihe haboneka imva rusange zihambyemo imibiri y'abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .