Lesotho: Minisitiri w’Intebe ushinjwa uruhare mu rupfu rw’umugore we yasabwe kwegura

Yanditswe na Ndayikunda Josué
Kuya 10 Mutarama 2020 saa 09:12
Yasuwe :
0 0

Ishyaka All Basotho Convention (ABC) ryasabye Thomas Thabane usanzwe ari Minisitiri w’Intebe muri Lesotho kwegura ku buyobozi nyuma y’ibirego bimushinja kugira uruhare mu rupfu rw’umugore we rwo mu 2017.

Ibi birego byatanzwe n’Umuyobozi wa Polisi ya Lesotho, Holomo Molibeli, muri iki cyumweru.

Ni icyemezo yafashe nyuma yo gufatirwa umwanzuro wo kwirukanwa na we agatangiza iperereza ryasanze mbere y’uko umugore wa Thabane apfa hari telefoni uyu mugabo yabanje kwitaba.

Umuyobozi wungirije wa ABC, Nqosa Mahao, yemeje ko Thomas Thabane ashinjwa kugira uruhare mu iyicwa ry’umugore we, Lipolelo Thabane, ari nayo mpamvu ubuyobozi bw’ishyaka bumusaba kwegura.

Ati “Igikorwa yakoze cyo kwirukana Molibeli cyari kigamije kubangamira ubutabera no kubukoma mu nkokora. Amaze kuba ikibazo ku gihugu ni nayo mpamvu ishyaka ryafashe icyemezo cyo kumusaba kwegura.”

BBC yanditse ko Minisitiri w’Intebe, Thomas Thabane, ntacyo aratangaza ku birego ashinjwa.

Lipolelo Thabane yishwe arashwe mu gihe yari atashye mu rugo iwe, ibyo bikaba byarabaye iminsi mike mbere y’uko uwari umugabo we Thomas Thabane arahirira inshingano ariho kuva muri Kamena 2017.

ABC ni ishyaka ryatangijwe mu Ukwakira 2006; riyoborwa na Thomas Motsoahae Thabane, uyu yanabaye Minisitiri w’Intebe wa Lesotho hagati ya Kamena 2012 na Werurwe 2015.

Minisitiri w’Intebe muri Lesotho, Thomas Thabane yasabwe kwegura ku buyobozi nyuma y’ibirego bimushinja kugira uruhare mu rupfu rw’umugore we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza