Kwinjiza RDC muri EAC ku meza y’ibigiye guhuza abakuru b’ibihugu biyigize

Yanditswe na IGIHE
Kuya 9 Ugushyingo 2019 saa 02:01
Yasuwe :
0 0

Abakuru b’ibihugu bigize Umuryango wa Afurika y’Iburasirazuba (EAC), kuwa 30 Ugushyingo 2019, bazahurira i Arusha mu nama ya 23 isanzwe, ni mu gihe uyu muryango uzaba wizihiza imyaka 20 umaze.

Muri EAC harimo ibibazo ahanini bishingiye ku bwumvikane buke buri hagati y’ibihugu biwugize, aho umubano w’u Rwanda na Uganda urimo agatotsi kimwe n’u Burundi. Kenya na Tanzania nabyo bifitanye amakimbirane mu by’ubucuruzi.

Muri iyi nama abayobozi bazasuzuma raporo ku cyerekezo cy’ubunyamuryango bwa Sudan y’Epfo ndetse banemeze ibyavuye mu isuzuma ku kwemeza Somalia nk’umunyamuryango wa EAC.

Abayobozi kandi byitezwe ko bazashimangira ugushyigikira ko Kenya igira icyicaro kidahoraho mu Kanama k’Umutekano ka Loni.

Umuyobozi w’Akanama k’ubucuruzi muri EAC, Peter Mathuki, yabwiye The EastAfrican ko iyi nama ari ingenzi mu kugaragaza ubushake bwa politiki mu bijyanye no gukemura ibibazo urwego rw’abikorera rufite, bigendanye no kwibona ku isoko rusange rya Afurika.

Kwemerera Repubulika Iharanira Demokarasi ya Congo (RDC), kwinjira muri EAC ni indi ngingo izaganirwaho nyuma y’uko iki gihugu gitanze ubusabe muri Kamena uyu mwaka.

RDC yasabye kwinjira muri uyu muryango ku wa 8 Kamena, mu ibaruwa yandikiye umuyobozi wa EAC, Perezida Kagame. Ivuga ko impamvu yasabye kuwinjiramo ari ukwiyongera kw’amasezerano y’ubucuruzi igirana n’ibihugu bigize uyu muryango.

Perezida Kagame yagejeje iki cyifuzo cya Congo mu bunyamabanga bw’uyu muryango, kugira ngo gishyirwe muri gahunda y’ibizigwa mu nama y’abakuru b’ibihugu biwugize izaba mu Ugushyingo, aho nibasanga yujuje ibisabwa ibihugu bizatorera umwanzuro.

Ibihugu bya EAC bibona muri RDC amahirwe y’ubukungu harimo umutungo kamere mwinshi ifite ndetse n’isoko ry’abantu bagera kuri miliyoni 81. Ibi bikazatuma umuryango ukomera.

Gusa nanone hari abasanga nta kinini byamara bitewe n’imbogamizi zinyuranye abacuruzi bahura nazo muri RDC, zirimo izidashingiye ku misoro, ibikorwa remezo bikiri ku rwego rudashimishije n’ibindi.

EAC kandi ikomeje kugorwa n’ikibazo cy’imyenda y’ibihugu biyigize. Sudan y’Epfo nicyo gihugu gifite imyenda myinshi muri EAC, gikurikiwe n’u Burundi bufite uwa miliyoni 13 z’amadolari, Tanzania miliyoni $9, Kenya miliyoni $8, u Rwanda ni miliyoni $7 naho Uganda ni miliyoni $2. U Rwanda na Uganda nibyo byamaze gutanga imisanzu yabyo mu 2019/2020.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza