00:00:00 IGIHE NETWORK KN KINYARWANDA EN ENGLISH FR FRANCAIS

Ku munsi hakirwa 100: Agatereranzamba mu bibazo bikomeje gutuma Abanye-Congo bahungira mu Rwanda

Yanditswe na Akayezu Jean de Dieu
Kuya 14 Mutarama 2023 saa 12:58
Yasuwe :

Abanye-Congo bakomeje kujujubywa no guhorana akarago ku mutwe bashaka ubuhungiro mu bihugu bitandukanye kubera umutekano muke, ubwicanyi, imiyoborere mibi n’ibindi bibazo byabaye akarande mu gihugu cyabo.

Uko bwije n’uko bucyeye ibintu bikomeza kujya irudubi muri RDC. Kuva muri Gicurasi 2022, ubwo umutwe wa M23 wuburaga imirwano uhanganyemo n’ingabo za FARDC zifatanyije n’imitwe nka FDLR, abanye-Congo bavuga Ikinyarwanda bakomeje guhura n’akaga.

Ibikorwa by’ubugizi bwa nabi bukomeje gutizwa umurindi na Leta iyobowe na Félix Antoine Tshisekedi, biriyongera umunsi ku wundi ari nako abaturage benshi bavuga Ikinyarwanda bahunga umusubirizo batinya kwicwa cyangwa gukorerwa ihohoterwa n’iyicarubozo.

Intumwa idasanzwe y’Umunyamabanga Mukuru w’Umuryango w’Abibumbye, ishinzwe ibyo gukumira Jenoside, Alice Wairimu Nderitu, mu Ugushyingo 2022 yasuye RDC avuga ko ‘hari ibimenyetso biganisha kuri Jenoside biri gututumba muri RDC, ku buryo hatagize igikorwa amateka ashobore kwisubiramo’.

Abanye-Congo by’umwihariko abo mu Burasirazuba, bakomeje guhunga ubwo bugizi bwa nabi n’iyo ntambara kuko nko kuva mu Ugushyingo 2022 kugeza tariki 12 Mutarama 2023, u Rwanda rwakira nibura abaturage 100 basaba ubuhungiro bavuye mu bice bitandukanye bya Congo.

Imibare iheruka ya Minisiteri Ishinzwe Ibikorwa by’Ubutabazi, igaragaza ko mu Rwanda hari impunzi z’Abanye-Congo zirenga 75,000, ziri mu nkambi zitandukanye no mu bindi bice by’Igihugu.

Abo ariko ni abanditse kuko hari n’undi mubare munini w’impunzi zitanditswe bitewe n’uburyo ziba zaragiye zihungira mu Rwanda kuva mu 1996. Impunzi ziri mu Rwanda zicumbice mu bice birimo n’imijyi cyane cyane Umujyi wa Kigali.

Ziherereye kandi mu Nkambi ya Kiziba iri mu Karere ka Karongi, Inkambi ya Kigeme iri i Nyamagabe, Inkambi ya Mugombwa iri i Gisagara, Inkambi ya Nyabiheke i Gatsibo ndetse n’iya Mahama mu Karere ka Kirehe.

U Rwanda rwakira impunzi 100 z’Abanye-Congo buri munsi

Kuva muri Gicurasi 2022, intambara ya FARDC na M23 irakomeje ndetse icyizere cyo kuba yahagarara kiragerwa ku mashyi kuko Leta ya Congo ikomeje kwinangira, idashaka ko abaturage bavuga Ikinyarwanda bagira uburenganzira mu gihugu cyabo.

Raporo ya MINEMA igaragaza ko kuva tariki 13 Ugushyingo 2022 kugeza tariki 13 Mutarama 2023, Abanye-Congo 2798 bamaze guhungira mu Rwanda banyuze ku mipaka.

Ni ukuvuga ko ugereranyije nibura ku munsi, u Rwanda rwakira Abanye-Congo 100 baje gusaba ubuhungiro. Nko ku wa Gatanu tariki 13 Mutarama 2023, Abanye-Congo 106 bahungiye mu Rwanda.

N’ubwo bimeze gutya ariko, abahunguka basubira mu gihugu cyabo ni mbarwa kuko nk’ubu kuva mu Ugushyingo 2022, abantu 131 aribo bamaze gutahuka n’ubwo nabo bagenda bafite urwicyekwe ko isaha ku isaha bashobora kugaruka.

Uwitwa Nduhuye Gatuku Salathiel ufite umuryango w’abantu icyenda, aherutse kubwira IGIHE ko yahungiye mu Rwanda mu 2012 aturutse mu gace ka Kalehe.

Gatuku avuga ko icyo gihe leta ya Congo yari ibamereye nabi bahunga bakiza amagara yabo. Abasirikare ba Leta na FDLR ngo nibo babahigaga bashaka kubica.

Mugenzi we, Dusabimana Furaha uvuka i Kalehe muri Kivu y’Amajyepfo yagize ati “Igihe nagakuze, nakuriye mu buhunzi kugeza iyi saha sinzi icyo umututsi azira, biratubabaza. Niba hari n’ideni dufite twaba twaravukanye bazabitubwire tubimenye twiyambaze abatwishyurira ariko tureke kwicwa urubozo kuriya.”

Imiyoborere mibi, umutekano muke mu bituma bahunga

Aba baturage bahunze igihugu cyabo kubera ibibazo bigiye bitandukanye kuri buri muntu ariko byose buhurira ku kuvutswa uburenganzira mu gihugu cyabo, intambara yanze kurangira mu bice birimo Uburasirazuba n’ibindi.

Umutekano muke uturuka ku mitwe yitwaje intwaro irenga 100 ikorera muri RDC ndetse by’umwihariko hakaba hari ubufatanye hagati y’Ingabo za FARDC n’imitwe yitwaje intwaro irimo FDLR, Mai Mai n’indi igamije guhiga no kwica abaturage by’umwihariko abo mu bwoko bw’Abatutsi ndetse n’abavuga Ikinyarwanda.

Muri iki gihugu kandi hari ubugizi bwa nabi bukorerwa abaturage bugakorwa n’iriya mitwe y’inyeshyamba, aho yirirwa isahura abaturage, abagore n’abakobwa bagasambanywa ku gahato, abana bagashimutwa bakajyanwa muri izo nyeshyamba n’ibindi bibazo.

Abaganiriye na IGIHE bahuriza ku kuba kandi leta yabo itabasha kubaha iby’ibanze nkenerwa ndetse no kuba kugeza ubu igisirikare cya leta kidafite ubushobozi bwo kurinda abaturage.

Ubuhamya bw’abaturage bahungiye mu Rwanda bugaragaza ko bahunze bitewe n’ibikorwa by’ubugizi bwa nabi, kwicwa, gutwikirwa n’ibindi biteye isoni bikorerwa abaturage by’umwihariko abo mu bwoko abavuga Ikinyarwanda.

Hari umwe wagize ati “Iyo twaturutse Congo hariya, hari abacu basigayeyo ariko n’uyu munsi nta mutekano bafite, barimo kwicwa.”

Mugenzi we yagize ati “Baratwirukanye nyine abongabo, Interahamwe zari ziriyo, baradutera, abandi barabica, bakajya babatema, baradutwikira. Turahunga rero turaza none n’abo twasizeyo nabo babamaze.”

Mu 2003, ubwo agahenge kari kagarutse muri RDC hari impunzi z’Abanye-Congo zigera kuri 4000 zabaga mu Rwanda zatahutse.

Kuva icyo gihe ariko, nta na rimwe hari hongera kubaho gahunda yo gusaba no gushishikariza impunzi gutahuka byaba bikozwe na Guverinoma ya RDC cyangwa bifashijwemo n’Ishami ry’Umuryango w’Abibumbye ryita ku Mpunzi, UNHCR.

Nubwo bimeze gutyo, tariki 10 Gashyantare 2010, Guverinoma y’u Rwanda yari yasinyanye amasezerano n’iya RDC ndete na UNHCR ku bijyanye no gucyura impunzi z’Abanye-Congo ziri mu Rwanda.

Leta yanze kubacyura biyambaza amahanga

Repubulika Iharanira Demokarasi ya Congo iherutse kwihakana impunzi zirenga zahungiye mu Rwanda, ivuga ko atari abaturage bayo “kuko Abanye-Congo bazima” badashoboka guhungira aho yise “muri gereza”.

Ni iturufu nshya ubutegetsi bwa RDC bwadukanye kugira ngo bwihunze inshingano yo gucyura impunzi z’abaturage bazo bari mu Rwanda no mu bindi bihugu bitandukanye.

Ni mu gihe impunzi z’Abanye-Congo zifite intimba n’umubabaro wa benewabo bari kwicwa n’ingabo za FARDC zifatanyije n’imitwe irimo FDLR ndetse no kumara imyaka irenga 27 mu buhungiro.

Kwihakanwa n’ubuyobozi bw’igihugu cyabo no kugira ubwoba bwo gusubira iwabo kuko ibyo bahunze aho kugira ngo birangire birushaho gukaza umurego, bituma aba baturage aho gutekereza gutaha iwabo bafata umwanzuro wo gusaba ibihugu by’amahanga kubakira.

Kuva mu 2005 kugeza mu ntangiro za 2023, Abanye-Congo 22,078 bamaze gufashwa kujya mu bihugu bibakira birimo Leta Zunze Ubumwe za Amerika, Denmark, u Buholande, u Bufaransa, Finland, Australia na Canada.

Iyi mibare yerekana ko mu mpunzi 73.408 z’Abanye-Congo zari mu Rwanda mu 2019, izingana na 1,14% ari zo zonyine zoherejwe mu bindi bihugu by’amahanga mu 2020.

Mu Rwanda hari impunzi z'abanye-Congo zirenga ibihumbi 70

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .