Maroc yatangiye gahunda ya ‘Mutuelle de Santé’

Yanditswe na Iradukunda Serge
Kuya 16 Mata 2021 saa 08:49
Yasuwe :
0 0

Guverinoma ya Maroc binyuze ku busabe bw’Umwami Mohammed VI, yatangije ubwisungane mu kwivuza buzwi nka ‘Mutuelle de Santé’ mu Rwanda kugira ngo abaturage bose b’iki gihugu babashe kugera kuri serivisi z’ubuvuzi zibahendukiye.

Mu busanzwe muri Maroc hari gahunda y’ubwishingizi mu buvuzi izwi nka ‘Régime d’Assistance Médicale (RAMED)’ gusa wasangaga ahanini ifasha abakozi ba Leta kuko batanga imisanzu yabo binyuze ku mushahara, ibintu byatumaga abikorera bagorwa no kubona uburyo bwo kwivuza buhendutse.

Mu mezi make ashize nibwo Umwami Mohammed VI yasabye ko habaho uburyo bw’ubwisungane mu kwivuza bufasha Abanya-Maroc bose.

Nyuma y’igihe gito abisabye ku wa 14 Mata, Minisitiri w’Ubukungu n’Imari, Mohamed Benchaâboun yamumurikiye imbanzirizamushinga y’ubu bwisungane mu kwivuza igaragaza uko imikorere yabwo izaba iteye.

Jeune Afrique yatangaje ko Minisitiri Benchaâboun yabwiye Umwami Mohammed VI ko ubu bwisungane mu kwivuza buzagera ku bikorera mu nzego zitandukanye z’igihugu.

Biteganyijwe ko iyi gahunda ya ‘Mutuelle de Santé’ izasiga mu 2021 Abanya-Maroc miliyoni 11 babasha kubona serivisi z’ubuvuzi zibahendukiye, aba bakazaba biyongera ku bandi miliyoni 11 basanzwe bakoresha RAMED.

Uzafata ubu bwisungane azajya afashwa mu kwishyura imiti n’amafaranga y’ibitaro igihe bibaye ngombwa ko avurwa abibamo.

Nubwo Benchaâboun atagaragaje niba abaturage bazajya basabwa imisanzu n’ingano yayo yavuze ko iyi gahunda izashorwamo arenga miliyari 5,6$ arimo miliyari 2,5$ zizava mu ngengo y’imari ya Leta.

Ubu buryo bw’ubwisungane mu kwivuza bugiye gutangira gukoreshwa muri Maroc busa n’ubwo u Rwanda rumaze imyaka rutangiye gukoresha, aho umuturage wo hasi atanga 3000 Frw akavurwa mu gihe cy’umwaka ku giciro kiri hasi. Kugeza ubu buryo bw’ubwisungane bukoreshwa n’Abanyarwanda bagera kuri 88% muri miliyoni 12.

Umwami wa Maroc Mohammed VI yasabye ko hashyirwaho uburyo bw'ubwisungane mu kwivuza abaturage bose bibonamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .