Mu gitondo cya tariki ya 2 Nzeri 2024 ni bwo humvikanye inkuru y’impfu z’imfungwa nyinshi zo muri iyi gereza, nyuma y’aho zimwe muri zo zigerageje gutoroka mu rukerera.

Minisitiri w’Umutekano w’Imbere, Jacquemain Shabani, yatangaje ko imfungwa 129 ari zo zapfuye, zirimo 24 zarashwe n’abacungagereza, hakomereka 59, izindi z’abagore zifatwa ku ngufu.

Ni imibare imwe mu miryango iharanira uburenganzira bw’ikiremwamuntu yo muri RDC yateye utwatsi, isaba ko habaho iperereza ryigenga ryafasha Abanye-Congo kumenya imibare nyakuri y’abapfuye n’abakomeretse.

Perezida w’Umuryango FBCP (Fondation Bill Clinton pour la Paix), Emmanuel Adu Cole, yagaragaje ko hari imfungwa za Makala 1.767 zaburiwe irengero nyuma y’uku kugerageza gutoroka.

Muyaya kuri uyu wa 9 Nzeri 2024 yatangaje ko Perezida Félix Tshisekedi yasabye abari gukora iperereza ku byabareye muri Gereza ya Makala kugaragaza ibyarivuyemo mu gihe kitarenze iminsi irindwi.

Yagize ati “Ariko birababaje. Umubare w’abapfuye wari 129, ariko ubu hiyongereyemo babiri bazize ibikomere bakuye muri iki kibazo. Icyo twahisemo ni ukugaragaza ukuri, bitandukanye n’iby’abanyapolitiki bashaka kuyobya.”

Uyu Muvugizi yakomeje ati “Hafashwe ingamba zirimo gufasha abagore bose bafashwe ku ngufu kandi ibiro bya Loni bishinzwe uburenganzira bw’ikiremwamuntu byinjiye muri iri perereza kugira ngo buri wese amenye ukuri ku byabaye.”

Minisitiri w’Ubutabera wa RDC, Constant Mutamba, kuri uyu wa 9 Nzeri yatangaje ko abagore 48 bafatiwe ku ngufu muri Gereza ya Makala ubwo habagaho igeragezwa ryo gutoroka. Mu bashinjwa kubafata ku ngufu harimo abacungagereza.

Byemejwe ko abapfiriye muri gereza ya Makala tariki ya 2 Nzeri bageze ku 131