Kenya: Visi Perezida William Ruto mu bihe bikomeye

Yanditswe na IGIHE
Kuya 8 Werurwe 2020 saa 04:02
Yasuwe :
0 0

Visi Perezida wa Kenya, William Ruto, akomeje gushyirwa ku gitutu kubera urwunge rw’ibikorwa we yita umugambi wa politiki ugamije kumushyira hasi, ku buryo hari abakomeje gusaba ko akorwaho iperereza ndetse akeguzwa.

Ruto wakunze kwibasirwa cyane muri Kenya, ibihe biheruka kurushaho kuba bibi ubwo abagabo babiri, Umunya-Misiri Mustafa Mamdough Amer Lofty n’Umunyamerika Kozlowski Stanley Bruno, ku wa 13 Gashyantare binjiraga mu biro bye bari kumwe n’uwahoze ari Minisitiri wa Siporo, Rashid Echesa.

Muri ibyo biro bizwi nka Harambee House Annex bahasinyiye amasezerano ya baringa afite agaciro ka miliyari hafi 40 z’amashilling ya Kenya (miliyoni €366), byitwa ko Ikigo Eco advance Technology LLC kigiye guha Minisiteri y’Ingabo ya Kenya ikoranabuhanga mu bwirinzi bwa gisirikare. Hari ku wa 13 Gashyantare.

Echesa yaje gusaba miliyoni 11.5 z’amashillingi ya Kenya abayobozi b’icyo kigo, kugira ngo bahabwe iryo soko. Nyuma yaje gutabwa muri yombi n’abo bafatanyije muri ubwo butekamutwe. Bakurikiranyweho guhimba inyandiko n’ibirango bya leta, no gushaka kwihesha amafaranga mu buriganya.

Iperereza rirakomeje

Ku wa Kane, Umuyobozi w’Urwego rw’Ubugenzacyaha muri Kenya, DCI, George Kinoti, yavuze ko Echesa yahuriye n’abashyitsi mu Biro bya William Ruto mu gihe kingana n’isaha imwe, iminota makumyabiri n’amasegonda mirongo itanu n’icyenda, ari nabwo bikekwa ko bakoze ubwo bucuruzi bw’amanyanga, mu gihe Ruto aheruka kuvuga ko yamenye ko bamazemo iminota 23.

Ni ibikorwa Ruto yakomeje kuvuga ko byihishwe inyuma n’abahanganye na we muri politiki bagamije kumuharabika, asaba inzego z’ubutabera gukurikirana ababigizemo uruhare, “njye mundeke nkomeze gukorera igihugu cyanjye.”

Ubugenzacyaha buvuga ko bishoboka cyane ko ibiro bya William Ruto byari bizi neza ibirimo gukorwa muri ayo manyanga.

Rashid Echesa wahoze ari Minisitiri wa Siporo akurikiranyweho ubutekamutwe

Ibintu byarushijeho kuba bibi

Mu gihe iperereza ryari ririmbanyije, ku wa 20 Gashyantare byamenyekanye ko Sergeant Kipyegon Kenei wari umurinzi ku biro bya Visi Perezida Ruto yapfuye, bibanza gutangazwa ko yiyahuye.

Gusa DCI yaje kwemeza ko yishwe n’abantu bataramenyekana, banahimba amayeri ngo bise n’aho yiyahuye, nk’uko ikinyamakuru The Standard cyabitangaje.

Kenei yari yakoze ku munsi Echesa n’inshuti ze binjiraga muri Annex House aho visi perezida akorera, ndetse yishwe mbere y’umunsi umwe ngo akoreshwe inyandikomvugo muri DCI ku birego bikomeje gukururana.

Kinoti yakomeje ati “Ibyavuye mu igenzura rya muganga ryerekanye ko yishwe. Ni ubwicanyi bwari bwateguwe, maze abicanyi babigira nk’aho yiyahuye. Turimo gukora iperereza ku bwicanyi ntabwo ari ku kwiyahura.”

Yanavuze ko uburyo basanze Kenei aryamye mu nzu nta kimenyetso na kimwe cyatuma hakekwa ko yiyahuye, ndetse bishoboka cyane ko abamwishe yari abazi neza, kubera ko mbere y’umunsi yishweho, yari yabanje kugisha inama inshuti ze ku buryo yatangamo inyandikomvugo ye mu bugenzacyaha.

Izo mvugo nazo Ruto yazifashe nk’iza politiki, ndetse avuga ko aho gukomeza gushyira mu bitangazamakuru imvugo n’ibisa n’ikinamico ritarangira, umuryango wa Kenei n’ibiro bya visi Perezida yakoreraga, bikeneye kumenya ukuri.

Ku wa Gatanu yanditse kuri Twitter ati “Ukuri kugomba kujya ahabona kukerekana impamvu, uko byagenze n’uwishe Sergeant Kenei.”

Ubwo yari mu muhango wo kumushyingura, Ruto yavuze ko bibabaje kuba hejuru y’ibikorwa byose birimo kuba, ushinzwe umutekano ari we ubaye igitambo, hejuru y’uko birimo gukorwa n’abahanganye na we muri politiki.

Ati “Ndasaba abarimo kundwanya muri politiki ngo abandi babareke. Bishe Kenei kubera ko ari we muntu wari kuvuga ukuri kuri uwo muntu wazanye abazungu n’abantu bigize abajenerali mu biro byanjye.”

Yavuze ko abo bantu bakoze ibyo bose bafite ubufasha bukomeye, ariko ko hejuru ya byose hari Imana.

Hashingiwe ku mashusho ya camera yafatiwe mu biro bya Visi Perezida Ruto, Kenei ngo yari umwe mu batangabuhamya b’ibyo biboneye, kuko agaragara aha ikaze abo bantu mu cyuma kizamura abantu mu nyubako ahagenewe abanyacyubahiro, muri abo harimo uwari wiyambitse nka Jenerali mu ngabo za Kenya.

Ubwo basohokaga muri ‘ascenseur’ bageze ku igorofa rya kabiri muri Harambee House Annex, ngo Kenei yavugiraga kuri telefoni, ahita ayihereza uwitwa Daniel Otieno Omondi uzwi nka General Juma. Birashoboka ko umuntu wari umuhamagaye, yamusabye guhereza telefoni uwo bari bafite ibyo baziranyeho.

Sgt Kenei aheruka gushyingurwa, ariko iperereza ry'ibanze rigaragaza ko yishwe

Hari byinshi byibazwa

Visi Perezida Ruto yibaza uburyo abantu bashakaga kugura intwaro bari kujya kurangiriza amasezerano mu biro bye aho kujya muri Minisiteri y’Ingabo, cyane ko nubwo ari visi Perezida, adafatwa nk’Umugaba w’Ikirenga wungirije w’Ingabo za Kenya.

Byongeye, ngo amashusho agaragaza ko baganiriye ndetse basinya bicaye aho abashyitsi bategerereza kwakirwa mu biro. Ruto yavuze ko ntaho ahurira n’ibijyanye n’ingabo, ku buryo iyi migambi yacuzwe itamuteye ubwoba.

Ati “Niteguye guhangana nabyo. Abishe Kenei bashobora nanjye kunyica ariko ntabwo nzasubira inyuma. Kenya ni iyacu twese.”

“Niba mwarishe Kenei ngo muntere ubwoba, amaraso ye azabakurikirana. Ndi visi Perezida wa Kenya, nzi ibyo mvuga. Ntabwo ndi umusazi.”

Kugeza ubu igikomeje gutera urujijo ni uko abicanyi bahise bakorana na bamwe mu bakozi b’Ikigo cya Safaricom, ku buryo itumanaho rya Kenei ryose ryasibwe n’ibiri muri telefoni ye bigasibwa, ibyo nabyo bikaba bikeneye iperereza.

Byongeye, Minisiteri y’Ingabo muri Kenya yeruye ko nta kintu na kimwe izi kuri iryo soko ry’ibikoresho bya gisirikare.

Inkubiri ya BBI

Muri Kenya hakomeje ibiganiro kuri gahunda yiswe Building Bridges Initiative, BBI, igamije kureba impinduka zikenewe mu miyoborere ya Kenya, hashingiwe ku bibazo byakunze kuranga Kenya bishingiye ku moko n’imvururu zikunze gukurikira amatora.

Ni gahunda ifatwa nk’itarakiriwe neza n’uruhande rwa William Ruto mu ishyaka Jubilee riri ku butegetsi, ku buryo hari bamwe batangiye kumwadukira, bikavugwa ko muri ibyo bitekerezo birimo gukusanywa, hashobora kuzasabwa ko Perezida Kenyatta asimburwa na Raila Odinga, aho kuba Ruto nk’uko amaze iminsi abyifuza.

Nyuma y’iyi nkubiri yose, bamwe mu basenateri bo mu ishyaka ODM rya Odinga batangaje ko batangiye kureba inzira ziteganywa n’Itegeko Nshinga, mu gukurikirana Visi Perezida Ruto nk’uko Daily Nation yabitangaje.

Senateri James Orengo yagize ati "Mube mwihanganye. Mu byumweru bibiri tuzatangira urugendo rwo guhangana na we.”

Abagize ishyaka ODM basabye ubugnzacyaha gukurikirana Visi Perezida kugira ngo ahishure ibyo azi kuri urwo rupfu, kuko bafata imvugo ze zigamishe gutera ubwoba ubutabera.

Visi Perezida William Ruto akomeje gushyirwa mu majwi mu bintu byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza