Kenya: Umusaza wakoze ibilometero 200 ku igare agiye gushyingura Daniel Moi yahawe moto

Yanditswe na Twarabanye Venuste
Kuya 15 Gashyantare 2020 saa 08:36
Yasuwe :
0 0

Umuyobozi w’umujyi wa Nairobi muri Kenya, Mike Sonko yashyikirije impano ya moto umusaza w’imyaka 76 y’amavuko witwa Nathan Abuti, wakoze ibilometero 200 n’igare yitabiriye umuhango wo gushyingura Daniel Arap Moi, wabaye Perezida wa kabiri wa Kenya.

Umuhango wo gushyingura Daniel Arap Moi wayoboye Kenya imyaka 24 wabereye mu rugo rwe Kabarak ku wa Gatatu tariki 12 Gashyantare 2020 witabirwa n’ibihumbi by’abantu, barimo abanya-Kenya n’inshuti z’icyo gihugu.

Mu nkuru yagarutsweho cyane nyuma y’uwo muhango ni uy’uwitwa Nathan Abuti wavuye mu Ntara ya Kakamega akagera mu Ntara ya Nakuru agakomereza i Kabarak, hari urugendo rwa Kilometero zirenga 200 n’igare yitabiriye uwo muhango.

Nyuma y’amafoto yagaragaye ku mbuga nkoranyamabaga asinya mu gitabo cyabawitabiriye, umuyobozi w’umujyi wa Nairobi, Mike Sonko yahise asaba ko bamuhuza na we ‘akamukiza umuruho wo kunyonga igare’.

Yavuze ko yakozwe ku mutima n’ubutwari bw’uwo mugabo no kuba yarahagereye igihe.

Yanditse kuri twitter ati “Nakozwe ku mutima n’inkuru y’umugabo w’imyaka 76 y’amavuko muzehe Nathan Ambuti witabiriye umuhango wo guherekeza Perezida wa kabiri Nyakubahwa Daniel Toroitich Arap Moi, anyonze igare iminsi ine kuva Kakamega kugera Kabarak.”

Uwo muyobozi yatangaje ko yamenye ko uwo musaza nta mafaranga y’icumbi yari afite yararaga ku mbaraza bwacya agakomeza urugendo, bityo ko agomba kumufasha kureba uburyo azasubira iwe.

Ati “Namenye ko nta mafaranga yo kwishyura hoteli yari afite, yagombye kujya aryama ku mbaraza ubundi agakomeza urugendo. Ntabwo numva ukuntu azagera iwe Butere. Niba hari ufite uburyo bwo kumugeraho mubudusangize turebe uko twafasha uwo mugabo ukunda igihugu gusubirayo.”

Kuri uyu wa Gatanu umuyobozi w’umujyi wa Nairobi, Mike Sonko yamufashije kwizihiza St. Valentin amushyikiriza moto nko kumushimira ku rugendo yakoze yitabira uwo muhango no kumworohereza urugendo rwo gusubira iwe.

Kugira ngo Ambuti amenyekane kuri iyo nkuru, ni uko akigera ahabereye umuhango wo gushyingura yakuruye itangazamakuru kubera igare yariho ririho amabendera y’ibihugu bitandukanye n’ibyapa biriho ubutumwa butandukanye bwandikishije irangi ry’umweru.

Itangazamakuru ryatangaje ko ubwo yageraga mu rugo kwa Moi ku itariki 11 abashinzwe umutekano bamusubije inyuma bakamusaba kuzaza ku munsi nyirizina wo gushyingura.

Icyakora ngo batunguwe no kubona nyuma yaraje kwemererwa kujya mu bagize umuryango wa Moi, ahabwa umwanya wo kumusezeraho bwa nyuma anasinya mu gitabo cy’abafashe mu mugongo uwo muryango.

Nathan Ambuti yamenyekanye nka ambasaderi w’amahoro muri Kenya nyuma y’imvururu zakurikiye amatora yo mu 2007 ubwo hatangazwaga ko Mwai Kibaki yatsinze amatora y’umukuru w’igihugu.

Akoresha ubutumwa butandukanye bwanditse ku byapa birunze ku igare rye ndetse kugeza ubu hari abiyemeje gufatanya na we kuba abagabuzi b’amahoro muri Kenya.

Uyu musaza yahawe moto nyuma yo kujya gushyingura Moi ku igare
Nathan Abuti yageze mu rugo rwa Moi kuwa kabiri
Igare rye riba rifite amabendera n'ubutumwa butandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza