00:00:00 IGIHE NETWORK KN KINYARWANDA EN ENGLISH FR FRANCAIS

Kenya: Umunyamakuru wa Televiziyo y’Igihugu yarasiwe mu rugo rwe

Yanditswe na Muhonzire Sylvine
Kuya 8 Mata 2021 saa 05:46
Yasuwe :
0 0

Umunyamakuru wa Televiziyo y’Igihugu muri Kenya, KBC, Betty Barasa yarashwe n’abantu bataramenyekana bamusanze mu rugo rwe ruri mu Mujyi wa Ngong mu Burengerazuba bw’Amajyepfo ya Nairobi.

Citizen yatangaje ko Betty Barasa yishwe ku wa Gatatu, tariki 7 Mata 2021. Yafashwe yinjiye mu gipangu cyo mu rugo rwe avuye ku kazi, maze abagabo batatu bari bitwaje imbunda bivugwa ko ari izo mu bwoko bwa AK47, baramushorera bamwinjiza mu nzu aho bari bafashe bugwate umugabo we n’abana.

Umwe muri bo, yamuzamukanye mu nzu hejuru amujyana mu cyumba cye, mu gihe abandi babiri basigaye hasi barinze abo mu muryango we ngo badacika cyangwa bagatabaza abashinzwe umutekano.

Hashize umwanya muto abo mu muryango we, ngo bahise bumva urusaku rw’amasasu abiri mbere y’uko umugabo washoreye Barasa amanuka hasi.

Uwo mugabo wamurashe yamanutse, we n’abagenzi be basohoka mu nzu batwaye telefoni na mudasobwa bye.

Polisi yo muri Kenya yavuze ko Barasa yishwe n’ibikomere yari afite mu mutwe, ariko icyatumye araswa kitaramenyekana neza.

Abakozi bo mu Biro bishinzwe Ubugenzacyaha muri Kenya bahise bajya ahabereye icyaha kugira ngo bakore iperereza ryimbitse ku mvano y’urupfu rwa Betty Barasa.

Betty Barasa yari umwe mu banyamakuru b’inzobere akaba n’umuhanga mu gutunganya amashusho kuri KBC (Kenya Broadcasting Corporation).

Betty Barasa wakoreraga Televiziyo y'Igihugu muri Kenya yishwe n'abantu bataramenyakana batwara telefoni na mudasobwa bye/ Ifoto: Africa Nation

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .