Kenya: Umuganga wa mbere yishwe na Coronavirus

Yanditswe na Iradukunda Serge
Kuya 10 Nyakanga 2020 saa 03:36
Yasuwe :
0 0

Minisiteri y’Ubuzima ya Kenya yemeje ko umuganga ari mu bantu umunani bishwe na COVID-19 mu masaha 24 ashize, bituma Ihuriro ry’Abaganga risaba ko harebwa uburyo abaganga batangira gukora mu byiciro kugira ngo bagabanye ibyago byo kwandura iki cyorezo.

Uyu muganga witwa Doreen Lugaliki w’imyaka 38 yafashwe ku wa 8 Nyakanga ahita ajyanwa mu bitaro byigenga biherereye mu Murwa Mukuru Nairobi, ariko ntiyabasha kurokoka kubera ibindi bibazo by’ubuzima yari asanganywe.

Ikinyamakuru The Citizen kivuga ko nyakwigendera yari umuganga w’inzobere mu ndwara z’abagore.

Nyuma y’urupfu rwe, Umuyobozi w’Ihuriro ry’Abaganga muri Kenya, Dr. Simon Kigondu yihanganishije umuryango we, anasaba ko abaganga bafashwa bagatangira gukora mu byiciro.

Yagize ati "COVID-19 ni uburwayi bwibasira abaganga kubera imiterere y’akazi kabo, dukeneye kongera umubare w’abakozi bari mu rwego rw’ubuzima kugira ngo abaganga nabo bashobore gukora mu byiciro ariko banagabanya ibyago byo kwandura.”

Urupfu rw’uyu muganga rwababaje abatari bake biganjemo abo basangiye umwuga barimo Dr. Mercy Korir.

Abinyujije kuri Twitter yagize ati “Nk’umuryango mugari w’abaganga twabuze umwe muri twe kubera COVID-19, umuganga muto wari ugifite byinshi byo gutanga.”

Mu ntangiriro za Nyakanga, Minisitiri w’ubuzima muri Kenya yari yatangaje ko muri iki gihugu abamaze kwandura COVID-19 bo mu rwego rw’ubuzima bagera kuri 186.

Uyu munsi Kenya yatangaje ko abandi barwayi umunani ba COVID-19bitabye Imana, bituma umubare w’abamaze gupfa ugera ku 181.

Kuva umurwayi wa mbere wa Coronavirus agaragaye muri Kenya, abantu 9,448 barimo 473 byemejwe ko banduye kuri uyu wa Gatanu.

Umuganga Doreen Lugaliki yitabye Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .