00:00:00 IGIHE NETWORK KN KINYARWANDA EN ENGLISH FR FRANCAIS

Kenya: Senateri Sekaja uhatanira kuyobora Nairobi arashinjwa gukoresha diplôme ya kaminuza y’impimbano

Yanditswe na Muyisenge Jean Felix
Kuya 29 June 2022 saa 05:52
Yasuwe :

Senateri Arthur Johnson Sekaja, uri mu bahatanira umwanya wo kuyobora Umujyi wa Nairobi, ari mu mazi abiri nyuma y’aho abaturage bakomeje kotsa igitutu Komisiyo y’Amatora muri Kenya, ngo bamuvane mu biyamamaza bitewe n’uko akekwaho gukoresha impapuro mpimbano ubwo yiyandikishaga.

Itegeko Nshinga ryerekeye amatora muri Kenya ritegeka ko umunkandinda agomba kuba afite impamyabushobozi ya kaminuza kugira ngo abashe kwiyamamariza umwanya wa guverineri.

Bamwe mu baturage bakomeje kugaragaza ko Sekaja, winjiye mu Nteko Ishinga Mategeko mu 2013 atemerewe kwiyamamaza kuko atigeze yiga kaminuza, bakanashimangira ko impamyabushobozi y’icyiciro cya kabiri cya kaminuza mu icungamutungo avuga ko yahawe na kaminuza ya ‘Team University’ yo muri Uganda ari impimbano.

Umwe mu baturage, Dennis Wahome, yagejeje ikirego k’Urukiko Rukuru arusaba ko rwategeka Komisiyo y’Amatora gusubika gahunda yo gusohora impapuro z’amatora ateganyijwe tariki ya 9 Kanama, kugira ngo John Sekaja abanze yerekane ibimenyetso bihagije by’uko yize muri ‘Team University’.

Ibi yabikoze nyuma y’aho akanama ka Komisiyo y’Amatora gashwinzwe gukemura amakimbirane, gatesheje agaciro ubusabe bwo guhagarika kandindatire ye kubera nta bimenyetso bihagije bihamya Sekaja gukoresha impampuro mpimbano.

Uyu mugabo yagaragaje ko ibyo Sekaja avuga ko yize muri iyi kaminuza guhera muri 2012 kugera 2016 akoresheje uburyo bw’iyakure atari byo kubera ko icyo gihe iyi kaminuza itari yabona ibyangombwa byo kwigisha mu buryo bw’iyakure. Ntibyashoboka ko yagiye kwigira i Kampala, kubera ko yakoreye urugendo muri Uganda inshuro imwe gusa.

Amasomo y’Icungamutungo Sekaja avuga ko yahigiye ntagaragara ku rutonde rw’ayigishirizwa muri iyi kaminuza. Uyu mugabo kandi ntago agaragara ku rutonde rw’abasoreje amasomo yabo muri Team University mu mwaka wa 2016 ruherutse gusohorwa n’iyi kaminuza.

Dennis Wahome yanagaragaje ko mu mwaka wa 2017 ubwo Sekaja yatangwaga ku rutonde rw’abazahagararira ishyaka Jubilee muri sena, yabwiye Komisiyo ishinzwe Imyitwarire no kurwanya ruswa ko afite impamyabushobozi yahawe na kaminuza ya Nairobi, n’ubwo iyi kaminuza yaje kubitera utwatsi.

Johnson Sekaja yabwiye KTN ko ibyangombwa bye byemewe n’amategeko avuga ko bamwe mu bo bahanganye aribo babyihishe inyuma, bagamije kumuca intege.

Taliki ya 5 Kanama, Johnson Sekaja yagombaga gushyikiriza ibyagombwa komite y’amatora, nyuma aza gusaba ko iyo tariki yakigizwa inyuma, ariho bahera bamushinja ko muri iki gihe yari gucurisha impamyabushobozi ya kaminuza. Tariki ya 6 Kamena nibwo yashyikirije iyi mpamyabumenyi Ikigo c’y’Igihugu Gishwinzwe Kaminuza mure Kenya (CUE) kugira ngo yoherezwe muri IEBC.

Tariki ya 14 Kamena CUE yasohoye ibaruwa itesha agaciro impamyabumenyi ya Johnson Sekaja, nyuma baza kwisubiraho kuri uyu mwanzuro, gusa asabwa kwerekana indangamanota zo muri kaminuza, ikarita y’ishuri, inyandiko imwemerera umwanya wo kwiga na kopi y’igitabo yanditse asoza amasomo ye.

IEBC irashinjwa kumwemerera kwiyamamaza atabanje kwerekana ibi byangombwa.

Kugeza ubu Inama y’Amashuri Makuru na Kaminuza muri Uganda (NCHE) nayo yamaze gutangaza ko yamenye iby’iki kibazo ndetse yatangiye iperereza no kubaza abayobozi ba Team University iby’iyi mpamyabumenyi Senateri Sakaja avuga ko yahakuye.

Umuyobozi Nshingwabikorwa wa NCHE, Prof Mary Okwakol yavuze ko mu minsi iri imbere bazatangaza ibyavuye muri iri perereza.

Senateri Sekaja uhatanira kuyobora Nairobi arashinjwa gukoresha diplôme ya kaminuza y’impimbano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .