00:00:00 IGIHE NETWORK KN KINYARWANDA EN ENGLISH FR FRANCAIS

Kenya: Amasengesho yongeye guhuza Perezida Kenyatta na Ruto

Yanditswe na IGIHE
Kuya 26 May 2022 saa 07:17
Yasuwe :

Umuhango wo gusengera igihugu wongeye kuba umuhuza hagati ya Perezida wa Kenya, Uhuru Kenyatta na Visi Perezida w’iki gihugu, William Ruto bamaze igihe badacana uwaka.

Uyu muhango wo gusengera igihugu muri Kenya uteganyijwe kuba kuri uyu wa Kane tariki 26 Gicurasi 2022. Mu bamaze kugera aho uri kubera harimo Perezida wa Kenya, Uhuru Kenyatta, Visi Perezida William Ruto na Raila Odinga uri mu bahataniye kuyobora iki gihugu.

Aya masengesho afatwa nk’ayongeye kuba umuhuza hagati ya Kenyatta na Ruto kuko bamaze igihe badacana uwaka ku buryo batajyaga bahurira no mu muhango umwe.

Umwuka mubi hagati ya Kenyatta na Ruto watangiye kugaragara ubwo Perezida Kenyatta yafataga icyemezo cyo kwiyunga na Raila Odinga, batavugaga rumwe.

Ibi Ruto yabibonye nk’ikimenyetso cy’uko Perezida Kenyatta atazamushyigikira mu matora y’Umukuru y’Igihugu nk’uko bari barabyumvikanye kandi niko byagenze kuko Kenyatta aherutse gutangaza ko ashyigikiye Raila Odinga.

Uku kutumvikana kwatumye mu mwaka ushize Uhuru Kenyatta asaba William Ruto kuva muri Guverinoma ye niba akomeje kunenga ibikorwa byayo kandi akaba atanyuzwe n’icyerekezo irimo.

Mu gusubiza Perezida Kenyatta, Ruto yavuze ko ntaho azajya kuko ari umugabo ufite intego kandi udahangayikishijwe n’abamutera ubwoba.

Aya masengesho yo gusengera igihugu abaye mu gihe Kenya yitegura kwinjira mu matora azasiga habonetse uzasimbura Perezida Kenyatta. Mu bahabwa amahirwe harimo Raila Odinga na William Ruto.

Amasengesho yo gusengera igihugu muri Kenya yongeye guhuriza hamwe, Perezida Uhuru Kenyatta, Raila Odinga na William Ruto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .