Minisitiri w’Intebe wa Kenya akaba na Minisitiri w’Ububanyi n’Amahanga, Musalia Mudavadi aherutse gutangaza ko kuri uyu wa 27 Kanama 2024, Perezida William Samoei Ruto atangaza ku mugaragaro ko ashyigikiye kandidatire ya Odinga.

Iki gikorwa cyabanjirijwe n’ibiganiro Perezida Ruto yagiranye n’abakuru b’ibihugu byo muri aka karere, abisaba kuzashyigikira iyi kandidatire. Odinga na we yasuye ibi bihugu, ahura n’aba bayobozi.

Perezida wa Tanzania, Samia Suluhu Hassan, yamaze kwemeza ko yitabira iki gikorwa, kimwe na Salva Kiir Mayardit wa Sudani y’Epfo akaba n’Umuyobozi Mukuru wa EAC, Hassan Sheikh Mohamud wa Somalia na Yoweri Kaguta Museveni wa Uganda.

Biteganyijwe ko muri iki gikorwa, Fawzia Yusuf wabaye Minisitiri w’Ububanyi n’Amahanga wa Somalia yikura mu ihatana ry’uyu mwanya, ashyigikire Odinga.

EAC igizwe n’ibihugu umunani: u Rwanda, Uganda, u Burundi, Tanzania, Repubulika Iharanira Demokarasi ya Congo, Sudani y’Epfo, Kenya na Somalia. Ibidahagararirwa n’abakuru b’ibihugu muri iki gikorwa, birahagararirwa n’abagize guverinoma zabyo.

Amatora ya Perezida wa Komisiyo ya AU ateganyijwe muri Gashyantare 2025. Uzayatsinda azasimbura Moussa Faki Mahamat wo muri Tchad, ugiye kumara imyaka umunani kuri iyi nshingano.

Perezida Ruto aratangaza kandidatire ya Raila Odinga uyu munsi

Perezida Yoweri Museveni wa Uganda yemeye gushyigikira Odinga

Perezida Kagame yagiranye ibiganiro na Odinga

Perezida Tshisekedi wa RDC na we yemeye gushyigikira Odinga