00:00:00 IGIHE NETWORK KN KINYARWANDA EN ENGLISH FR FRANCAIS

Kabund wahoze ayobora ishyaka rya Perezida Tshisekedi yatawe muri yombi

Yanditswe na IGIHE
Kuya 9 August 2022 saa 06:33
Yasuwe :

Jean-Marc Kabund wahoze ari Umuyobozi w’ishyaka UDPS rya Perezida Felix Tshiskedi yatawe muri yombi kuri uyu wa Kabiri, ahita ajyanwa muri gereza ikomeye ya Makala.

Kuri uyu wa Kabiri nibwo Kabund yitabye Umushinjacyaha Mukuru i Kinshasa, ashinjwa ibyaha birimo kubahuka umukuru w’igihugu. Bishingiye ku magambo yavuze ubwo yatangazaga ko yashinze ishyaka rye.

Uyu mugabo aheruka kwanga kwitaba Inteko ishinga amategeko, ku busabe bw’Ubushinjacyaha bwari bwasabye ko yamburwa ubudahangarwa kugira ngo akurikiranwe n’ubutabera.

Kabund wahoze ari visi Perezida w’Inteko ishinga amategeko, mu kwezi gushize yashinze ishyaka rye, anatangaza yeruye ko ari ku ruhande rw’abatavuga rumwe n’ubutegetsi.

Ubwo yari amaze kwegura ku buyobozi bw’inteko no mu ishyaka UDPS, Kabund w’imyaka 41 yatangaje ko ubutegetsi bwa Tshisekedi budashoboye.

Yagize ati "Byarangiye, nta kintu na kimwe cyo kwitega kuri Perezida Tshisekedi na UDPS barananiwe. Ubutegetsi buriho ntabwo bushoboye. Ndasaba abaturage kwishyira hamwe ngo birukane Félix Tshisekedi ku butegetsi."

Yashinje Tshisekedi ko ba Guverineri b’intara yabahinduye nk’abahungu n’abakobwa bari mu masiganwa.

Ku bwe, ngo Tshisekedi akwiye kugaragara nk’ikibazo ku butegetsi bwa RDC.

Kabund afatwa nk’umuntu w’ingenzi muri politiki ya RDC, kuko yagize uruhare mu kubaka ihuriro Union sacrée hagati ya Perezida Félix Tshisekedi na Joseph Kabila, ariko ryaje gusenyuka mu mpera za 2020.

Jean-Marc Kabund wahoze ari Umuyobozi w’ishyaka UDPS rya Perezida Felix Tshiskedi yatawe muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .