Isoko rusange rya Afurika: Icyo abantu baryitegaho

Yanditswe na Habimana James
Kuya 9 Nyakanga 2019 saa 02:37
Yasuwe :
0 0

Tariki 7 Nyakanga 2019, inama y’Umuryango wa Afurika Yunze Ubumwe, AU yakoraniye muri Niger, yemeje ishyirwa mu bikorwa ry’amasezerano ashyiraho isoko rusange rihuza ibihugu bya Afurika, (AfCFTA).

Ni isoko ryitezweho kuzazamura ubucuruzi hagati y’ibihugu bya Afurika ku gipimo cya 53% kugeza mu 2022, hakavanwaho imisoro itari ngombwa ku buryo byarema isoko rusange rihuriza hamwe abaturage miliyari 1.2 bagize uyu mugabane, rifite umusaruro mbumbe wa miliyari 2500 $.

Umunyamabanga Mukuru w’Inama ya Loni ishinzwe ubucuruzi n’iterambere, UNCTAD, Mukhisa Kituyi wanabaye Minisitiri w’ubucuruzi n’inganda muri Kenya kuva mu 2002-2007, yavuze ko iyi ari intambwe ikomeye umugabane wa Afurika ukwiye kwishimira, nubwo hakiri imbogamizi zigihari kandi zigomba kuzaganirwaho zigashakirwa ibisubizo.

Mu kiganiro yahaye ikinyamakuru The East African, yabajijwe niba iki ari ikintu abanyafurika bakwishimira. Mukhisa Kituyi yavuze ko kuba iri soko rusange rigezweho ari ikintu gikomeye gikozwe nyuma y’amezi menshi hari ibiganiro, ibi bikaba ari ibintu bakwiye kwishimira nubwo hakiri zimwe mu mbogamizi zigihari.

Yabajijwe niba muri iri soko rusange ishyirwa mu bikora ryaryo bizaba ibintu byoroshye, cyane ko iyo urebye hari imiryango imwe kuri uyu mugabane aho ibihugu biyigize bifitanye ibibazo mu by’ubucuruzi.

Mukhisa Kituyi yavuze ko no mu ishyirwa mu bikorwa ry’iri soko ibi bibazo byagiye bigaragara ariko icyangombwa kandi gikenewe ari ugushaka uko izo mbogamizi zivanwaho hakabaho guhuza ayo masoko yo mu karere.

Yagize ati “Afurika ntabwo ihereye hasi, hari amasomo n’ubumenyi byavanwe mu miryango isanzwe ihuza ibyo bihugu bityo ayo masomo ashobora gutuma iri soko rusange rigenda neza kandi cyane.”

Nyuma yo gushyiraho iri soko rusange hari icyizere ko abashaka imirimo bavuye mu bihugu bifite ubukungu bukiri hasi bashobora kuzagira amahirwe yo kuyibona muri bya bihugu byamaze kugira ubukungu bukomeye, cyane ko ibihugu bya Afurika byamaze kuganira ku rujya n’uruza rw’abaturage.

Ikindi iri soko rusange rigamije ni uko ibihugu byose byanganya amahirwe, abanyafurika bagaragaza impano runaka bakaba bagenda nta nkomyi ku mugabane wose, ibi bikazafasha mu iterambere ry’ubukungu bwa Afurika.

Uyu muyobozi bwo yabazwaga uwo abona iri soko rusange rizafasha, yavuze ko kugabanya ibiciro bizagira ingaruka nziza kuko bizongera ubucuruzi busanzwe muri Afurika, bitume kandi havuka ibindi bicuruzwa bishya.

Ni gute Afurika yarinda ubucuruzi bwayo ku bigo bikomeye bivuye hanze?

Kituyi yavuze ko iri soko rusange risobanuye gucuruzanya na Afurika, rigomba kandi gufasha abacuruzi b’abanyafurika gukoresha ayo mahirwe bahawe ugereranyije n’abandi bahanganye bavuye hanze. Ibi ngo bizaha amahirwe akomeye abakora ubucuruzi kuri uyu mugabane hejuru y’abandi bavuye mu mahanga.

Mukhisa Kituyi yasobanuye ko iri soko rusange rizatuma ubukungu bwa Afurika bugera ku rwego rwo hejuru, bitume ibyo bakora bikurura abantu benshi, izi nyungu nazo zizaguke.

Ibihugu bya Afurika akenshi usanga bivana ibyo bikoresha mu mahanga, Kituyi avuga ko muri iri soko rusange bishobora kuzahinduka.

Yavuze ko mu kuvanaho iki kibazo, iri soko rusange rizafasha ibihugu bya Afurika guhuriza hamwe ibyo bifite. Gusa yongeraho ko ako kanya bitazahindura kuba ibihugu byashingira ku bicuruzwa by’ibindi bihugu ariko bizazana amahirwe y’ibindi bicuruzwa bishya.

Ku birebana no gufungura iby’ingendo zo mu kirere ku mugabane wa Afurika, uyu muyobozi avuga ko bizatuma hahangwa indi mirimo mishya igera ku bihumbi 155, ubukerarugendo bwiyongere ndetse bizatange akayabo ka miliyari 1.3 z’amadorali ku bukungu bwa Afurika.

Mukhisa Kituyi yavuze ko ubucuruzi bwo mu bihugu bifite ubukungu buto, bizagirira amahirwe muri iri soko rusange kuko rizabufasha kugera ku masoko magari ku mugabane wose.

Hari abagaragaza impungenge ko gufungura imipaka bizakurura ibibazo bya ba rushimushi, kunyereza imisoro ndetse n’iterabwoba.

Kituyi yagize ati “Ariko se kubera iki ibyaha birimo gushimuta no kunyereza imisoro bigomba kwiyongera muri iri soko rusange, ahubwo kugabanya imisoro nibyo bizatuma kuyinyereza no gushimuta bigabanuka.”

Ubwo yabazwaga igihe yumva ishyirwa mu bikorwa ry’iri soko ryatangirira, yavuze ko bamwe mu bashyira mu bikorwa bavuga ko ryatangirana n’umwaka wa 2020.

Yagize ati “Ariko ntibishoboka kuvuga ko byakunda keretse ibiganiro by’ibintu bimwe nk’ibigendanye n’imisoro n’amategeko birangiye, harimo kandi ibijyanye n’ishoramari, ibigendanye n’uburenganzira mu by’ibihangano mu by’ubwenge n’ibindi bigomba kuganirwaho.”

Bimwe mu bigomba kuganirwaho kandi bikemeranywaho mbere y’itangira ry’aya masezerano harimo ikurwaho ry’imisoro imwe n’imwe, kwemeza urujya n’uruza rw’ubucuruzi hamwe n’uburyo buhuriweho kandi buhendutse bwo kwishyurana hifashishijwe ikoranabuhanga.

Kugeza ubu umugabane wa Afurika ugizwe n’ibihugu 54 niwo uri inyuma mu gucuruzanya hagati yawo ku kigero cya 16%, mu gihe indi migabane yo yateje imbere ubucuruzi hagati y’ibihugu biyigize.

Aziya umugabane ugizwe n’ibihugu 48 ubucuruzi hagati yawo buri kuri 50%, umugabane w’u Burayi ugizwe n’ibihugu 44 wo ucuruzanya ku kigero cya 70%.

Umuryango wa Afurika Yunze Ubumwe watangaje ko impamvu nyamukuru yatumye ubucuruzi hagati y’Abanyafurika budatera imbere, byatewe n’uko ubwo Abakoloni bazaga muri Afurika bafashe ibihugu babaga barakoronije, bakabyumvisha ko bigomba kugura ibicuruzwa bivuye muri icyo gihugu.

Umunyamabanga Mukuru w’Inama ya Loni ishinzwe ubucuruzi n'iterambere, UNCTAD, Mukhisa Kituyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza