00:00:00 IGIHE NETWORK KN KINYARWANDA EN ENGLISH FR FRANCAIS

Ishyaka rya Kabund ryateguye imyigaragambyo ikomeye i Kinshasa

Yanditswe na IGIHE
Kuya 26 August 2022 saa 10:44
Yasuwe :

Ishyaka Alliance pour le Chengement, ryateguye imyigaragambyo yo gusaba irekurwa ry’umuyobozi waryo, Jean-Marc Kabund, ufunzwe kuva mu ntangiriro z’uku kwezi ashinjwa kwica itegeko nshinga n’andi mategeko y’igihugu.

Jean-Marc Kabund wahoze ari Umuyobozi w’ishyaka UDPS rya Perezida Felix Tshiskedi, yatawe muri yombi kuwa 9 Kanama 2022, ahita ajyanwa muri gereza ikomeye ya Makala.

Umushinjacyaha Mukuru i Kinshasa yamushinje ibyaha birimo kubahuka umukuru w’igihugu. Bishingiye ku magambo yavuze ubwo yatangazaga ko yashinze ishyaka rye.

Ibaruwa ishyaka rye ryandikiye Guverineri w’Umujyi wa Kinshasa, ivuga ko imyigaragambyo izaba kuwa 29 Kanama 2022, aho hazakorwa urugendo rw’amahoro rugamije guhatira leta kurekura Kabund nta mananiza.

Iyi myigaragambyo izatangira saa yine n’igice za mu gitondo, izarangirira ku biro by’umushinjacyaha mukuru hafi y’urukiko rusesa imanza. Bazahasomera inyandiko yabo y’ubusabe bwo kurekura Kabund, imbere y’abanyamakuru n’umushinjacyaha mukuru.

Urubanza rwa Kabund ruzatangira kuwa 5 Nzeri 2022 mu rukiko rusesa imanza.

Kabund wahoze ari visi Perezida w’Inteko ishinga amategeko, mu kwezi gushize yashinze ishyaka rye, anatangaza yeruye ko ari ku ruhande rw’abatavuga rumwe n’ubutegetsi.

Ubwo yari amaze kwegura ku buyobozi bw’inteko no mu ishyaka UDPS, Kabund w’imyaka 41 yatangaje ko ubutegetsi bwa Tshisekedi budashoboye.

Yagize ati "Byarangiye, nta kintu na kimwe cyo kwitega kuri Perezida Tshisekedi na UDPS barananiwe. Ubutegetsi buriho ntabwo bushoboye. Ndasaba abaturage kwishyira hamwe ngo birukane Félix Tshisekedi ku butegetsi."

Yashinje Tshisekedi ko ba Guverineri b’intara yabahinduye nk’abahungu n’abakobwa bari mu masiganwa.

Ku bwe, ngo Tshisekedi akwiye kugaragara nk’ikibazo ku butegetsi bwa RDC.

Kabund yafunzwe mu ntangiriro z'uku kwezi ashinjwa gutuka Perezida Tshisekedi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .