Intambara y’ubucuruzi hagati ya Kenya na Uganda ikomeje gufata indi ntera

Yanditswe na Habimana James
Kuya 18 Mutarama 2020 saa 07:41
Yasuwe :
0 0

Uganda yatangaje ko igiye kwihimura kuri Kenya yongera imisoro ku bicuruzwa biturukayo, nyuma y’aho iki gihugu gifatiriye amata yayo kikanongera imisoro.

Minisiteri y’ububanyi n’amahanga ya Uganda, yandikiye ambasade ya Kenya muri iki gihugu yamagana iyi myifatire.

Iri tangazo rigira riti “Guverinoma ya Uganda yamaganye imyifatire y’inzego z’ubutegetsi bwa Kenya, zikomeje ku bushake kongera imisoro ku bicuruzwa bya Uganda n’ibibikomokaho byajyagayo.”

Uganda ivuze ibi nyuma y’aho Kenya ifashe litiro 262,632 z’amata akomoka muri Uganda afite agaciro 157,106 by’amadorali ya Amerika, bihwanye n’amashilingi miliyoni 573 ya Uganda.

Iki gihugu kandi giherutse no gufatira izindi litiro 54,310 z’amata y’ifu zifite agaciro k’amashilingi miliyoni 743 mu byumweru bibiri bishize.

Uganda ivuga ko gufatira ibi bikomoka ku mata bitemewe n’amategeko, kuko inzego z’ubutegetsi muri Kenya zabaga zemeye ko byubahirije amategeko.

Kenya yo ivuga ko yafatiriye ibi bikomoka ku mata kubera ko byazanagwa mu gihugu bitujuje ubuziranenge, ibindi bikazanwa mu buryo bwa magendu.

Mu Ukuboza umwaka ushize, itsinda ryavuye muri guverinoma ya Kenya, ryasuye Uganda kugira ngo rigenzure niba koko aya mata ajyanwa muri Kenya aba avanywe muri Uganda, cyangwa niba aturuka mu kindi gihugu.

Kenya yavugaga ko hari abavuze ko uruganda rukora aya mata muri Uganda, rudafite ubushobozi bwo kohereza mata angana n’ayoherezwa.

Nyuma iri tsinda ryaje guha raporo Inteko Ishinga Amategeko ya Kenya, igaragaza ko amata yavanywe muri Uganda mu 2019 yari litiro miliyoni 110.7, avuye kuri litiro miliyoni eshatu yariho mu 2016.

Ibi byatumye Minisiteri y’ubucuruzi ya Kenya ishyiraho umusoro wa 16% kuri aya mata yinjiye mu gihugu avuye muri Uganda, hagamijwe kurengera aborozi bo mu gihugu bakomeje kwitotombera igiciro gito cy’aya mata avanwa muri Uganda.

Uganda yahise yamagana uyu musoro kuko ngo unyuranye n’ingingo ya 15 igenga isoko rusange ry’umuryango wa Afurika y’Uburasirazuba.

Uganda yavuze ko ifite umubare mwinshi w’ibyo ivana muri Kenya kandi ikaba itarakoze nk’ibyo iki gihugu cyakoze, gusa ivuga ko ishobora kwihimura.

Emmanuel Nutahunga, ushinzwe ubucuruzi bwo hanze muri Uganda, yavuze ko ubu bamaze gufata umwanzuro wo kwihimura kuri Kenya.

Uganda nicyo gihugu cyavanye ibicuruzwa byinshi muri Kenya mu 2018/2019 muri aka karere, kuko bifite agaciro ka miliyoni 720.14 z’amadolari.

Kugeza ubu ubucuruzi bwa Uganda bukomeje guhura n’akaga kuko bumaze kugabanukaho miliyari 3.4 z’amashilingi biturutse ku buhahirane n’ibihugu by’ibituranyi bwasubiye inyuma.

Raporo y’ubucuruzi bwo hanze y’umwaka wa 2018/2019, igaragaza ko icyuho mu bucuruzi bwa Uganda n’ibihugu bituranye, bwavuye kuri miliyoni 932 z’amadorali ni ukuvuga miliyari ibihumbi 3.4 z’amashilingi mu mwaka w’ingengo y’imari wa 2017/2018 bugera kuri miliyoni 11 z’amadorali ni ukuvuga miliyari 340 z’amashilingi mu mpera za Kamena ubwo warangiraga.

Uganda iherutse kwikoma Kenya kuko iki gihugu cyafashe icyemezo cyo guteza imbere ibihakorerwa, kigahagarika bimwe mu bicuruzwa bisa nk’ibi byavaga muri Uganda.

Ubusanzwe umubano wa Uganda na Kenya wari ntamakemwa ariko ubu ibihugu byombi biri mu ntambara y'ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .