Ingingo umunani zihariye inama y’Umuryango wa Afurika Yunze Ubumwe i Addis-Abeba

Yanditswe na Nkurunziza Ferdinand
Kuya 14 Gashyantare 2020 saa 10:23
Yasuwe :
0 0

Inama ya 33 y’abakuru b’ibihugu na za guverinoma bo mu Muryango wa Afurika Yunze Ubumwe yasojwe kuwa 11 Gashyantare 2020, yibanze ku ngingo umunani zikomeye kandi zigaragara nka bimwe mu bibazo bibangamiye umugabane wa Afurika muri rusange.

Ubuhahirane busesuye, kwigira mu bukungu, kurwanya iterabwoba, ikibazo cya Libye, urujijo ku kibazo cya Guinnée Bissau, Sahara y’Iburengerazuba ni zo ngingo zitagombaga kubura muri iyi nama.

Mu biganiro byabaye mu muhezo mu masaha y’ijoro, abakuru b’ibihugu na za guverinoma baganiriye cyane ku bibazo byugarije Afurika byagarutse cyane ku bukungu n’umutekano.

Umutekano

Ikibazo cyo mu gace ka Sahel

Abari muri iyi nama bibanze cyane ku kureba niba nta buryo buhamye bwo kohereza ingabo z’Umuryango wa Afurika Yunze Ubumwe zishinzwe kubungabunga amahoro mu gace ka Sahel; gusa nta mwanzuro wafashwe kuko hanzuwe ko ibiganiro kuri iki kibazo bizasubukurirwa mu yindi nama y’Umuryango wa Afurika Yunze Ubumwe izabera muri Afurika y’Epfo muri Gicurasi uyu mwaka.

Umunyamabanga Mukuru wa Loni, Antonio Guterres, wari watumiwe muri iyi nama yavuze ko kubungabunga amahoro mu buryo bisanzwe bikorwamo mu gace ka Sahel bidahagije gusa, by’umwihariko aho amahoro atari.

Antonio Guterres yongeyeho ko bashobora kohereza ingabo zifite ububasha bwo gukoresha imbaraga za gisirikare aho bibaye ngombwa, hisunzwe ingingo ya karindwi igenga ishyirwa mu bikorwa ry’inshingano z’ingabo z’Umuryango w’Abibumbye ziri mu butumwa bwo kubungabunga amahoro.

Perezida wa komisiyo y’Umuryango wa Afurika Yunze Ubumwe, Moussa Faki Mahamat, yavuze ko habuze ubumwe hagati y’ibihugu bya Afurika ku kibazo cy’ibihugu bitanu byo mu gace ka Sahel, kuko amafaranga y’umusanzu byasabwe n’akanama kihariye gashinzwe amahoro n’umutekano mu muryango wa Afurika Yunze Ubumwe atatanzwe nk’uko byari byitezwe.

Ikibazo cya Libye

Abakuru b’ibihugu byo mu gace ka Sahel n’Umunyamabanga Mukuru wa Loni, bavuze ko ibibazo bya Libye bifitanye isano n’iby’ibihugu byo muri Sahel kuko kuva iki gihugu cyasenywa n’intambara yo guhirika ubutegetsi bwa Mouammar Kadhafi mu 2011, byafunguye urujya n’uruza muri Sahel kugera no ku kiyaga cya Tchad.

Aba bayobozi bavuze ko ikibazo cya Libye nta ntambwe kiri gutera, nyamara hari inama yihariye y’akanama k’amahoro n’umutekano yigaga kuri iki gihugu, yateranye hari n’abahagarariye Libye, Perezida wa Misiri, Abdel Fattah al-Sissi n’uwa Congo Brazaville, Denis Sassou Nguesso, ari na we uyoboye akanama k’Umuryango wa Afurika Yunze Ubumwe kiga ku kibazo cya Libye.

Umuryango wa Afurika Yunze Ubumwe wifuza kongera imbaraga mu bufatanye na Loni, wafashe icyemezo cyo kohereza i Tripoli intumwa zawo zari zisanzwe ziri muri Tunisie, uvuga ko intambara nihagarara muri Libye nk’uko byaganiriweho i Genève, uzohereza abashinzwe kugenzura uburyo hubahirizwa agahenge ufatanyije na Loni.

Amakuru avuga ko Umuryango wa Afurika Yunze Ubumwe watekereje kongerera igihe cy’imirimo uwuhagarariye muri Libye, umunya-Tunisie Wahida Ayari Sakkej, ariko hakaba hakiri ibitarumvikanwaho neza; ukaba warafashe icyemezo cyo kuzakomeza kwiga ku kibazo cya Libye mu nama idasanzwe izateranira muri Afurika y’Epfo muri Gicurasi.

Impaka ku kibazo cya Sahara y’Iburengerazuba cyongeye kugarurwa

Iki kibazo cyari cyasubitswe mu nama iheruka y’Umuryango wa Afurika Yunze Ubumwe yabereye i Niamey, aho inama ya troïka yagombaga guhuza Perezida Paul Kagame w’u Rwanda, Cyril Ramaphosa wa Afurika y’Epfo na Abdelfattah al-Sissi wa Misiri itabaye nyamara yari iteganyijwe mu gitondo cya tariki 09 Gashyantare.

Impamvu yatangajwe ni uko habuze umwanya kuko Perezida wa Afurika y’Epfo yakiriye itsinda ry’abanya-Sudan y’Epfo mu ijoro ryo ku wa 08 rishyira 09 Gashyantare, baratinda. Muri uyu mwaka, umwanya wari ufitwe n’u Rwanda muri ako kanama ka troïka uzahabwa Repubulika Iharanira Demokarasi ya Congo.

Perezida wa Afurika y’Epfo, Cyril Ramaphosa, yagaragaje ko ashyigikiye ubwigenge bw’abaturage bo muri Sahara y’Iburengerazuba, ubwo yarahiriraga kongera kuyobora igihugu cye; ibintu byasubiwemo na Perezida wa Algeria, Abdelmajid Tebboune, birushaho kubabaza abayobozi ba Maroc na bo bari muri iyo nama, gusa bavuga ko ibihugu bibiri gusa ku mugabane wose ugizwe n’ibihugu 54 nta kibazo biteje.

Umuryango wa Afurika Yunze Ubumwe wanze amasezerano kuri Palestine

Perezida wa Komisiyo y’Umuryango wa Afurika Yunze Ubumwe, Faki Mahamat, ntiyariye iminwa ku kibazo cya Palestine ubwo yatangizaga inama y’uyu muryango. Yavuze ko ikibazo cya Palestine kigaragaza neza ukudashyira hamwe kw’amahanga.

Umugambi wa Amerika na Israël wiswe ’Ubwumvikane bw’Ikinyejana’ wemejwe ndetse unashyirwa mu bikorwa nta kugisha inama ibihugu by’amahanga; byongeye kandi nta ruhare na ruto rw’abarebwa n’iki kibazo by’umwihariko, aribo banya-Palestine.

Faki Mahamat yavuze ko ibi ari ukwica nkana amasezerano menshi y’umuryango w’Abibumbye.

Ibyavuzwe na Minisitiri w’Intebe wa Palestine, Mohammed Shtayyeh, wari wahawe umwanya mu muhango wo gutangiza iyi nama y’abakuru b’ibihugu na za guverinoma, byakiriwe neza n’abatari bake.

Iyi nama yari yanatumiwemo Ahmed Aboul Gheit, umunyamabanga w’ishyirahamwe ry’ibihugu by’Abarabu, wemerewe na Cyril Ramaphosa, ko bifatanyije kandi bashyigikiye abaturage ba Palestine nk’igihugu kigenga kandi gifite ubusugire.

Kimwe n’ibindi bihugu byinshi ku isi, Umuryango wa Afurika Yunze Ubumwe wavuze ko umugambi wa perezida wa Leta Zunze Ubumwe za Amerika, Donald Trump, udakwiye kwemerwa kuko ukandamiza abanye-Palestine.

Ubukungu

Umuyobozi wa AfCFTA yabaye umunya-Afurika y’Epfo

Isoko rusange rya Afurika ryari mu bitekerezo by’abari bitabiriye iyi nama. Mu gihe ibiro by’umuryango uzagenzura iri soko bigomba gushyirwaho bitarenze muri Werurwe uyu mwaka, ukagira icyicaro i Accra muri Ghana, abari bari muri iyo nama baganiririye mu muhezo igihe kirekire ku muntu ugomba kuwuyobora.

Nyuma yo gusesengura ubugira kabiri, abakandida 120 bashyizwe ku rutonde, batorwanywamo abantu batatu barimo umugore ukomoka muri Niger, Cécilia Akintomide, umunya-Afurika y’Epfo, Wamkele Mene ndetse n’umunye-Congo, Faustin Luanga.

Perezida wa Afurika y’Epfo, Cyril Ramaphosa, wanahawe inshingano zo kuyobora Umuryango wa Afurika Yunze Ubumwe, uwa RDC, Félix Tshisekedi na Muhammadu Buhari wa Nigeria baganiriye kuri iyo ngingo hagati yabo, bananirwa guhitamo umuyobozi w’uyu muryango, bituma habaho amatora y’inteko rusange.

Wamkele Mene wo muri Afurika y’Epfo ni we wegukanye uwo mwanya, nyuma yo gusubiramo amatora inshuro enye, yagaragayemo guhangana gukomeye kwa Cécilia Akintomide.

Benshi mu bari muri iyi nama ntibanyuzwe n’ukuntu Afurika y’Epfo ihawe uwo mwanya ufatwa nk’inyongera mu mitegekere y’Umuryangao wa Afurika Yunze Ubumwe; ariko kuko RDC na Nigeria bitigeze bishyira umukono ku masezerano ashyiraho isoko rusange rya Afurika, byababereye inzitizi yo guhatanira uwo mwanya w’ubuyobozi bwaryo.

Urujijo ku kibazo cya Guinée-Bissau

Umaro Sissoco Embaló wemejwe nka perezida w’iki gihugu yakiriwe i Addis-Abeba na Perezida wa Ethiopia, Sahle-Work Zewde, mu cyubahiro kigenewe umukuru w’igihugu. Gusa uyu ntiyigeze agaragara mu nama y’abakuru b’ibihugu na za guverinoma, ahubwo yahisemo kujya kwihurira ku ruhande n’abayobozi ba Congo-Brazzaville, Sénégal na Tchad.

Mu cyicaro yari yateguriwe hari harimo Minisitiri w’Ububanyi n’Amahanga wasezeye ku mirimo ye, Suzi Barbosa, wari ufite urwandiko rumwohereza mu butumwa rwasinywe n’uwahoze ari Perezida, Jose Mario Vaz.

Urukiko rw’Ikirenga muri Guinée-Bissau ruri gusuzuma ubundi bujurire bwatanzwe na Domingos Simões Pereira wari uhanganye bikomeye na Umaro Sissoco Embaló mu matora y’umukuru w’igihugu aheruka, mu gihe komisiyo y’amatora muri iki gihugu yongeye kwemeza bidasubirwaho ku nshuro ya kane ko Sissoco Embaló ari we perezida.

Umuryango wa Afurika Yunze Ubumwe wirinze gutumira muri iyi nama Sissoco Embaló, nyamara we ubu ari gutegura ibirori byo kurahirira inshingano yatorewe tariki ya 27 Gashyantare.

Abakuru b’ibihugu byo mu muryango wa CEDEAO baherutse guhurira mu nama yabereye mu muhezo ubwo bari bari muri Ethiopia, inama yayobowe na Perezida wa Niger, Mahamadou Issoufou, ariko Guinné-Bissau ihagararirwa na Minisitiri w’intebe, Arisitide Gomes.

Aba bayobozi basabye komisiyo y’amatora ya Guinné-Bissau gufata icyemezo kuri perezida ugomba kuyobora iki gihugu bitarenze tariki ya 15 Gashyantare mu rwego rwo gusigasira amahoro n’ituze mu gihugu.

Nigeria yasabye raporo ku gutangiza ECO

Mu kanama gato kahuje abakuru b’ibihugu byo mu muryango wa CEDEAO, banaganiriye ku itangizwa ry’ifaranga rimwe rizakoreshwa mu bihugu byo muri Afurika y’Iburengerazuba ‘ECO’, biteganyijwe ko ritangira gukoreshwa muri Nyakanga 2020, mu gihe hakiri amakimbirane ashingiye ku bukungu hagati ya Nigeria na Côte d’Ivoire.

Ku wa 10 Gashyantare, Perezida wa Nigeria, Muhammadu Buhari, yaganiriye na mugenzi we wa Niger, Mahamadou Issoufou, amumenyesha ko igihugu cye (Nigeria) cyifuza guhabwa raporo ku itangizwa ry’ifaranga rya ‘ECO’, kuko bishoboka ko amabwiriza yo kuritangiza atigeze akurikizwa hashingiwe ku ngengabihe yari yifujwe na Côte d’Ivoire, bityo ko kuritangiza bikwiye kwigizwa inyuma.

Gufatira ibihano u Burundi, Zimbabwe na Soudan

Umunya-Algérie Smail Chergui, uyobora Komisiyo y’Amahoro n’Umutekano mu Muryango wa Afurika Yunze Ubumwe yasabye ko Umuryango w’Ubumwe bw’Uburayi na Leta Zunze Ubumwe za Amerika bakuraho ibihano bafatiye igihugu cya Zimbabwe.

Perezida wa Zimbabwe, Emmerson Mnangagwa, na we yibukije inteko rusange y’abakuru b’ibihugu ko ibyo bihano byafatiwe igihugu cye, byahagaritse iterambere ryacyo.

Abakuru b’ibihugu kandi batoye umwanzuro usaba ko Umuryango w’Ubumwe bw’Uburayi wakuraho ibihano wafatiye u Burundi.

Umuryango wa Afurika Yunze Ubumwe kandi wanasabye ko Soudan ikurwa ku rutonde rw’ibihugu bitera inkunga ibikorwa by’iterabwoba rwakozwe na Leta Zunze Ubumwe za Amerika, icyifuzo cyashyigikiwe cyane n’Umunyabanga Mukuru wa Loni, Antonio Gutteres, wari muri iyi nama.

Inama ya AU iheruka yabereye i Addis Abeba muri Ethiopia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza