Ingabo za Uganda zakoreye iyicarubozo abarobyi basaga 30 bo muri RDC

Yanditswe na IGIHE
Kuya 22 Ugushyingo 2020 saa 07:29
Yasuwe :
0 0

Abarobyi bagera muri 30 bo muri Repubulika ya Demokarasi ya Congo, bashinje ingabo za Uganda zirwanira mu mazi kubata muri yombi binyuranyije n’amategeko no kubakorera iyicarubozo, mu kiyaga cya Edward gihurirwaho n’ibihugu byombi.

Ibi bikorwa byabaye mu cyumweru gishize, ku baturage bo mu bice bya Kyavinyonge na Kisaka, nk’uko Radio Okapi yabitangaje. Uretse kubahohotera, abo barobyi bavuga ko bananyazwe ibikoresho byabo.

Ishyirahamwe ry’abarobyi bo muri RDC, FECOPEILE, ryatangaje ko abarobyi batandatu bo muri Kisaka batawe muri yombi ku wa Kane, bakubitwa bikabije kandi bababazwa ku mubiri, mbere yo kurekurwa n’ingabo zirwanira mu mazi za Uganda. Ubwato bubiri bakoreshaga bwa moteri nabwo bwarafatiriwe.

Kimwe n’izindi nshuro zabanje, ingabo za Uganda ngo zabashinje kurenga umupaka wabo mu mazi, ariko abafashwe bo bakabihakana, bagashinja ingabo za Uganda kwinjira mu mazi yo ku ruhande rwa RDC bashaka gufata abo barobyi.

Umunyamabanga mukuru wa FECOPEILE, Josué Mukura, yavuze ko abandi barobyi 21 baturutse i Kyavinyonge muri teritwari ya Beni, na bo batawe muri yombi banakubitwa bikomeye n’Ingabo za Uganda, zanafashe ubwato burindwi bwa moteri n’ubundi butanu buto, mu cyumweru gishize.

Mukura yavuze ko ubushotoranyi bw’abasirikare ba Uganda bumaze kuba ndengakamere, aho bamaze gushimuta ubwato bugera mu 150 bw’abarobyi ba RDC n’ibindi bikoresho byabo, guhera mu 2015.

Yashimangiye ko iki kibazo kigira ingaruka ku mibereho n’ubukungu by’abarobyi, ugasanga bibakenesha.

Yasabye Guverinoma ya RDC n’iya Uganda gufatanya zikagaragaza neza imipaka yo mu mazi, bityo bikagabanya ibibazo bihora biba n’ugushinjanya kwa hato na hato.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .