Ingabo za Ethiopia zigaruriye bidasubirwaho umurwa mukuru w’agace ka Tigray

Yanditswe na Bukuru JC
Kuya 29 Ugushyingo 2020 saa 08:59
Yasuwe :
0 0

Minisitiri w’Intebe wa Ethiopia, Abiy Ahmed yatangaje ko ingabo za Leta zigaruriye umujyi wa Mekele ufatwa nk’umurwa mukuru w’intara ya Tigray.

Uyu mujyi ufashwe nyuma y’iminsi ingabo za Leta zirwana n’inyeshyamba z’ishyaka TPLF ryari riyoboye Tigray.

Kuri uyu wa Gatandatu, Abiy yatangaje ko ingabo za Leta zigaruriye uwo mujyi nta musivile ubikomerekeyemo.

Yagize ati “Guhera ejo, ingabo zacu zari ziri gupanga uko zigarurira umujyi wa Mekele nta musivile ukomerekejwe. Twabashije kwigarurira uwo mujyi byoroshye nta maraso amenetse.”

Abiy yavuze ko hari ingabo za Leta zari zafatiwe muri uwo mujyi zigera ku 7000 zabashije kubohorwa.

Yavuze ko ibikorwa bya gisirikare byarangiye, igisigaye ari uguhiga bukware abayobozi ba TPLF bakagezwa mu butabera.

TPLF yahoze ari ishyaka ndetse ryamaze imyaka myinshi riyoboye Ethiopia mbere yo gutakaza ubutegetsi mu 2018 ubwo Abiy yajyaga ku butegetsi. Kuri ubu rifatwa nk’umutwe wigometse nyuma yo gusuzugura ibyemezo biturutse Addis Abeba kwa Minisitiri w’Intebe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .