Ni mu murongo w’amasezerano Ethiopia yagiranye n’inyeshyamba za TPLF mu Ugushyingo umwaka ushize, agamije guhagarika intambara yari imaze imyaka hafi itatu.

Umunyamabanga wa Leta ushinzwe ububanyi n’Amahanga bwa Amerika, Anthony Blinken yatangaje ko kuri uyu wa Gatandatu yaganiriye na Minisitiri w’Intebe wa Ethiopia, Abiy Ahmed, bagaruka ku gutaha kw’ingabo za Eritrea.

Blinken kandi yasabye Ahmed korohereza imiryango mpuzamahanga n’abaharanira uburenganzira bwa muntu, kugera mu duce dutandukanye twa Tigray aho intambara yaberaga.

Mu mpera z’ukwezi gushize nibwo byatangiye gutangazwa ko ingabo za Eritrea zatangiye kuva muri Tigray.

Eritrea ifata TPLF nk’umwanzi ndetse Ethiopia na Eritrea byigeze kurwana mu ntambara hagati ya 1998 na 2000, ubwo TPLF yari iyoboye Ethiopia.

Ingabo za Eritrea zatangiye kuva muri Ethiopia guhera mu Ukuboza 2022