00:00:00 IGIHE NETWORK KN KINYARWANDA EN ENGLISH FR FRANCAIS

Imyigaragambyo y’abakozi muri Tunisie, ubwiru mu mutungo w’abayobozi bakuru muri Kenya: Amakuru muri Afurika

Yanditswe na IGIHE
Kuya 16 June 2022 saa 12:11
Yasuwe :

Si ibintu bizorohera Abanyakenya kumenya amakuru yerekeye umutungo w’abayobozi bo mu nzego zo hejuru barimo Perezida na visi perezida, nyuma y’ivugururwa ry’itegeko rigena uko igenzura ry’umutungo rikorwa.

Senateri Farhiya Ali Haji wafashije mu itegurwa ry’umushinga w’itegeko rigena uko igenzura ry’umutungo rikorwa, ashaka ko inteko ivanamo ingingo ya 25 yashoboraga gukuraho inzitizi ku baturage bashaka kubona amakuru yerekeye umutungo w’abayobozi bakuru.

Iyi ngingo yateganyaga ko inyandiko z’imenyekanisha ry’umutungo zishobora gushyirwa ahabona binyuze ku rubuga rwa internet cyangwa mu bubiko bw’amakuru atari ibanga, bubarizwa muri komisiyo ishinzwe kurwanya ruswa.

Byitezwe ko uyu mushinga w’itegeko uri bwemezwe kuri uyu wa Kane nimugoroba, mbere y’uko Sena isubika imirimo mbere y’amatora.

Kuri ubu, abakozi ba leta bamenyekanisha umutungo buri myaka ibiri, ariko amakuru arimo agakomeza kugirwa ibanga uretse ku bafite inshingano zo gukurikirana iby’inyungu rusange bashobora kuyabona.

Sosiyete yo muri Afurika y’Epfo yatangiye gukora inyama zo muri laboratwari

Afurika y’Epfo izwiho kugira abantu bakunda inyama zokeje. Ariko mu rwego rwo gukumira ko amatungo akomeza gukendera, sosiyete yo muri iki gihugu yabaye iya mbere ku mugabane wa Afurika yatangiye gukora inyama muri laboratwari.

Iyi sosiyete yitwa ‘Mzansi Meat Company’ yatangiye ibi bikorwa mu myaka ibiri ishize.

Yatewe inkunga n’abashoramari b’imbere mu gihugu n’abo hanze yacyo, bagwiriyemo abafite ibikorwa bifite aho bihuriye no kubungabunga ibidukikije, imibereho myiza y’inyamaswa n’ubuzima.

Iyi sosiyete itegereje guhabwa uburenganzira na Guverinoma ya Afurika y’Epfo bwo kugurisha izo nyama muri za restaurant, mu mezi ari hagati ya 12 na 18.

Kugeza ubu iteganya isoko ryo muri Afurika y’Epfo ariko bishoboka ko yanambuka imipaka ikagurisha no mu bindi bihugu.

Sosiyete yo muri Afurika y'Epfo yatangiye gukora inyama zo muri laboratwari

Abarundi basaga 200 bari mu buhungiro muri RDC batahutse

Umwe mu bahagarariye impunzi z’Abarundi muri Repubulika Iharanira Demokarasi ya Congo, yatangaje ko abasaga 200 babaga muri teritwari ya Fizi mu Ntara ya Kivu y’Epfo, kuri uyu wa Gatatu tariki 15 Kamena batahutse basubira mu gihugu cyabo.

Abatahutse babaga mu nkambi ya Mulongwe na Rusenda. Uko ari 221 babarizwa mu miryango 90. Babwiye Ijwi rya Amerika ko ibibazo birimo iby’umutekano muke bagiye zihura na byo muri Congo ari byo byatumye biyemeza guhunguka.

Umwe muri bo yagize ati "Nsubiye mu gihugu cyanjye kubera ko kuba mu buhungiro birimo ingorane umuntu agenda ahura na zo. Hari ibibazo bitandukanye nko kwamburwa, gukubitwa n’ibindi."

Ikindi kiri mu byatumye bafata icyemezo cyo gutaha ni inzara yo mu nkambi iterwa n’ubushomeri kubera ko besnhi nta kazi baba bafite.

Umuyobozi wa Komisiyo ishinzwe impunzi muri Uvira, yatangaje ko impunzi 1257 ari zo zimaze gucyurwa mu Burundi muri uyu mwaka bigizwemo uruhare n’Ishami rya LONI rishinzwe impunzi (HCR) na Leta ya Congo.

Bamwe mu mpunzi z'Abarundi bari barahungiye mu nkambi ya Rusenda

Abakozi bo muri Tunisie bazindukiye mu myigaragambyo

Ihuriro ry’abakozi muri Tunisie ryatangiye imyigaragambyo kuri uyu wa Kane, risaba kuzamurirwa imishahara. Ni ibintu byongera igitutu kuri Perezida Kais Saied utorohewe n’ibibazo muri iki gihe.

Byari biteganyijwe ko abagera ku bihumbi bitatu bari bwitabire iyo myigaragambyo, bituma ibigo bigera ku 159 bya leta bifunga, ingendo z’indege n’izo ku butaka zikomwa mu nkokora.

Mu itangazo iri huriro ryari ryashyize ahagaragara kuri uyu wa Gatatu, ryavuze ko abakozi "bazakora iyi myigaragambyo kugira ngo barengere uburenganzira bwabo mu by’ubukungu n’imibereho yabo nyuma y’abo ubutegetsi bunaniwe gufata icyemezo ku byo basabaga bemererwa n’amategeko."

Nubwo iri huriro ry’abakozi rivuga ko imyigaragambyo ntaho ihuriye na politiki, ibaye mu gihe Perezida Saied anengwa guheza abatavuga rumwe na we mu biganiro.

Perezida wa Tunisie yirukanye ndetse asesa Inteko Ishinga Amategeko yatowe n’abaturage muri Nyakanga umwaka ushize, mbere y’uko yirukana abacamanza muri uku kwezi.

Abakozi muri Tunisie baramukiye mu myigaragambyo

Abagera ku 1500 bahunze imirwano mishya muri Mozambique

Mu ntara ya Cabo Delgado mu Majyaruguru ya Mozambique, abagera ku 1500 bahunze imirwano mishya yadutse nk’uko umuryango mpuzamahanga ukurikirana ibibazo by’abimukira (IOM).

Imirwano mishya yadutse mu cyumweru gishize mu Majyepfo y’iyi ntara yari isanzwe ifite umutekano.

Amakimbirane muri aka karere yatangiye mu 2017. Uhereye icyo gihe abagera ku 4000 barishwe mu gihe abandi ibihumbi 800 bakuwe mu byabo.

Muri abo bahunze abenshi ni abana n’abagore batwite. Bamwe bahunze ubwa kabiri bavuye mu bice bari batangiye kubamo.

Ibitero bishya byabereye mu birometero nka 100 uvuye ahitwa Pemba hari aharahungiye abantu benshi mu myaka yashize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .