00:00:00 IGIHE NETWORK KN KINYARWANDA EN ENGLISH FR FRANCAIS

Impungenge kuri Uhuru Kenyatta nyuma yo kubura kw’imirwano hagati ya M23 na FARDC

Yanditswe na IGIHE
Kuya 25 Mutarama 2023 saa 02:22
Yasuwe :

Uhuru Kenyatta wahoze ari Perezida wa Kenya, akaba umuhuza hagati ya Guverinoma ya Repubulika Iharanira Demokarasi ya Congo (RDC) n’imitwe yitwaje intwaro, yagaragaje impungenge ku mutekano ukomeje kuba mubi mu Ntara ya Kivu y’Amajyaruguru, bigashyira ubuzima bw’abaturage mu kaga.

Uhuru Kenyatta umaze iminsi mu buhuza hagati ya Congo n’imitwe yitwaje intwaro, yashenguwe by’umwihariko n’imirwano yubuye hagati ya FARDC n’umutwe wa M23.

Kuri uyu wa Kabiri ingabo za Leta ziriwe zirwana n’inyeshyamba za M23 mu gace ka Kitchanga muri Kivu y’Amajyaruguru, ndetse uyu mutwe wigamba kwigarurira aka gace.

Mu butumwa ibiro bya Uhuru Kenyatta byashyize hanze kuri uyu wa Gatatu, byatangaje ko ahangayikishijwe n’iyo mirwano yubuye, mu gihe ibiganiro byari bimaze iminsi byatangaga icyizere.

Yagize ati “Umuhuza arasaba impande zose guhagarika imirwano, zigakurikiza amasezerano ya Luanda ndetse zikagaruka mu biganiro bya Nairobi bigamije kubaka amahoro muri Repubulika Iharanira Demokarasi ya Congo.”

Kenyatta yavuze ko bibabaje kuba iyi mirwano hari abaturage bari kuyigwamo bigizwemo uruhare n’imitwe yitwahe intwaro, ndetse benshi bakaba bamaze kuva mu byabo.

Uhuru Kenyatta kandi yasabye amahanga n’imiryango nterankunga gukora ibishoboka byose, abavanywe mu byabo n’imirwano bakabona ibyangombwa nkenerwa.

Kivu y’Amajyaruguru imaze iminsi irimo imvururu zishingiye ku mitwe yitwaje intwaro. Uretse M23 iri guhangana na FARDC, hari indi mitwe nka ADF, CODECO, FDLR, Mai Mai n’indi imaze iminsi yica abaturage, ibagabaho ibitero by’ubwiyahuzi n’ibindi.

Uhuru Kenyatta yatangaje ko ababajwe no kubura kw'imirwano hagati y'imitwe yitwaje intwaro n'ingabo za Leta muri Kivu y'Amajyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .