00:00:00 IGIHE NETWORK KN KINYARWANDA EN ENGLISH FR FRANCAIS

Imirwano ikomeje gukaza umurego hagati ya M23 na FARDC mu bice byegereye u Rwanda

Yanditswe na Umwali Zhuri
Kuya 24 May 2022 saa 03:42
Yasuwe :

Mu gitondo cyo kuri uyu wa Kabiri, urusaku rw’amasasu rukomeje kumvikana mu Burasirazuba bwa Congo, mu mirwano ihanganishije umutwe wa M23 n’Ingabo za Leta, FARDC.

Amasasu yumvikanye mu gace ka Buhumba hafi n’ahitwa Kibumba mu bilometero 25 uvuye mu Mujyi wa Goma hafi y’umupaka w’u Rwanda na RDC.

Uvuye mu ku mupaka w’u Rwanda na RDC kugera aho amasasu yumvikaniye, harimo intera y’ibilometero bitanu gusa.

Bivugwa ko ibirindiro by’Ingabo za Congo byarashweho na M23 nazo zigasubiza amasasu mu byerekezo yaturutsemo.

M23 yagabye igitero ku birindiro bya FARDC mu rukerera ahagana saa cyenda z’igitondo ku musozi wa Nyundo hafi y’umuhanda uva i Goma werekeza i Rutshuru.

Bivugwa ko ibyo bitero bigamije gushaka kwigarurira agace izo nyeshyamba zambuwe mu bihe bitandukanye.

Abaturage bo mu gace ka Kibumba bavuze ko inyeshyamba za M23 zagabye igitero zishaka kwigarurira ibice bya Runyoni na Tchanzu.

Amakuru ahari avuga ko abarwanyi banyuze mu gace ka Kabuhanga, Kabagana na Ngobera muri Pariki ya Virunga zigana Kibumba na Buhumba.

Ku wa Mbere Ingabo za Congo zarashe ku mutwe wa M23 maze ibisasu biruhukira ku butaka bw’u Rwanda. Igisirikare cy’u Rwanda cyasabye ko hatangwa ibisobanuro ku mpamvu zateye iyo nsanganya.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .